Որո՞նք են պասիվացած ՄԻԱԿ-ի բարի գործերը ԱԺ-ում

Ազգային ժողովի ՀՀԿ խմբակցության անդամ, ՄԻԱԿ համահիմնադիր Լեւոն Մարտիրոսյանը համաձայն չէ, որ ՄԻԱԿ-ը պասիվացել է, եւ նպատակն ընդամենը խորհրդարան մտնելն էր: Սակայն խոստովանում է, որ առաջ ավելի ակտիվ էր իրենց կուսակցությունը, հիմա, երբ արդեն երկու անդամ ունի խորհրդարանում, այլեւս այն ակտիվությունը չունի, ինչ առաջ էր, որովհետեւ զբաղված են ավելի շատ խորհրդարանական աշխատանքով: Նախկինում ՄԻԱԿ-ականները տարբեր ակցիաներ էին անում, հիմա նրանց ձայնը լսվում է միայն խորհրդարանում, այն էլ՝ ոչ հաճախակի: Մարտիրոսյանի խոսքից պարզ դարձավ նաեւ, որ ԱԺ-ում միայն ՀՀԿ-ում չեն նախկին ու ներկա ՄԻԱԿ-ականներ, այլ խմբակցություններում եւս կան, թե ովքեր են նրանք՝ չասաց:
- ՄԻԱԿ-ը երբեք պասիվ չի եղել, այն քաղաքական ուժերի թվին է դասվում, որ միշտ ակտիվ է եղել, եւ այդ ակտիվությունը տեսանելի է եղել, իհարկե, ոչ նույն ծավալով եւ ոչ միշտ: Մենք այժմ ավելի կենտրոնացած ենք խորհրդարանական մեր աշխատանքների վրա, որովհետեւ ոչ բոլոր կուսակցություններն են, որ ներկայացուցիչներ ունեն խորհրդարանում, մենք ունենք առնվազն երկու ներկայացուցիչ, որոնք ՄԻԱԿ անդամ են, նաեւ նախկին ՄԻԱԿ-ականներ կան, որոնք մեր ընկերներն են, օրինակ՝ Սամվել Ֆարմանյանը, ու ոչ միայն նա, շատ մարդիկ կան տարբեր խմբակցություններում: Մենք հանդարտ ձեւով մեր քաղաքական գործունեությունն առաջ ենք տանում եւ պատրաստվելու ենք հաջորդ ընտրություններին:

- Այսինքն՝ նպատակը խորհրդարան մտելն էր, երկու պատգամավոր ունենալը եւ վե՞րջ:

- Ոչ, իհարկե: Խորհրդարան մտնելը սկիզբն էր: Ուղղակի այս ընտրություններում մեզ հաջողվեց այդքանը ՀՀԿ-ի հետ միասին, հաջորդ ընտրություններում մենք ձգտելու ենք ավելի շատի:

- Այս երկու տարվա ընթացքում ԱԺ-ում ՄԻԱԿ-ական պատգամավորների գլխավոր ձեռքբերումն օրենսդրական աշխատանքում ո՞րն է:

- Մենք օրենսդրական գործունեությանն ակտիվորեն մասնակցում ենք, տարբեր օրենսդրական նախաձեռնություններ ենք հեղինակել: Պատգամավորի գործունեությունը, իհարկե, միայն օրենսդրական նախաձեռնությունները չեն, քաղաքական գործունեությունն է, այնուամենայնիվ, ելույթներ, հարցադրումներ, միջազգային խորհրդարանական դիվանագիտությանը մասնակցություն եւ այլն, եւ այլն: Այնուամենայնիվ, մենք մեծ թիմի մաս ենք կազմում, որը Հանրապետական խմբակցությունն է, նաեւ թիմային աշխատանք ենք տանում, առանձին, սեպարատ գործունեություն չենք ծավալում եւ, բնականաբար, աջակցում ենք բոլոր այն նախաձեռնություններին, որոնք ՀՀԿ խմբակցության կողմից են առաջ քաշվում, կառավարության եւ այլն:

- Իսկ ձեր սեփական տեսակետը, որքան էլ ՀՀԿ-ին սատարող կուսակցություն եք, երբեւէ փորձե՞լ եք առաջ քաշել, կամ եղե՞լ է, որ դրանք չհամընկնեն:

- Այո, իհարկե: Քննարկումներ ամենազանազան խնդիրների վերաբերյալ Հանրապետական խմբակցության ներսում տեղի ունենում են, եւ ոչ միայն մենք, այլեւ տարբեր պատգամավորներ տարբեր տեսակետներ են ունենում տարբեր հարցերի վերաբերյալ, բայց վերջում մենք գալիս ենք ընդհանուր հայտարարի եւ քվեարկում ենք միասնական: Եվ դա նորմալ է:

- Ինչպես ձեր խմբակցության, մյուս կուսակցությունների, այդ թվում եւ հատկապես ՄԻԱԿ-ի դեպքում այնպիսի տպավորություն է, որ կարծես ՀՀԿ-ի դուստր ձեռնարկությունը լինի: Եվ ակամա այն կարծիքն է ձեւավորվում, որ դուք միանշանակ ընդունում եք այն, ինչ ՀՀԿ-ն ասում է։

- Չէ, ես էլի եմ ասում՝ մենք ներքին քննարկումներ ենք ունենում ամեն մի խնդրի հետ կապված, լինի դա օրենսդրական նախաձեռնություն, քաղաքական ինչ-որ իրադարձություն: Թե ինչ քննարկումներ են լինում այնտեղ, պետք է Դուք ներկա լինեք եւ տեսնեք, թե որքան թեժ են անցնում, եւ միայն ՄԻԱԿ-ի անդամները չեն, որ իրենց կարծիքներն արտահայտում են: Բայց, իհարկե, թիմի գաղափար կա, եթե դու մի թիմի, մի խմբակցության մեջ ես, հրապարակային հարցերի վերաբերյալ հակառակ կարծիք արտահայտելը, մեղմ ասած, լավ բան չէ:

- Տեսեք, օրինակ՝ ՕԵԿ-ը, երբ կոալիցիայի մաս էր կազմում, ՀՀԿ-ի ներկայացրած բոլոր նախաձեռնություններին ավտոմատ կողմ էր, հիմա, երբ դուրս է եկել իշխանությունից, հանկարծ սկսեց նույն հարցերի շուրջ դեմ լինել: Այստեղ սկզբունքների խնդիր չկա՞:

- Իհարկե կա, բայց այդ քննարկումները չպետք է տեսանելի լինեն: Դրանք ներսում պետք է քննարկվեն, նախեւառաջ այդ քննարկումները, կարծիքների փոխանակումը, սկզբունքների մասին խոսելը պետք է լինեն խմբակցությունում, ոչ թե հրապարակային, այնպես որ, այստեղ խնդիր չկա: Իհարկե, կոալիցիոն գործընկերները պետք է քվեարկեն միասնաբար, դրա համար են իրենք կոալիցիա: Եթե խնդիրներ ունեն, պետք է իրար մեջ քննարկեն:

- Ձեր նախաձեռնություններից, որ ես հիշում եմ որպես ՄԻԱԿ-ական պատգամավորների ներկայացրած նախագիծ, «Գովազդի մասին» օրենքում փոփոխության օրինագիծն էր, որի շուրջ բավականին մեծ աղմուկ բարձրացավ եւ քննադատվեց:

- Այդ նախաձեռնությունն ուղղված էր մեր հեռուստաընկերությունների ֆինանսական ինքնաբավությունը որոշակիորեն ապահովելուն: Այսինքն՝ մեր նախաձեռնությունը բարի նախաձեռնություն էր եւ ուղղված էր այն բանին, որ գոնե ինչ-որ չափով մեր հեռուստաընկերությունները, հատկապես մարզայինները, հնարավորություն ունենան լրացուցիչ ֆինանսական միջոցներ ներգրավելու: Եվ այդ նախագիծը մենք մեր հեռուստաընկերությունների խնդրանքով ենք հեղինակել, որովհետեւ նրանք մինուսով են աշխատում հիմնականում, մանավանդ՝ մարզայինները:

- Իսկ որեւէ այլ կարեւոր նախաձեռնություն կհիշեցնե՞ք ձեր կողմից:

- Օրենսդրակա՞ն նախաձեռնություն: Պատգամավորի գործունեությունը միայն օրենսդրական նախաձեռնությունը չի կամ միայն քվեարկելը չի: Դա քաղաքական գործունեություն է, իսկ դա որքան բարի է, որքան արդյունավետ է, որոշելու են ընտրողները հաջորդ ընտրությունների ժամանակ:

- Բայց չէ՞ որ Ձեր կոլեգաներից շատերը՝ տարբեր խմբակցություններից, շատ ակտիվ հանդես են գալիս տարբեր օրինագծերով:

- Մենք էլ ենք հանդես գալիս: Հիմա, ասենք, մեկը մի քիչ ավելի շատախոս է, մեկը մի քիչ ավելի քչախոս է, բայց հանդես ենք գալիս նախաձեռնություններով, մասնակցում ենք բացարձակապես բոլոր կարեւոր իրադարձություններին, մեր կարծիքը հայտնում ենք: Թե ինչքանով է դա հաջողվում մեզ, ինչքանով է արդյունավետ եւ ինչպես է երեւում կողքից նայելով, դա, իհարկե, քննարկելու հարց է: Բայց մենք ակտիվ ենք:

- Առաջիկայում դուք որեւէ բարի նախաձեռնություն ունե՞ք, որ պատրաստվում եք ներկայացնել խորհրդարանում:

- Նախաձեռնությունների անունը եկեք չդնենք, էլի, բարի կամ չար: …Առաջիկայում մենք ունենք կարեւորագույն քաղաքական իրադարձություններ, դա ԵՏՄ-ին Հայաստանի անդամակցությունն է, դա սահմանադրական բարեփոխումների գործընթացի սկիզբն է, եւ մենք կողմնակից ենք այդ բարեփոխումներին, մեր կարծիքները, դիրքորոշումները հանձնաժողովին ենք ներկայացրել: Սա, կարծում եմ, ամենաբարի գործն է՝ սահմանադրական բարեփոխումներին ակտիվ մասնակցելն ու դրանում մեր լուման ունենալը: Դրանից կարեւոր խնդիր Հայաստանում հիմա չկա:

Վահե ՄԱԿԱՐՅԱՆ