Գողին բռնող չկա, որովհետեւ բոլորը գող են
hraparak
14 Հունիս 2013 | 08:37
0
Առավոտ լուսոն Հայաստանում մարդիկ դիմավորում են նոր մտայնությամբ՝ մարդ չե՞ն ծեծել, խոշտանգել, սպանել կամ հիմա ու՞մ ապարանքներն ու ունեցվածքն են քննարկման սեղանին դրվելու, հիմա ո՞ր մսխողին են բերան տալու: Եթե առաջներում այդ լուրերի սապոնաջրով լվացք էր անում միայն ընդդիմությունը, այսօր այդ պատասխանատու լվացքն անելու գործը իր վրա է վերցրել իշխանությունը: Բարձրաստիճան պաշտոնյաները մոտավորապես հայտնվել են այս իրավիճակում՝ տարա՜ն, կերա՜ն, թալանեցի՜ն, բյուջեն մսխե՜ցին, հա՜-հարա՜յ, սպանեցի՜ն… Վերստուգիչ պալատի նախագահ Իշխան Զաքարյանի կողմից բյուջեի մսխման թվերը լսելուց հետո շարքային քաղաքացին առնվազն մտածում է՝ էս թալանչիների ձեռքերն ինչու՞ չեն կապոտում ու լցնում բանտերը: Եթե տարեկան մոտ 1 տրիլիոնանոց բյուջեի 70 միլիարդը չարաշահվում է, միայն պաշտոնական բացահայտմամբ, բա ոչ պաշտոնականով ինչքան կբացահայտվի: Ստացվում է, որ ժողովուրդն իր մարմնի վրա կամավոր լվեր է աճեցրել, որոնք էլ հաճույքով ծծում են իր արյունը:
Նախորդ տարիներից մինչ այսօր Իշխան Զաքարյանը կոռուպցիոն բացահայտումներ է անում, ժողովուրդն էլ մտածում է՝ էս խեղջ մարդը մեռավ պետական թալաններ բացահայտելուց, կոկորդը ճղվեց, ո՞վ է բանի տեղ դնում, էլի թալանողը թալանում է, լափողն էլ լափում: Այստեղ մի նուրբ հարց է առաջանում՝ ինչու՞ է այդքան բարձր գոռում Իշխան Զաքարյանը: Վերլուծաբանները թող այդ հարցի պատասխանով զբաղվեն: Ինչու Իշխան Զաքարյանը ինչքան բարձր է գոռում, այնքան ավելի է հարստանում, նրա առանձնատուն- ապարանքն ու թանկարժեք այլ կառույցներն ավելի են փարթամանում ու ձագ տալիս: Կամ ինչու՞ ԱԺ Նախագահ Հովիկ Աբրահամյանն ուզում է ավելի բարձր գոռալ, քան Իշխան Զաքարյանը. «Անփոխարինելի պաշտոնյա չկա, ես գտնում եմ, որ հիմիկվանից պետք է ազատվել այն մարդկանցից, ովքեր զբաղված են թալանով ու կեղծիքներով»: Վա՜յ, Հովիկ ջան, ժողովուրդը հալվեց, ունեցածդ քի՞չ է, ինչու՞ ես բարկանում: Կամ որի՞ն բռնեն, ո՞վ բռնի, մանկությանդ խաղն եք հիշե՞լ, որ պահմտոցի էիք խաղում: Բոլորը թաքնվում էին, մեկն էլ ետեւներից էր ընկնում, որ տեղը գտնի ու բռնի:
Հիմա բռնող չկա, բոլորը գտնող են, բոլորի տեղը լա՜վ էլ տեղը տեղին գիտեք: Որ պետք է լինում, գնում, մի քիչ խուզում են, հետո ասում՝ գնա նորից բրդակալի: Ախր ու՞մ հաշվին են բրդակալում, մտածե՞լ եք, էդ բրդից ամենավերեւներին բաժին չի հասնու՞մ: Այ երբ որ վերեւներում բաժին չուզեն, նոր բարձր գոռալու փոխարեն, թաթիկից կբռնեք եւ կուղեկցեք բանտ: Իսկ հիմա քանի դեռ ժողովրդի ջանում արյուն կա, բոլորով միասին վրա տվեք ու ծծեք: Ծծելու հետ մեկտեղ Շարմազանովի կամ մեկ ուրիշի շուրթերով արտաբերեք. «Ինձ համար անընդունելի են կոռումպացված, չաղ ու բախտավոր չինովնիկները»: Էդիկ, ասա տեսնեմ, քո համար որտեղի՞ց գտնենք չկոռումպացված, նիհար ու դժբախտ չինովնիկներ: Գոնե մի թանգարանային նմուշի օրինակ կարո՞ղ ես բերել, որ հաջորդ օրն այդ նմուշի կնոջ կամ ազգականների ունեցվածքի մասին չգրեն: Նման դեպքում մնում է ընդամենն ասել՝ տղերք, անցեք ձեր գործին, արյուն քաշեք, վերեւներում բերանները բաց սպասում են: Շպրիցները ստերիլիզացնելու համար միացրեք գոլորշի արձակող բերանները, որ ամեն ինչ ստերիլ լինի՝ էս ի՜նչ կոռումպ պաշտոնյաներ են, ու՜ֆ, զզվում են դրանցից հանրապետականները: Մեկն էլ չի ասում՝ խի Հանրապետականներից բացի այլ պաշտոնյա կա՞:
Հասմիկ ԲԱԲԱՋԱՆՅԱՆ
Կարծիքներ