Ինչու Աշոտյանն իրական հիմքով չի ազատել Զոլյանին

Աշոտյան-Զոլյան հակամարտությունը դեռեւս չի հանգուցալուծվում: Համենայնդեպս, այն թեւակոխել է մեկ այլ փուլլ: Հակամարտող կողմերը մրցում են արդեն իրավական դաշտում: Մասնավորապես հունիսի 14-ին Կենտրոն եւ Նորք-Մարաշ վարչական շրջանների ընդհանուր իրավասության դատարանում, դատավոր Ռուբեն Ափինյանի նախագահությամբ, կկայանա առաջին դատական նիստը: Հայցով Զոլյանը վիճարկում է Աշոտյանի՝ իրեն աշխատանքից ազատելու հրամանը: Հիշեցնենք, որ մինչ այդ Զոլյանը մեկ այլ հայցադիմում էր ներկայացրել վարչական դատարան՝ վիճարկելով Բրյուսովում ԿԳՆ հանձնաժողովի կողմից իրականացված ստուգումների արդյունքում կայացված ակտը: Սակայն վարչական դատարանը հայցը հետ էր վերադարձրել, քանի որ Զոլյանն այն ստորագրել էր որպես ՊԼՀ-ի ռեկտոր:



Թե ինչ կորոշի դատարանը, այս պարագայում այնքան էլ էական չէ, քանի որ Զոլյանն օրերս աշխատանքից ազատման դիմում գրեց եւ ինքնակամ լքեց այն սենյակը, որն  ապօրինաբար զբաղեցնում էր օրեր շարունակ: Իսկ ԿԳՆ-ն ձայն չէր հանում, Զոլյանին դուրս չէր հանում այդ սենյակից, քանի որ Զոլյանի ուզածն էլ հենց դա էր:



Զոհի կարգավիճակով հանդես գալ, ցույց տալ, որ իրեն հալածում են, ֆիզիկական ուժ են գործադրում իր նկատմամբ: Բայց, փաստորեն, Զոլյանը որոշեց ինքնակամ վերջ տալ իր սկսած խաղին: Մեր ձեռքի տակ է հայտնվել Բրյուսովում անցկացված ստուգումների արդյունքում կայացված ակտը, որտեղ ակնհայտ խախտումներ կան, նույնիսկ հանցակազմ պարունակող փաստեր, սակայն Աշոտյանը, չգիտես ինչու, խնամքով թաքցրել է դրանք եւ Զոլյանի՝ աշխատանքից ազատման հիմքում դրել ինչ-որ տարօրինակ պատճառաբանություն, թե վերջինս իբր առանց իր թույլտվության Ստրասբուրգ է մեկնել:



Այստեղ անհասկանալի է մնում Աշոտյանի քայլը: Ինչու Զոլյանին չի ազատել ստուգումների արդյունքում կայացված ակտի հիման վրա, որտեղ բազմաթիվ խախտումներ են ֆիքսված: Բայց մի բան պարզ է. իրական պատճառների հիման վրա ռեկտորին ազատելով՝ Աշոտյանն ինչ-որ տեղ հարվածի տակ կդներ նաեւ իրեն, որ, լինելով կրթության եւ գիտության նախարար, տարիներ շարունակ աչք է փակել կամ չի հայտնաբերել իր ղեկավարած համակարգում կատարվող խախտումները:



Հետեւաբար, նախընտրել է հեշտ եւ ոչ այնքան աղմկոտ պատճառաբանություն, որը կստվերեր իր բացթողումները: Բայց, փաստորեն, Աշոտյանի հաշվարկները դուրս եկան վերահսկողությունից, եւ Զոլյանը, իր կատարած խախտումներին զուգահեռ, իրեն այնքան էլ զուսպ չպահեց, եւ բանը հասավ ընդհուպ փոխադարձ վիրավորանքների: Զոլյանն Աշոտյանին «վախկոտ, ստախոս ու ոչնչություն» անվանեց, իսկ Աշոտյանն էլ արձագանքեց, թե Զոլյանն «անտանելի է դարձել»:



Զոլյանը հեռուստատեսային իր ելույթներից մեկի ժամանակ Բրյուսովում ստուգումներ իրականացրած հանձնաժողովի անդամներին «բանդիտ» է անվանել, որի պատճառով, ի դեպ, նրա դեմ, ասում են՝ դատական հայց է ներկայացվելու: Մեր տեղեկություններով, հանձնաժողովի նախագահը՝ Վ. Բավեյանը, եւ մյուս երեք անդամները վիրավորանքի եւ զրպարտության հոդվածով հայցադիմում են պատրաստվում ներկայացնել Զոլյանի դեմ՝ առանց փոխհատուցման պահանջի: Թե ինչպես կհանգուցալուծվի այս կոնֆլիկտային իրավիճակը, պարզ կդառնա առաջիկայում: