Ոստիկանն ու գյուղացին փոխադարձ ապտակներ են հասցրել իրար

Երեկ մենք տեղեկացանք, որ Արարատի մարզի Սուրենավան գյուղի մի խումբ բնակիչներ նախօրեին երեք ժամ շարունակ փակել են կենտրոնական մայրուղու գյուղի հատվածը: Պատճառն այն է եղել, որ ոստիկանության Արարատի բաժնից նախապես հայտնել են, որ ստորագրությամբ ազատ կարձակվի օգոստոսի 4-ից կալանավորված Սուրենավանի նախկին գյուղապետ Կարո Կարապետյանը, սակայն դրժել են խոստումը:



Գյուղապետի կողմնակիցներն էլ փորձել են վրեժխնդիր լինել եւ փակել ճանապարհը: Ժամեր անց սուրենավանցիների հերոսության մասին իմացել է մարզային ոստիկանությունը եւ մի քանի օպերների՝ ոստիկանության բարձրաստիճան ներկայացուցչի գլխավորությամբ, գյուղ ճամփել: Սակայն, երբ տաքացած ու վրդովված գյուղացիներն անդրդվելի են մնացել եւ անտեսել են ոստիկանության աշխատակիցների հորդորներն ու շարունակել փակ պահել ճանապարհը, իրավապահները դիմել են հայտնի մեթոդին: Առաջինը բարձրաստիճան ոստիկանն է գրպանից հանել հեռախոսը եւ սկսել նկարահանել ամբոխին, որպեսզի հետո հեշտ հաշվեհարդար տեսնի ակտիվ մասնակիցների եւ նախաձեռողների հետ:



Սակայն գյուղացիներից մեկը, որը, ըստ տեղացիների, թեթեւակի մտավոր թերություններ ունի, «ամենադուխովն» է գտնվել: Անմիջապես հարձակվել եւ գետնովն է տվել նկարահանող հեռախոսը: Անակնկալի եկած ոստիկանը զարմանքով հարցրել է՝ գիտե՞ս ես ով եմ, ես իրավապահ մարմնի ներկայացուցիչ եմ, օրենք ես խախտում: Մեր Արմենը ոչ տարել, ոչ բերել՝ ասել է. «Հա, ի՞նչ անեմ, ես էլ Արմենն եմ»: Ոստիկանը, չտիրապետելով իրեն, ապտակել է բնակչին, որն այս հարցում էլ տակ չի մնացել ու մի լավ ապտակ էլ ինքն է հասցրել: Միջադեպից հետո բարձրաստիճանն օպերներին «իշմար» է տվել «կանդալել» անհնազանդ սուրենավանցուն, բայց գյուղացիների միջամտությամբ նա ազատ է արձակվել: Ինչեւէ, իրավապահներն ի վերջո կարողացել են համոզել սուրենավանցիներին դադարեցնել բողոքի ակցիան` խոստանալով առաջիկա օրերին իսկապես ազատ արձակել նախկին գյուղապետին:



Գյուղապետի նկատմամբ առաջին քրեական գործը` Հայաստանի քրեական օրենսգրքի 315 հոդվածի 1-ին մասի` «Պաշտոնական անփութություն» հատկանիշներով,  հարուցվել էր դեռեւս 2011-ի դեկտեմբերի 28-ին:



Այժմ նրա նկատմամբ ավելացել է եւս մեկ մեղադրանք` ՀՀ քրեական օրենսգրքի 179 հոդվածի 2-րդ մասի 1-ին եւ 3-րդ կետերի հատկանիշներով` «Առանձնապես խոշոր չափերի յուրացումը կամ վատնելը՝ պաշտոնական դիրքն օգտագործելով»:



Անի ԱՌԱՔԵԼՅԱՆ