Վովա Գասպարյանը բանջարաբոստանային կուլտուրաների հետ չի շփվում

Երեկ կառավարության 2012 թվականի առաջին նիստն էր, որը տեւեց ընդամենը 20 րոպե: Բացի այս առանձնահատկությունից, մի ուշագրավ փոփոխություն էլ էր կատարվել. փակել էին ետնադուռը, եւ մշտապես լրագրողներից խուսափող պաշտոնյաները ստիպված եղան ելք ու մուտք անել կառավարության գլխավոր մուտքից: Այս պատճառով շատերն անելանելի դրության մեջ էին հայտնվել եւ հնարավորինս արագ ու աննկատ փորձում էին ճողոպրել:



Լրագրողներից խուսափել չհաջողվեց Վլադիմիր Գասպարյանին, քանի որ վերջինս ոստիկանապետ  նշանակվելուց հետո առաջին անգամ էր հեռանում գլխավոր մուտքից,  ու ըստ էության նրա առաջին հանդիպումն էր լրատվամիջոցների ներկայացուցիչների հետ: Ի տարբերություն իր նախորդի՝ Գասպարյանն աշխատում էր զերծ մնալ էմոցիոնալ զեղումներից եւ հակիրճ պատասխանել հարցերին ու թերեւս առ Աստված ունեցած խորը հավատի շնորհիվ նա կարողացավ հերոսաբար դիմագրավել լրագրողների հարձակմանը, ավելին՝ հումորով պատասխանել սադրիչ հարցերին: Այսպիսի մոտեցում ցուցաբերեց, օրինակ,  մեր այն հրապարակմանը, ըստ որի՝ նա անձամբ ծեծել է թմրամոլության մեջ մեղադրվող, օրերս ազատ արձակված «Կարտոլ» մականունով Նորիկ Միրզախանյանին, որը համարվում է գեներալ Մանվելի մերձավորներից: «Ոչ մի բանջարաբոստանային կուլտուրաների հետ ոչ մի շփում չունեմ: Ոչ թե ասում եմ՝ ճիշտ չի, այլ հեքիաթ է եւ անհեթեթություն: Գասպարյանը ոստիկանապետ է, իսկ կարտոլը բանջարաբոստանային կուլտուրա է: Ես նման բան չեմ կարող անել: Եվ ընդհանրապես. ես իմ տեսակով, ուրեմն, մի 15 տարի է՝ էդ ձեւի բան չեմ արել»: Լրագրողներից մեկի դիտարկմանը, թե  ինքն էլ մականուն ունի, Գասպարյանն իսկույն հետաքրքրվեց, թե ինչ է իր մականունը: Երբ ռեպլիկի կարգով տեղեկացրինք՝ «Ֆիկստուլ», նախ բազմանշանակ ժպտաց, ապա ներկայացրեց այդ բառի բացատրությունը սեփական ստուգաբանությամբ. «Ուրեմն ուզում եմ ֆիկստուլի, թիթիզի ու լոպպազի տարբերությունն այնուամենայնիվ հասկանանք: Ֆիկստուլն էն մարդն է, որ ֆիքսում է էն, ինչ որ կա, ոչ թե որ փուչիկ է, ուզում է ձեւ անի, թե իրանից բան ա ներկայացնում»: Այնուհետեւ լրջանալով՝ հայտարարեց. «Այնպես որ, ես չեմ կարծում, որ ինձ մականուն կարող է կպնել, ինձ մականուն կպցնող չի կարող լինել, ես մականունավոր մարդ չեմ, ես ունեմ Աստծուց տրված անուն, ես կրում եմ իմ անունը՝ իմ ծնողներից ստացած»: Նրան հարցրինք նաեւ ոլորտը կին ոստիկաններով համալրելու ցանկության ու այլ ծրագրերի մասին:



- Պարոն Գասպարյան,  խոսակցություններ կան, որ ծրագրում եք համակարգը համալրել կին համազգեստավորներով, ինչը Վանո Սիրադեղյանի աշխատաոճն էր:



- Կներեք արտահայտությանս համար՝ կանայք նույնպես մարդ են: Ամբողջ աշխարհում կանայք ընդգրկված են համակարգում եւ մեր հասարակության անբաժանելի մասն են: Տեսեք դուք ինչ եք անում իմ հետ (նկատի ունի իրեն հարցեր տվող լրագրողներին՝ Գ. Ս.):



Ո՞նց կարող է կանայք չլինեն էդ համակարգում: Ավելին, ես գտնում եմ, որ կինն ավելի զսպող է հայ տղամարդուն:



- Նախկին ոստիկանապետ Ալիկ Սարգսյանը, անդրադառնալով ընդդիմության գործունեությանը, ասել էր, որ հեղափոխության ցանկացած փորձ կխեղդի դեռեւս օրորոցում: Դուք ինչպիսի՞ հակումներ ունեք հեղափոխական փորձերի  հանդեպ:



- Ես արդեն արել եմ հեղափոխություն 88-89 թվականներին, մասնակից եմ եղել դրան: Երկրորդ հեղափոխություն ես չեմ ակնկալում, բնականոն  խաղաղ զարգացում է լինելու իմ երկրում:



- Իսկ խեղդելու մղում ունե՞ք:



- Ես մազոխիստությամբ չեմ տառապում, ես ավելի կողմնակի եմ խաղաղության… Սկզբից եղել է  խոսքը:



- Պարոն Գասպարյան, վերջին շրջանում ձերբակալված թմրամոլները ԲՀԿ-ականներ էին: Այդ ինչպե՞ս էր պատահում, որ միայն ԲՀԿ-ականներ էին հայտնվում իրավապահների ուշադրության կենտրոնում:



- Մենք չենք գնում կուսակցությունների, անձերի հետեւից: Բացարձակապես նշանակություն չունի, թե որ կուսակցության, որ խավի, որ հաստատության մարդիկ  են, դա իմ համար նշանակություն չունի:  Նշանակություն ունի, թե ինչ են արել այդ մարդիկ: Հիմա ուռկանը գցված է, ես չեմ կարծում, որ…  էդ ժամանակի ինտենսիվ աշխատանքները նաեւ կապված էր միջպետական ծրագրով, այդ ամիսը համընկավ նրանց հետ:



- Այսինքն՝ ամեն կուսակցության ուռկան իր ամի՞սն ունի:



- Այո, մեր մեջ ասած՝ դա մարտավարության ձեւ է… (ծիծաղում է):



- Պարոն Գասպարյան, վերջին շրջանում շատ է խոսվում, որ  սեպտեմբերին վնասազերծված բանդան այն բանդան չէ, որը զբաղված էր մեծահարուստների տների թալանով:



- Ես իրավաբան եմ եւ գիտեմ իմ խոսքի արժեքը: Գնում է քննություն, ծանոթ եմ հրապարակումներին  եւ զեկույցներին, մեղմ ասած, ես էդպես չեմ կարծում:



- Այդ դեպքում  ինչո՞ւ գողոնը չի բացահայտվում:



- Աշխատանքային հարցեր են, այսօր չի բացահայտվում, վաղը կբացահայտեն: Ես ասել եմ՝ չբացահայտվող հանցագործություններ չկան, կան երկար կամ կարճ ժամանակ պահանջող, լավ կամ վատ աշխատողներ: Ես ակնկալում եմ, որ մեր պրակտիկայում ես ձեզ հնարավորություն չեմ տա հպարտանալու, որ իմ մոտ  չբացահայտվող հանցագործություններ կան: