Կալանավորները զանգել՝ շնորհակալություն են հայտնել հարցը բարձրացնելու համար
Չորեքշաբթի օրը կառավարության հետ հարցուպատասխանի ժամանակ «Ժառանգություն» խմբակցության պատգամավոր Զարուհի Փոստանջյանն ու ՀԱԿ խմբակցության պատգամավոր Նիկոլ Փաշինյանը, կարծես ձեն-ձենի տված, իսկական «թեժ աշուն» բերեցին վարչապետ Հովիկ Աբրահամյանի գլխին: Նախ Փաշինյանը Լիսկայի թեմայով գեղարվեստական բնույթի ակնհայտ ծաղրական հարց ձեւակերպեց, հետո էլ Փոստանջյանը, շարունակելով նույն թեման, արդեն ավելի «գողական» կոնտեքստում, «քսիֆի» տեսքով էր հարց պատրաստել վարչապետի համար: Նա նաեւ Աբրահամյանի պատասխանի ժամանակ հեռախոսով երգ էր միացրել, որը, ինչպես պարզվեց, Չելենտանոյի երգերից մեկն էր՝ կազինոյի մասին:
Այս ամենի մասին զրուցեցինք Զարուհի Փոստանջյանի հետ: Նա վստահեցրեց, որ իր եւ Նիկոլ Փաշինյանի միջեւ որեւէ պայմանավորվածություն չի եղել նույնատեսակ հարցերի հնչեցման առումով:
- Իսկ դրանից հետո Ձեզ հետ որեւէ խոսակցություն եղե՞լ է Ձեր կուսակցության ղեկավարության կամ իշխանությունների կողմից:
- Ոչ, ինձ միայն քրեակատարողական հիմնարկներից են զանգել եւ ասում էին՝ շնորհակալություն, որ այդ հարցը բարձրացրել եք:
- Այսինքն, այդ նամակը՝ «քսիֆը», իրակա՞ն էր, հորինվածք չէ՞ր:
- Այո, նամակն իրականում գոյություն ունի, եւ ես բացատրեցի, թե ինչպես է այդ նամակն ինձ հասել:
- Դուք նաեւ երաժշտություն միացրեցիք վարչապետի պատասխանի ժամանակ: Դա ի՞նչ էր նշանակում:
- Դա Դո՛ւք պետք է գնահատեք: Դուք լսեցի՞ք ինչ երաժշտություն էր:
Այստեղ Փոստանջյանի օգնականը միացրեց Ադրիանո Չելենտանոյի Soli երգը՝ կազինոյի մասին:
- Ձեր վարքն իշխանությունների նկատմամբ հաճախ է քննադատվել, ասում են, որ Դուք կարծես այնքան էլ խորհրդարանականին վայել պահվածք չեք դրսեւորում:
- Կներեք, Ձեր հարցը կոռեկտ չէ, իրենք իշխանություն չեն, եկեք էդտեղից սկսենք, ես իրենց որպես իշխանություն չեմ ճանաչում, իրենք բռնազավթիչներ են ուղղակի, որոնց դեմ մենք պայքարում ենք: Դուք ինչպե՞ս եք կարծում, ՀՀ կառավարությունն ինչպիսի՞ կառավարություն է, եթե ներգրավում է հանցագործ տարրի իր մոտ՝ որպես մարզպետ: Ես ընդամենը իրենց գնահատականն եմ հնչեցրել, դա իրենց գնահատականն է:
- Բայց կարծես թե Դուք միայնակ եք այդ ակտիվ պայքարում «բռնազավթիչների» դեմ:
- Այդպես չէ, ամբողջ հասարակությունն է պայքարում:
- Ինչ-որ շրջանակներում միայն Ձեզ ու Նիկոլ Փաշինյանին են որպես ընդդիմադիր գործիչ ընկալում խորհրդարանում՝ ելնելով ձեր ելույթներից, քննադատությունից, սուր հարցերից:
- Ես կխնդրեի չառանձնացնել պատգամավորի գործունեությունը, յուրաքանչյուր պատգամավոր իր տեղն ու դերն ունի: Ես չեմ կարծում, որ այս Ազգային ժողովում սուր քննադատության պակաս կա, եւ ընդամենը երկու հոգի է այդ սուր քննադատությունն իրականացնում: Այդպես չէ: Այսօր սուր քննադատություն առկա է թե՛ ՀՀ Ազգային ժողովի դահլիճում, թե՛ դահլիճից դուրս՝ հրապարակներում: Այստեղ խնդիրն այն է, որ այդ սուր քննադատությունն ունենա իր պտուղները, այ, դրան մենք չենք կարողանում հասնել: Ամբողջ խնդիրը դա է:
- Այսինքն՝ Դուք եւ «Ժառանգություն» խմբակցությունը նույն այդ սուր քննադատությո՞ւնն եք իրականացնում, Ձեր եւ Ձեր կուսակից կոլեգաների միջեւ այդ հարցում տարաձայնություններ չկա՞ն:
- Ես «Ժառանգության» անդամ եմ, ես այստեղ ներկայացնում եմ «Ժառանգություն» կուսակցության գաղափարախոսությունը եւ ես այստեղ փորձում եմ ներկայացնել մեր կուսակցության բոլոր ծրագրային դրույթները եւ ոչ միայն ես, նաեւ խմբակցության այլ անդամները եւս:
Կարծիքներ