«Հայոց Արծիվների» գրասենյակների թիվը դարձավ 286

hraparak 26 Նոյեմբեր 2012 | 13:56 0

«Հայոց Արծիվներ» հայրենասիրական հասարակական կազմակերպության Նախագահությունը Կազմակերպության առաջնորդ Խաչիկ Ասրյանի գլխավորությամբ անցած շաբաթ գտնվում էր Շիրակի, Արագածոտնի եւ Արարատի մարզերում, որտեղ պաշտոնապես բացվեց Կազմակերպության 15 մասնաճյուղ:

Կազմակերպությունը տեղեկացնում է, որ նոր գրասենյակներ են բացվել Շիրակի մարզի Գտաշեն, Բյուրակն /Գյուլիբուլաղ/, Ոսկեհասկ, Հոռոմ, Գետափ, Տուֆաշեն, Արագածոտնի մարզի Նոր Եդեսիա, Կաքավաձոր, Դաշտադեմ, Արտենի, Արագածավան, Գետափ եւ Արարատի մարզի Նշավան, Սիփանիկ, Դարբնիկ գյուղերում:

ՀՀ սպորտի եւ երիտասարդության հարցերի փոխնախարար, «Հայոց Արծիվներ» հայրենասիրական հասարակական կազմակերպության առաջնորդ Խաչիկ Ասրյանը իր ելույթներում կարեւորել է «Հայոց Արծիվների» որդեգրած գաղափարախոսության եւ կարգախոսի դերն ու նշանակությունը հայ հասարակության շրջանում` միաժամանակ կարեւորելով հայ մարդու, հայ ընտանիքի եւ ընդհանուր առմամբ հայ հասարակության անմիջական մասնակցությունը հայոց պետականության հզորացման գործընթացներին:

Խաչիկ Ասրյանը ներկայացնելով Կազմակերպության գաղափարախոսությունը, նշեց, որ գյուղապահպանությունը, արտագաղթի կանխումը, ՀՀ քաղաքացու արժանապատվության պահպանումը ուղղակի մասն են կազմում ազգային-պետական-հայրենասիրական գաղափարախոսության:

«Հայոց Արծիվներ» հայրենասիրական հասարակական կազմակերպության Նախագահությունը գյուղական համայնքների միջնակարգ դպրոցներին հատկացրեց նաեւ մարզագույք:

«Հայոց Արծիվներ» հայրենասիրական հասարակական կազմակերպության Նախագահության որոշման համաձայն Սյունիքի մարզի Կապան, Գորիս, Սիսիան, Մեղրի, Ագարակ քաղաքներում գործող «Սյունյաց Արծիվներ» երիտասարդական հասարակական կազմակերպության մասնաճյուղերը վերանվանվեցին «Հայոց Արծիվներ» հայրենասիրական հասարակական կազմակերպության: