Տարոն Մարգարյան. Առաջիկայում կունենանք գրավիչ կենդանաբանական այգի

Երեւանի քաղաքապետ Տարոն Մարգարյանը կնոջ եւ երեխաների հետ մասնակցել է Երեւանի կենդանաբանական այգու տարեշրջանի բացմանը: Ավանդույթի համաձայն, տարեշրջանի բացման կապակցությամբ, քաղաքապետի հանձնարարությամբ կենդանաբանական այգու մուտքը բոլոր մանուկների համար անվճար էր: Փոքրիկ կենդանասերների տոնական բարձր տրամադրությունն ու ուրախ մթնոլորտն էլ ապահովված էր ամենուր:



 



Երեւանի քաղաքապետարանի տեղեկատվության եւ հասարակայնության հետ կապերի վարչությունը տեղեկացնում է, որ այգու տարբեր հատվածներում փոքրիկ այցելուների համար կազմակերպվել էին բազմաբնույթ միջոցառումներ: Փոքրիկներին դիմավորում էին հեքիաթների սիրված հերոսներն ու ծաղրածուները:



 



Քաղաքապետ Տարոն Մարգարյանը այգու տնօրենի ուղեկցությամբ շրջել է այգում, ծանոթացել կենդանիների համար ստեղծված պայմաններին: Նախորդ տարվա ընթացքում նախանշված աշխատանքները հիմնականում կատարված են եւ բոլոր այն պահանջները, որոնք առաջադրվել են քաղաքապետարանի կողմից, հետզհետե կյանքի են կոչվում:



 



Զրուցելով լրագրողների հետ, քաղաքապետ Տարոն Մարգարյանը նախ շնորհավորել է բոլորին կենդանաբանական այգու տարեշրջանի բացման կապակցությամբ եւ ընդգծել, որ այգու զարգացման ծրագրերը լինելու են շարունակական. «Արդեն հաճելի եւ սպասված ավանդույթ է դարձել կենդանաբանական այգու տարեշրջանի բացումը տոնական միջոցառումներով կազմակերպումը, ինչը բարձր տրամադրություն է ապահովում հատկապես մեր փոքրիկ երեւանցիների համար: Վստահ եմ, որ այսօր եւս մեր փոքրիկները ուրախ եւ հաճելի ժամանակ կանցկացնեն իրենց ծնողների հետ ու հաճելի հուշերով կհեռանան այգուց: Մեր ծնողներն էլ միշտ մեզ են մայիսի 1-ին բերել կենդանաբանական այգի եւ, ըստ էության, մենք այսօր շարունակում ենք այդ բարի ավանդույթը: Ինչ վերաբերում է այգու վերակառուցման աշխատանքներին, ապա դրանք շարունակվում են, անելիքներ դեռեւս շատ կան, սակայն մենք վստահ ենք, որ առաջիկա տարիների ընթացքում կունենանք լիովին վերափոխված ու նորովի գրավիչ կենդանաբանական այգի»,-ընդգծել է Տարոն Մարգարյանը: