Մյուս ՀԱԿ չկա

Խորհրդարանը երեկ որոշեց Մարտի 1-ի  ժամանակավոր հանձնաժողով ստեղծելու հարցի քվեարկությունը տեղափոխել հաջորդ քառօրյա: ԱԺ ՀՀԿ խմբակցության ղեկավար Գալուստ Սահակյանը նշեց, որ այն թյուր կարծիքը, թե ՀՀԿ-ն չի ուզում, որ այս նախագիծն անցնի, թվացյալ է:



 



«ՀՀԿ-ն ոչինչ չունի թաքցնելու, եւ, բնականաբար, քննարկումներն էլ հենց դրանից են բխում: Բազմաթիվ անգամներ քննարկել ենք Ազգային ժողովի նախագահի մոտ եւ կարծում ենք, որ դեռ քննարկման խնդիր ունենք, մինչեւ օրինագիծը բոլոր կողմերից ընդունելի դառնա»,- ասաց Գալուստ Սահակյանը: Այդ պատճառով նա խնդրեց քննարկումը եւ քվեարկությունը հետաձգել հաջորդ քառօրյա, որն արդեն մայիսի 5-ի ընտրություններից հետո է: Քվեարկությունը հաջորդ քառօրյա տեղափոխելու առաջարկով հանդես եկավ նաեւ հարցի հիմնական զեկուցող, ՀԱԿ խմբակցության պատգամավոր Գագիկ Ջհանգիրյանը:



 



Հաշվի առնելով, որ նախորդ քառօրյային քննարկման դրված հարցը, հակառակ նախնական դիրքորոշումների, ՀՀԿ-ականների կողմից կոշտ քննադատության արժանացավ, ՀԱԿ-ը, կարելի է ասել, այսպիսով ՀՀԿ-ին ընդառաջեց նախընտրական ժամանակաշրջանում եւ  զերծ պահեց հանձնաժողովի դեմ հնչեցրած գնահատականների առիթով ավելորդ  քննադատություններից: Ինչո՞ւ. այս եւ այլ հարցերի մասին զրուցեցինք ՀԱԿ խմբակցության քարտուղար, համանուն կուսակցության փոխնախագահ Արամ Մանուկյանի հետ:



 



- Պարոն Մանուկյան, ինչո՞ւ տեղի տվեցիք ՀՀԿ-ի պահանջին՝  հետաձգել Մարտի 1-ի նոր հանձնաժողովի քվեարկության հարցը: Չե՞ք կարծում, որ այսպիսով ՀՀԿ-ի ձեռքերը բոլորովին ազատեցիք, քանի որ հաջորդ քառօրյայի մեկնարկը մայիսի 29-ից  է, այսինքն՝ մայիսի 5-ի ընտրություններից հետո:



 



- Մեզ արդյունքն է հետաքրքիր, եթե նույնիսկ երեք շաբաթ հետո դրական արդյունք կլինի, այդ շանսը պետք չէր կորցնել:



 



- ՀԱԿ-ը երաշխիքնե՞ր է այս առումով ստացել ՀՀԿ-ի կողմից, հույսեր տվե՞լ են, որ կհամաձայնեն նոր հանձնաժողով ստեղծել:



 



- Երաշխիք չկա, երբեք, բայց եթե իրենք առաջարկում են, որ դա կարող է նպաստել համատեղ լուծում գտնելուն, մենք այդ հնարավորությունը պետք է իրենց տայինք:



 



- Այլեւս հավատո՞ւմ եք ՀՀԿ-ին, գուցե փորձում են դիվիդենտներ շահել:



 



- Ուզում եմ, որ այդպես լինի: Գիտեք, չհավատալով կամ մերժելով այս առաջարկը, հաստատ ոչ մի բան չէինք ստանա: Այսպես գոնե հույս կա, որ կարող է լինել: Միգուցե իրենք օգտագործում են, որ դա ընտրություններից հետո գցեն, որպեսզի հեշտ լինի… բայց կրկնում եմ՝ մեզ համար ոչ թե ցուցադրելն ու խնդիրը լուծելն է, այլ հենց բուն խնդիրը լուծելն է:



 



Այդ առումով, եթե իրենք առաջարկում են կոմպրոմիսներ, եւ հնարավոր է գտնել լուծումներ եւ արդյունքում ունենալ հանձնաժողով, մենք համաձայն ենք: Ասեմ ձեզ, մենք ոչ մի մեծ զիջման չենք գնացել:



 



- Պարոն Մանուկյան, ի՞նչ կտա նոր հանձնաժողովը: Չե՞ք կարծում, որ մի քիչ շատ եք հույս դնում իշխանավորների բարի կամքի վրա: Նոր հանձնաժողովի գործառույթներում թեպետ նշված է, որ այս դեպքերով առնչվող պաշտոնյան պետք է ներկայանա եւ բացատրություններ տա, բայց եթե չներկայացավ, օրինակ, հանձնաժողովն իրավական որեւէ լծակ չունի՞ պատժելու կամ այլ բանի:



 



- Այո, պաշտոնյաների ներկայացումը կա, նրանք պարտավոր են ներկայանալ:



 



- Իսկ եթե չներկայանա՞ն:



 



- Չէէէէ….. Կանոնակարգն էլ է  դրա հնարավորությունը տալիս:



 



- Վերջին վերադասավորումներից հետո ՀԱԿ-ն այսօր առաջին անգամ նախընտրական հանրահավաք է հրավիրել, ակնկալիքներն ինչպիսի՞ն են:



 



- Կգաք կտեսնեք:



 



- Կարծում եք, որ դեռ ՀԱԿ-ի հետ հույսեր են կապում, եւ նույն բազմամարդ հանրահավա՞քն է լինելու, ինչպես տարիներ առաջ էր:



 



- Հուսանք, հուսանք: Մի քիչ, իհարկե, հասարակության մեջ ընդհանուր հիասթափվածություն կա, դա ակնհայտ էր Ցեղասպանության օրը: Ապրիլի 24-ին, երբ բարձրանում էինք հուշահամալիր, մի 30-40 անգամ կանգնեցնում էր ոստիկանությունը շարքերը, այս ամբողջ ժողովուրդը մի շնչով է բարձրացել, եւ ոչ մեկին չեն կանգնեցրել:



 



Քիչ ժողովուրդ է գնացել հուշահամալիր, որովհետեւ այդ մարդիկ այստեղ չեն: Մարդ չկա, ծաղիկների քանակից էլ էր երեւում:



 



- Լավ, պարոն Մանուկյան, անկեղծորեն ասեք՝ ինչպե՞ս եք Ձեզ զգում նորաստեղծ ՀԱԿ կուսակցության կազմում: Ի վերջո, Դուք երբեմնի ազդեցիկ ՀՀՇ-ի նախագահն էիք, բայց այսօր՝ շարքային կուսակցական: Ինչո՞ւ այդպես եղավ՝ ըստ Ձեզ:



 



- Ես որեւէ նոր զգալու բան չունեմ եւ որեւէ խնդիր չունեմ անկեղծ չլինելու: Բայց մենք 5 տարի է արդեն՝ նոր ռեժիմով ենք աշխատում, սա ամենեւին էլ նոր  իրավիճակ չէ, մենք ուղղակի ֆիքսեցինք այն, ինչ կար: ՀՀՇ-ն իր ամբողջ ծավալով, իր գործունեությամբ, իր մարդկային եւ այլ ռեսուրսներով միշտ աշխատել է, ՀԱԿ կազմի մեջ քաշող հիմնական ուժերից մեկն է եղել, հիմա էլ այդպես է: Մենք ուղղակի ֆիքսեցինք այն, ինչ կար, եւ  շահեցինք այն 2 հազար ակտիվիստը, որոնք իսկապես ակտիվիստ էին, բայց այսօր արդեն կուսակցական դարձան: Ես հանդիպել եմ Եվրոպայի լիբերալ կուսակցության նախագահի հետ ու ստացել եմ նրա շնորհավորանքը, եւ կուսակցության ընդլայնման առումով մեզ համար շատ ավելի լավ է:



 



- Իսկ կոնկրետ Ձեզ համար, չէ՞ որ այս ամենի արդյունքում Դուք, այնուամենայնիվ, նախագահից դարձաք տեղակալ, առաջ մղվեց Լյովիկ Զուրաբյանը:



 



- Ես երբեք այն ժամանակ էլ չեմ ձգտել պաշտոնի, ինձ համար պաշտոնը որքան մեծ է, այնքան չարչարանքն է շատ, եւ շատ ուրախ եմ, ու մեր հասարակությունը, ընդդիմադիր դաշտը կշահի Լեւոն Տեր-Պետրոսյանի այս կուսակցությունը ղեկավարելու արդյունքում: Ինձ համար մեծ պատիվ է նրա հետ աշխատելը, փաստորեն, ես հիմա նրա տեղակալն եմ կուսակցությունը կառավարելու գծով, բոլոր իմ լիազորությունները նույնն են, ես աշխատում եմ ավելի մեծ թիմի հմար: Երկուսս էլ (նկատի ունի Լեւոն Զուրաբյանին՝ Լ. Շ.) տեղակալ ենք,  մեր ընկերական հարաբերությունները շատ լավ են:



 



- Ի դեպ, մյուս ՀԱԿ-ը, դաշինքը ձեզ մեղադրում է իր անունը գողանալու մեջ:



 



- Մյուս ՀԱԿ չկա: ՀԱԿ դաշինքի մեջ կան կուսակցություններ, որոնց մի մասն էստեղ է, մի մասը դրսում է, մենք բոլորին ասում ենք. ովքեր կան՝ ապրեն, ովքեր գնացել են՝ հաջողություն իրենց, իսկ մենք աշխատում ենք: Ցտեսություն: