Ես «Բարգավաճի» մտավախություններն էլ, խնդիրներն էլ եմ հասկանում

ՀԱԿ խմբակցության քարտուղար Արամ Մանուկյանից հետաքրքրվեցինք՝ մասնակցելո՞ւ է այսօրվա եւ հետագա մյուս հանրահավաքներին

«Այո»,- հակիրճ պատասխանեց Մանուկյանը՝ չցանկանալով անդրադառնալ շրջանառվող տեղեկություններին, թե իրեն մեկուսացրել են հանրահավաքներից: Այդուհանդերձ պարզաբանեց, թե ինչու չէր մասնակցել վերջին երկու հանրահավաքներին:
«Նախորդ օրերին ես զբաղված եմ եղել էս միտինգների կազմակերպմամբ, ինչպես նաեւ Վանաձորի եւ Գյումրիի միտինգների կազմակերպմամբ: Էդ օրերին ես եղել եմ Գյումրիում, Արթիկում, Մարալիկում, Վանաձորում»,-ասաց Մանուկյանը՝ ընդգծելով, որ չմասնակցելն ընդամենը տեխնիկական պատճառներով է եղել: Մանուկյանին մի քանի հարց ուղղեցինք միտինգներում երեք ուժերի գործողությունների համաձայնեցվածության վերաբերյալ:

- Թե՛ անձամբ Ձեր եւ թե՛ երեք ուժերի ելույթների տեքստը, բովանդակությունը, կոչերն ու վանկարկումները արդյոք համաձայնեցվա՞ծ են իրար հետ, թե՞ ազատ եք յուրաքանչյուրդ ձեր խոսքում:

- Ազատ ենք: Ընդհանուր սկզբունքներն ենք նայում, բայց յուրաքանչյուրս ազատ ենք մեր խոսքում, մենք ոչ մի ելույթ նախապես չենք քննարկում, չկա՛ էդպիսի բան:

- Այսինքն՝ նույն նախագահի կամ իշխանափոխության կոչերը՝ «Սերժի՛կ, հեռացի՛ր» եւ այլն, դրանում դուք միանգամայն ազատ եք, եւ որեւէ կաշկանդող բան չկա՞, թե ինչ կոչեր կարելի է հնչեցնել:

- Բացարձակ, ոչ մի կաշկանդող բան չկա:

- Իսկ ձեր այդ կոչերն ու վանկարկումները արդյոք համընկնո՞ւմ են մյուս ուժերի մոտեցումների ու սկզբունքների հետ, նույն այդ «Սերժի՛կ, հեռացի՛ր»-ի պարագայում, օրինակ:

- Էդ համագործակցության միավոր կազմող ուժերն ամեն մեկն իր դեմքն ունի, եւ մենք հարգում ենք իրենց հենց դրա՛ համար. «Ժառանգությունն» ուրիշ տեսակետ ու մոտեցումներ ունի, ուրիշ քաղաքական ուժ է, մենք՝ ուրիշ, «Բարգավաճը»՝ ուրիշ: Եվ մենք հարգում ենք, որ մյուսի տեսակետն էդպիսին է: Եվ եթե նույնը լիներ, կլիներ մի կուսակցություն:

- Բայց հիմա երեքդ նույն ուղղությամբ եք գնում:

 - Ընդհանուր խնդիրը մեր երկրի պրոբլեմները լուծելն է: Դա մեր ընդհանուր նպատակներից մեկն է, հիմա մենք ինչ արագությամբ, ինչ տեմպերով, ինչ մեթոդներով, ինչ գործիքներով՝ տարբերություններ կան: Նպատակը, խնդիրը մեկն է, թիրախը մեկն է, գնում ենք էդ թիրախի ուղղությամբ:

- Այս օրերին անընդհատ շրջանառվում է իշխանափոխության գնալ-չգնալու հարցը: Հիմա ձեր կողմից իշխանափոխության հարցը, կարծես թե, «Սերժի՛կ, հեռացի՛ր»-ի տեսքով դրվեց, բայց մյուսների կողմից՝ ոչ:

- Մյուսների կողմից էլ դրվեց՝ մի քիչ ուրիշ ձեւակերպումներով: Բացարձակ հակասություն մի՛ փնտրեք էստեղ: Հակառակը, կուզենայի, որ Դուք ոչ թե հակասություններ գտնեք, այլ ընդհանուր եզրերը: Վերջին հաշվով՝ նպատակը բարի է: Այսինքն էն, ինչ ուզում են այս քաղաքական ուժերը, դրական է: Փոփոխություն ենք ուզում, չէ՞: Եթե ժողովուրդն էլ աջակցում է, ուրեմն արդար է, ուրեմն մեր նպատակները համընկնում են ժողովրդի նպատակների հետ: Մենք երեք ուժերով էս պահին աշխատում ենք փոխադարձ հարգանքի, փոխադարձ ինքնուրույնությունը հարգելու մոդելով: Եթե ես չհարգեմ «Ժառանգության» տեսակետը, ո՞նց կարող ենք «Ժառանգության» հետ գնալ, բայց հարգում եմ նրանց տեսակետն իր ձեւի մեջ, նույնն էլ իրենք՝ մերը: Ես «Բարգավաճի» մտավախություններն էլ եմ հասկանում, խնդիրներն էլ եմ հասկանում, հարգում եմ իրենց հենց էդ տեսակի, էդ դրսեւորումների մեջ: Դրանով է կայացել այս դաշինքը: Իհարկե, փորձում ենք մեր մոտեցումները դարձնել նաեւ իրենցը:

- Վստա՞հ եք, որ այդ ճանապարհին հանկարծ «կարապը, խեցգետինը, գայլաձուկը» տարբերակով խնդիր չի առաջանա ձեր միջեւ:

- Ընդհակառակը, եթե առողջ է, եւ նպատակը նույնն է... մենք տարբեր կողմ չենք ձգում, մենք նույն կետին ենք բերում ամեն ինչ:

- Դաշնակցության մասնակցությունը եռյակի հանրահավաքներին վերջնականապես բացառվա՞ծ է, թե՞ հնարավոր է նրանք եւս միանան, քանի որ «Շրջանառության հարկի մասին» օրենքի հարցում էլի միավորվել էիք:

- 12 կետերի հետ կապված, երեկ էլ այդ օրենքի հետ կապված՝ խորհրդարանում նրանց աջակցությունը կա, բայց դրսում էս պահին համագործակցություն չկա: