Վարչապետն իր ճանապարհն է հարթում դեպի ԱԺ

Հենց այդ նպատակով էլ վարչապետը նախ հանդիպել էր ՕԵԿ-ի հետ, ապա՝ ԲՀԿ-ի: Քաղաքական հակառակորդներ Գագիկ Ծառուկյանի եւ Տիգրան Սարգսյանի նախօրեի հանդիպումն իսկապես ուշագրավ է: Ծառուկյանի՝ կոալիցիա կազմելու գլխավոր նախապայմանն էր Տիգրան Սարգսյանի պաշտոնանկությունը, ինչը չբավարարվելուց հետո ԲՀԿ-ն դարձավ կառուցողական ընդդիմություն: Կարծիքներ կան, որ Ծառուկյանի եւ վարչապետի հանդիպումը նշանակում է, որ Տիգրան Սարգսյանը չնայած մնաց իր պաշտոնին, սակայն, անկախ իր կամքից, ստիպված է հաշվի առնել ԲՀԿ առաջնորդի տնտեսական նկատառումներն ու ցանկությունները:
Թեեւ «կառուցողական ընդդիմության» առաջնորդն օրը ցերեկով է հանդիպել վարչապետին եւ անձամբ ավելի քան մեկ ժամ գտնվել է կառավարության շենքում, չգիտես ինչու, ԲՀԿ-ում կոմպլեքսավորված են այդ քայլից եւ չեն ուզում դրա մասին խոսել: Վարդան Օսկանյանը մեզ հետ զրույցում ասաց, որ ինքը հանդիպման է եւ չի կարող մեկնաբանություն տալ: Մեր հարցին, թե հնարավո՞ր է, որ այդ հանդիպմամբ նոր հարաբերությունների, ոչ պաշտոնական կոալիցիայի սկիզբ է դրվել, Օսկանյանը պատասխանելու փոխարեն պատմեց, թե ինքն ինչ պատճառով պատասխանեց մեր զանգին: «Հասկացեք, հանդիպման մեջ եմ, ուղղակի զանգի էի սպասում, դրա համար վերցրեցի… Ես չգիտեմ ոչինչ, ես բան չունեմ ասելու…»,-վրդովված կրկնում էր նա:
Վարչապետին անողոք քննադատության ենթարկող դաշնակցականներին եւս հանդիպման հրավեր ուղարկվել է: Սակայն հանդիպումը դեռ չի կայացել: Ֆրակցիայում այսօր կքննարկեն ու կորոշեն՝ պե՞տք է հանդիպել վարչապետի հետ, թե՞ ոչ: Այս մասին մեզ հետ զրույցում հայտնեց ՀՅԴ խմբակցության քարտուղար Աղվան Վարդանյանը: Իսկ արմատական ընդդիմության խմբակցության ղեկավար Լեւոն Զուրաբյանն ասաց, որ իրենց նման առաջարկ չի եղել: Լինելու դեպքում ինչպե՞ս կարձագանքեն, կգնա՞ն վարչապետի նստավայր՝ քննարկելու կառավարության ներկայացվելիք ծրագիրը: Զուրաբյանը պատասխանեց, որ հրավերը դեռ պետք է քննարկեն:
ԲՀԿ շարքերը տեղյակ չէին, որ նման հանդիպում է եղել, իսկ կառավարությունից լղոզված պատասխան ուղարկեցին այն մասին, որ վարչապետն աշխատանքային հանդիպումներ է ունենում ԱԺ-ում ներկայացված քաղաքական ուժերի ներկայացուցիչների հետ՝ քննարկելու կառավարության ծրագրի դրույթները:
Կարծիքներ