Պատմվածք գեյի մասին (31-րդ մաս)

Պատգամավորի գրասենյակից դուրս գալուց հետո Արամը չկարողացավ զսպել արցունքները՝ նա խոցված էր: Սանձարձակ Գոյունյանը չափազանց բիրտ վարվեց նրա հետ, ինչպես մյուս միասեռականների: Արամին ամենից շատ հուզում էր, թե ով է պատգամավորին ասել, որ ինքը գեյ է:



"Միայն Արթուրը գիտի, բայց նա ինչո՞ւ պետք է ինձ մատներ: Իսկ եթե ուրիշներն էլ գիտե՞ն, ի՞նչ պետք է ես անեմ, այս մարդն ինձ հանգիստ չի տա: Իսկ եթե նա ինձ սպառնա՞, եթե բոլորին ասի, որ ես գեյ եմ, ի՞նչ կարող եմ ես անել": Արամը զանգահարեց Արթուրին եւ խնդրեց, որ հանդիպեն իրենց վարձակալած տանը:



- Ի՞նչ ա էղել, ո՞վ ա քեզ բան ասել,- հարցրեց Արթուրն Արամին, երբ նա ներս մտավ ուռած աչքերով:

- Դու ինչ-որ մեկին ասե՞լ ես, որ ես գեյ եմ:

- Չէ, խի՞ ես հարցնում:



- Որովհետեւ որոշ մարդիկ գիտեն այդ մասին,- բղավեց Արամը:

- Հետո՞ ինչ, մի գոռա:

- Ումի՞ց պիտի իմանային այդ մասին, կարո՞ղ ես գուշակել:

- Արամ, ի՞նչ ես նամյոկներով խոսում, պարզ ասա` հասկանամ:



- Բացի քեզանից ոչ ոք չգիտի, որ ես գեյ եմ:

- Ինչ միամիտն ես դու:

- Ես լուրջ եմ ասում: Դու ինչ-որ մեկին ասե՞լ ես այդ մասին:

- Չէ, քո ծանոթներից հաստատ ոչ մեկին չեմ ասել:



- Իսկ ոչ իմ ծանոթներին ասե՞լ ես:

- Հնարավոր ա, խի՞ ես էդքան վախեցած:

- Ո՞ւմ ես ասել:

- Մեր կլուբի տղերքին:



- Ովքե՞ր են նրանք:

- Սյոման ա, Էդուարդը, Լյովիկը:

- Դու ի՞նչ իրավունքով ես անծանոթ մարդկանց բացել իմ գաղտնիքը:

- Իրանք անծանոթ մարդիկ չեն, մեր տղերքն են, բացի էդ էլ` քեզ չեն ճանաչում:



- Արթուր, դու Գոյունյան Արտավազդին ճանաչո՞ւմ ես:

- Գոյունյան Արտավազդ... չէ, չգիտեմ, բայց ոնց որ ծանոթ անուն ա, մի տեղից լսել եմ:

- Հարուստ մարդ ա, գրասենյակներ ունի քաղաքում:

- Ոնց ասեցի՞ր` Գոյունյան Արտավա՞զդ, լսի, էդի ոնց որ թե պատգամավոր ա:



- Հաստա՞տ:

- Համոզված չեմ, բայց ոնց որ տելեվիզրով եմ տեսել, պատգամավոր ա:

- Դու գիտե՞ս, որ ինքը գեյ ա:

- Չէ, որտեղի՞ց պիտի իմանայի:



- Դու չգիտես, իսկ ինքն իմ մասին շատ բան գիտի, էսօր մոտն էի գնացել:

- Խի՞, ի՞նչ գործ ունես դրա հետ:

- Կանչել էր, գործ էր առաջարկում: Ավելի ճիշտ` առաջարկում էր, որ ծախվեմ իրեն, դառնամ սիրեկանը:

- Լո՞ւրջ ես ասում:



- Ավելի քան լուրջ, ինքը հստակ գիտեր, որ ես գեյ եմ եւ ուզում էր ինձ առներ:

- Շատ տարօրինակ ա, ինքը որտեղի՞ց ա քեզ ճանաչում:

- Չգիտեմ, ինձ թվաց, թե դու ես պատմել իմ մասին:

- Արամ, ես ի՞նչ գործ ունեմ Գոյունյանի նման մարդկանց հետ:



- Արթուր, ես վախենում եմ, որ ինքը կհետապնդի ինձ, ես իրան կոպտել եմ, ինքը ինձնից վրեժ կլուծի:

- Չվախենաս, ես չեմ թողի, որ քեզ մատով կպնի: Դու մի լարվի, ես կճշտեմ, թե ումից ա ինքը իմացել քո մասին, ու ինչ-որ պետքն ա՝ կանեմ:





շարունակելի



© Հրապարակ օրաթերթ