«Մանգասարյաններին պաշտպանում են, քանի որ նրանց կապերը «վերեւներ» են տանում». ամերիկահայ գործարար

Ամերիկահայ գործարար Էդմոն Խուդյանը նամակ է հղել ոստիկանապետ Վլադիմիր Գասպարյանին եւ անդրադարձել օրերս Երեւանում տեղի ունեցած սպանության փորձին: 



Նա, մասնավորապես, գրել է. «Հարգելի Պրն. Գասպարյան,



Այսօր առավոտյան ինձ հայտնի դարձավ Վլադիսլավ եւ Էդուարդ Մանգասարյանների, Աշխարբեկ Քալանթարի ու Արտաշես Խ. միջադեպի մասին: Ցավում եմ դեպքի համար եւ ուրախ եմ, որ այն ողբերգությամբ չի ավարտվել:



Հարկ եմ համարում ձեզ հայտնելու որ Վլադիսլավ Մանգասարյանը մասնակից է կազմակերպված հանցավոր մի խմբի, ում հաջողվել է իմ հիմնադրած Արին Կապիտալ եւ Ներդրումային ՍՊԸ ընկերությունից 8,5 մլն դոլար թալանել: Այդ խմբի մասնակիցները մի քանիսն են, դրանցից մեկը նաեւ իր որդին է, Էդուարդ Մանգասարյանը: Տվյալ խումբը հանցավոր համաձայնության գալով թալանել են իմ ընկերությունը` «ՎՄԳ գրուպ» ՓԲԸ-ի միջոցով միլիոնավոր դոլարների կեղծ փոխառություններով ծանրաբեռնել իմ ընկերությունը, ապա կեղծ սնանկության տանելով զավթել ընկերության տարածքները: Աշխարբեկ Քալանթարը հանդիսանում է «ՎՄԳ գրուպ» ընկերության 40% բաժնեմասի սեփականատերը:



Դեռեւս անցյալ տարվա մարտին պաշտոնական նամակներով դիմումներ եմ ներկայացրել ՀՀ նախագահին, Գլխավոր դատախազին եւ Ոստիկանապետին այն մասին որ իմ ընկերությունը թալանվում է, սակայն առ այսօր համապատասխան միջոցներ չեռք չի առնվել: Վլադիսլավ Մանգասարյանի եւ նրա եղբայր Ռուբեն Մանգասարյանի կողմից Լուսինե Գյուլխասյանի հանդեպ իրականացված խարդախության փաստով հարուցվել է մեկ այլ քրեական գործ: ԱՄՆ-ից ժամանել եմ Հայաստան եւ այդ գործով ցուցմունք եմ տվել, սակայն այդ գործը կենտրոնի ոստիկանության քննիչ Կամո Ներսիսյանի մոտ քնել է: Իսկ եթե ոստիկանությունը իր աշխատանքը կատարեր ինչպես հարկն է, ապա Մանգասարյանները արդեն պատասխանատվության ենթարկված կլինեին եւ այս դեպքը տեղի չէր ունենա, որը կարծում եմ դեռեւս շարունակվելու է քանի որ Վ. Մանգասարյանը շատերին է խաբել: Նրանց վեճի մանրամասնության ես տեղյակ չեմ, բայց կարծում եմ այն թալանած գումարները բաժանելու անհամաձայնության պատճառն է:



Ցավում եմ որ ոստիկանության բարեփոխումներն այնքան են նկատելի չեն, գոնե իմ գործով: Հովանավորչության ու անպատժելիության պայմաններում ուղղակի իր պաշտպանության տակ են Մանգասարյանները, քանի որ նրանց կապերը «վերեւներն» են տանում»: