Իրավապահները նախընտրում են ինքնասպան լինել գերեզմաններում

Ընդամենը մեկ շաբաթ առաջ Եղվարդի ոստիկանապետ նշանակված Կորյուն Հարությունյանի մահվան պատճառները դեռեւս պարզված չեն: Ամենահավանականն ինքնասպանությունն է: Հիշեցնենք, որ երեկ առավոտյան Հրազդան քաղաքի գերեզմանատանը` հոր գերեզմանի մոտ, հայտնաբերվել էր Եղվարդի ոստիկանապետ Կորյուն Հարությունյանի դին` հրազենային վնասվածքով: Հարությունյանի բացակայությունը նկատել էր վերջինիս վարորդը: Նա ահազանգել էր արտակարգ իրավիճակների նախարարության փրկարար ծառայության օպերատիվ կառավարման կենտրոն եւ տեղեկացրել, որ Հարությունյանը մայիսի 1-ին, ժամը 14:30-ի սահմաններում «Նիսան» մակնիշի 050VU03 պետհամարանիշով իր ծառայողական ավտոմեքենայով դուրս է եկել Եղվարդի ոստիկանության վարչական շենքից, եւ նրա գտնվելու վայրի վերաբերյալ ոչ մի տեղեկություն չկա: Որոնողական աշխատանքների արդյունքում Հարությունյանի դին հայտնաբերվել էր գերեզմանատան մոտ, ավտոմեքենայի մեջ:  Ոստիկանապետի մահվան փաստի առիթով հարուցվել է քրեական գործ, որը քննում է Հատուկ քննչական ծառայությունը: ՀՔԾ-ից դեպքի հետ կապված մանրամասներ պարզել չհաջողվեց: Նախաքննություն է ընթանում: Երեկ, սակայն, տեղեկություն տարածվեց, որ Հարությունյանը բաժանմունքից դուրս գալիս ասել է, որ գնում է մասնակցելու աներոջ ծնունդին, սակայն ավելի ուշ դադարել է պատասխանել հեռախոսազանգերին: Իսկ թե ինչ է եղել իրականում բաժանմունքից դուրս գալուց հետո, չգիտի ոչ ոք:



Նշենք, որ Հարությունյանն աշխատել է մարզային ոստիկանության պետի տեղակալ, որոշ ժամանակ եղել է կադրերի ռեզերվում, ապա պահպանության վարչությունում բաժնի պետ է եղել, որից հետո էլ, ընդամենը մեկ շաբաթ առաջ, նշանակվել էր Եղվարդի ոստիկանապետ: Բնակվում էր Եղվարդում, ամուսնացած էր եւ երեխաներ ուներ: Հարությունյանին ճանաչողները ցավով են խոսում կատարվածի մասին: «Լավ մարդ էր, լավ ոստիկան էր»,- միաբերան ասում են նրանք:



Կոտայքի մարզպետ Կովալենկո Շահգալդյանը մեզ հետ զրույցում ասաց, որ վաղուց է ճանաչել Կորյուն Հարությունյանին, ընկերներ են եղել, պարզապես վերջին մեկ տարվա ընթացքում այդքան շատ չեն շփվել: Հնարավո՞ր է խնդիրներ ունենար, թշնամիներ` հետաքրքրվեցինք: «Չէ-չէ, չեմ կարծում: Եթե նույնիսկ ունեցած էլ լիներ, ես տեղեկություններ չունեմ: Ես գիտեմ այնքան, որքան մամուլն է տեղեկացրել: Նոր էր նշանակվել, շատ բան չգիտեմ»,-ասաց մարզպետը: Հրազդանի քաղաքապետ Արամ Դանիելյանը եւս ասաց, որ Հարությունյանին վաղուց է ճանաչել: «Լավ մարդ էր, մեր ընկերներից էր»,-ասաց քաղաքապետը եւ դժվարացավ պատճառներից խոսել: Ասաց, որ ցավում է, ոչինչ չի կարող ասել, իր համար էլ էր շատ անսպասելի:



 



ՀԳ - Նկատենք, որ մեզանում նոր ավանդույթ է ձեւավորվում՝ մերձավոր հարազատների գերեզմանների մոտ ինքնասպան լինելու: Ամիսներ առաջ նման մի դեպք եղավ Երեւանում, իսկ անցած տարի նման քայլի գնաց ծնունդով վանաձորցի, Երեւանի Կենտրոնի դատախազությունում աշխատող դատախազը, ով ինքնասպան էր եղել մոր գերեզմանի մոտ:



 



Սոնա ՀԱՐՈւԹՅՈւՆՅԱՆ