Էդուարդ Նալբանդյանը Ճապոնիայում քննարկել է Հարավային Կովկասի խնդիրները

ԱԳՆ մամուլի ծառայության տարածած հաղորդագրոթյան համաձայն, Տոկիոյում, հուլիսի 6-ին, Հայաստանի նախագահի գլխավորած պատվիրակության կազմում գտնվող ԱԳ նախարար Էդվարդ Նալբանդյանը հանդիպում է ունեցել Ճապոնիայի ԱԳ նախարար Կոիչիրո Գեմբայի (Koichiro Gemba) հետ:



Արտգործնախարարները բարձր են գնահատել երկու երկրների միջեւ հաստատված երկխոսությունը եւ խորհրդանշական համարել, որ ՀՀ նախագահի այցելությունը Ճապոնիա տեղի է ունենում դիվանագիտական հարաբերությունների հաստատման քսանամյակի հոբելյանական տարում:



Նախարարներ Նալբանդյանն ու Գեմբան հանգամանալից զրուցել են երկկողմ հարաբերությունների առավել զարգացման եւ այդ ուղղությամբ ձեռնարկվելիք քայլերի շուրջ:



Հայաստանի եւ Ճապոնիայի արտաքին քաղաքական գերատեսչությունների ղեկավարները կարեւորել են հանդիպումից առաջ ԱԳՆ-երի միջեւ ստորագրված համագործակցության մասին հուշագիրը՝ համոզմունք հայտնելով, որ այն կնպաստի իրենց ղեկավարած նախարարությունների փոխգործակցության սերտացմանը, քաղաքական խորհրդակցությունների ակտիվացմանը:



Բանակցությունների օրակարգում էին Կորեական թերակղզու եւ Հարավային Կովկասի խնդիրները, դրանց լուծման համար գործադրվող ջանքերը:



Հանդիպմանը անդրադարձ է եղել նաեւ միջազգային կազմակերպություններում հայ-ճապոնական փոխգործակցությանը, միմյանց թեկնածությունների աջակցությանն առնչվող հարցերին:



Հայաստանի ԱԳ նախարարն իր ճապոնացի գործընկերոջը հրավիրել է այցելել Երեւան: