Խախտումներ համաներումը կիրառելիս

Դեկտեմբերի 22-ին, դատաիրավական ոլորտի պատասխանատուների հետ հերթական հանդիպմանը, Սերժ Սարգսյանը խիստ էր արտահայտվել դատական ոլորտում, հատկապես քրեական դատավարություններում սխալների վերաբերյալ: Եվ հանձնարարել էր անօրինական որոշումներ կայացրած քննիչների, դատախազ-դատավորների նկատմամբ սկսել ծառայողական քննություն` նրանց կարգապահական պատասխանատվության ենթարկելու համար, իսկ քրեորեն պատժելի արարքներ հայտնաբերելու դեպքում նյութերն ուղարկել Հատուկ քննչական ծառայություն: Այդ հանձնարարականից հետո Արդարադատության խորհրդի կարգապահական հանձնաժողովը հարուցել է միանգամից 7 կարգապահական վարույթ, իսկ 2 դատավորների վերաբերյալ նյութերն ուղարկվել են Դատարանների նախագահների խորհրդի էթիկայի հանձնաժողով:



Ըստ որոշ տեղեկությունների՝ այդ 7 դատավորները, որոնց անունները  խնամքով թաքցնում են, հիմնականում առնչվում են անցած գարնանը Անկախության 20-ամյակի կապակցությամբ Սերժ Սարգսյանի հայտարարած համաներման գործերին: Այդ տեղեկությունների համաձայն՝ դատավորները համաներման հետ կապված սխալ հաշվարկներ են արել, ինչի արդյունքում ավելի քիչ թվով մարդիկ են ազատ արձակվել: Այդ սխալները պատահական չեն եղել, այլ՝ միտումնավոր:



Ըստ որոշ տեղեկությունների՝ դրանք հենց վճռաբեկ դատարանի քրեական պալատի նախագահ Դավիթ Ավետիսյանի գիտությամբ են կատարվել: Ընդհանրապես՝ քրեական գործերով ոչ մի դատավճիռ ու լուծում առանց Դ. Ավետիսյանի չի իրականացվում, բոլոր դատավորները նրա հետ են համաձայնեցնում իրենց անելիքը: Բանն այն է, որ երբ բանտերը լիքն են, դա ձեռնտու է որոշ մարդկանց՝ նրանք մեծ փողեր են աշխատում կալանավորների վրա: Տեղեկություններ կան նաեւ, որ առաջիկայում որոշ դատախազներ եւս պատասխանատվության են ենթարկվելու: