Սյունիքի մարզպետարանի արձագանքը. Սուրիկ Խաչատրյանը երբևէ չի զատել գորիսեցուն սիսիանցուց, կապանցին` մեղրեցուց

«Հրապարակը» տեղեկացրել է, որ սիսիանցիները դեմ են Սյունիքի մարզպետ Սուրեն Խաչատրյանի առաջադրած պատգամավորի թեկնածու Հայկ Գրիգորյանին, ասել են, թե պատերազմ են հայտարարում Լիսկային եւ ամեն ինչ անելու են, որ իր հովանավորյալը չանցնի:



Հրապարակմանը արձագանքել է Սյունիքի մարզպետարանի աշխատակազմի տեղեկատվության և հասարակայնության հետ կապերի բաժինը:Մեզ գրած նամակում մարզպետարանը պնդում է. «Առնվազն տարակուսանք և զարմանք է հարուցում «Հրապարակ» օրաթերթում տպագրված «Սիսիանցիները որոշել են պատերազմ հայտարարել մարզպետ Սուրիկ Խաչատրյանին» վերնագրված ապատեղեկատվությունը: ՀՀ Սյունիքի մարզպետ Սուրիկ Խաչատրյանը միշտ էլ խոր ակնածանքով է արտահայտվել Սյունիքի ժողովրդի, յուրաքանչյուր սյունեցու և առավել ընդգծված հարգանքով` սիսիանցիների մասին:



Նա երբևէ չի զատել գորիսեցուն սիսիանցուց, կապանցին` մեղրեցուց: Նրանք բոլորը սյունեցի են` իրենց հերոսական անցյալով, օրինակելի նկարագրով և հպարտ անհատականությամբ:



Մարզպետը պատեհ կամ անպատեհ առթներով միշտ ջերմությամբ է խոսել Սիսական հերոսական աշխարհի  մասին, հպարտությամբ թվարկել այնպիսի մեծությունների անուններ, ինչպիսին Նիկողայոս Ադոնցն է, Իսրայել Օրին, Հովհան Որոտնեցին, Համո Սահյանը և ուրիշներ:



Հաստատապես պնդում ենք, որ տեղեկատվության մեջ ներկայացված պահվածքը և արտահայտված կարծիքը հարիր չէ ՀՀ Սյունիքի մարզպետ Սուրիկ Խաչատրյանին: Նա ապրում է սյունիքի հոգսերով, անմնացորդ նվիրված է մեր լեռնաշխարհին և իրենն է համարում յուրաքանչյուր սյունեցու հպարտությունն ու «թասիբը»: