Իշխանափոխությունն այս կամ այն անձին մեկ այլ անձով փոխարինելը չէ

Իշխանափոխությունն այս կամ այն անձին մեկ այլ անձով փոխարինելը չէ

«Ժառանգություն» կուսակցության ցուցակով պատգամավոր դարձած Ալեքսանդր Արզումանյանը, ով վաղուց արդեն չի ներկայացնում «Ժառանգության» տեսակետը, ԱԺ երկու պատգամավորներից մեկն է, ով ստորագրել է Նիկոլ Փաշինյանի «իմպիչմենթի» ձեւաթղթի տակ: Բացի այդ, նա խորհրդարանում եզակիների մեջ է նաեւ նրանով, որ դեմ է Հայաստանի՝ ԵՏՄ-ին անդամակցությանը: Նրա հետ «նույն գծի մեջ» են մեկ էլ Նիկոլ Փաշինյանն ու Զարուհի Փոստանջյանը:



- Պարո՛ն Արզումանյան, ինչո՞վ է պայմանավորված Ձեր անկախ դիրքորոշումը, որ Փոստանջյանից բացի մեկ էլ Դուք միացաք Փաշինյանի հայտարարած նախաձեռնությանը՝ պաշտոնանկ անելու Սերժ Սարգսյանին:



- Ես ընդամենը ստորագրել եմ ձեւաթուղթը, որով Նիկոլ Փաշինյանն արտահերթ նիստ է պահանջել: Ես կարծում եմ, որ յուրաքանչյուր պատգամավոր իրավունք ունի ցանկացած հարց առաջ քաշելու, եւ ես պարտավոր եմ, ընդդիմադիր լինելով, մանավանդ, երբ ընդդիմադիր դիրքերից է հարց առաջ քաշվում, քննարկել եւ հնարավորություն տալ բոլոր հարցերն ավելի բաց մթնոլորտում քննարկել: Դա չի նշանակում, սակայն, որ ես կոնկրետ առաջարկված նախագծին եմ ամբողջությամբ հավանություն տվել:



- Այսինքն՝ բովանդակային առումով, որ այնտեղ Սերժ Սարգսյանին մեղադրում են պետական դավաճանության ու այլ հանցագործությունների մեջ, Դուք այդ ամենին կո՞ղմ չեք:



- Դա պետք է դեռ քննարկել: Դուք գիտեք, երեւի, որ ես միշտ ձգտել եմ դիվանագիտական ձեւակերպումների, ինձ համար անընդունելի է նաեւ այն ուժերի բացատրությունը, որ ասում են, թե իրենք տեքստի հետ պրոբլեմ ունեն, որովհետեւ տեքստը չէ այստեղ, ես տեքստի տակ չեմ ստորագրել, որովհետեւ տեքստի հեղինակը Նիկոլ Փաշինյանն է: Ես անձամբ ստորագրել եմ արտահերթ նիստ հրավիրելու համար, որը եւ ներկայացված էր ձեւաթղթում, որից հետո մենք պատրաստ էինք էդ բովանդակությունը քննարկել: Ձեւաթուղթ ստորագրելն ու համահեղինակ լինելը տարբեր բաներ են: Ես համահեղինակ չեմ Նիկոլ Փաշինյանի այդ նախագծին:



- Դուք հույս ունեիք, որ այդ նախաձեռնությունը որոշակի ճանապարհ կանցնի ու կիրականանա՞: Ի՞նչ ակնկալիք ունեիք, առհասարակ, երբ ստորագրում էիք դրա տակ:



- Ես ինքս, լինելով ընդդիմադիր գործիչ, ցանկացած ընդդիմադիր գործողությանը կողմնակից եմ: Երբ Հրանտ Բագրատյանն ԱԺ նախագահի իր թեկնածությունն էր դնում, ես պաշտպանել եմ նրա թեկնածությունը՝ հաստատ իմանալով, որ չի անցնելու:



- Այսինքն՝ Ձեր այդ քայլն ավելի շատ բարոյակա՞ն հարթությունում էր՝ ընդդիմադիր գործչի պարտքի զգացումից բխող:



- Իհարկե, ես, որպես ընդդիմադիր, պարտավոր եմ ընդդիմադիր գործողություններին աջակցել:



- Այդ դեպքում եռյակին ու դրա մասը կազմող ուժերին ինչո՞ւ չեք միանում:



- Էդ ուժերն իրենք իրենց դեռեւս ընդդիմադիր չեն հռչակում, դրա համար:



- Բայց չէ՞ որ ՀԱԿ-ն ու «Ժառանգությունը» գոնե հստակ ընդդիմադիրներ են:



- Դե հիմա չի կարող մասամբ ընդդիմադիր լինել մի միավորում: Միավորումը կա՛մ ընդդիմադիր է, կա՛մ ոչ: Դրա համար էլ իրենք ընտրել են հեղհեղուկ ձեւակերպում՝ ոչ իշխանական, ինչն ինձ համար, թերեւս, անընդունելի է:



- Այսինքն՝ հեղհեղուկը Ձեզ համար այլընտրանքային ԲՀԿ-ի առկայությո՞ւնն է այդ միավորման մեջ: Եթե ԲՀԿ-ն չլիներ, ՀԱԿ-ին ու «Ժառանգությանը», որ ակնհայտ ընդդիմադիր են, կմիանայի՞ք:



- Չէ, չեմ կարող ասել, դժվար է, որովհետեւ մենք այսօր ունենք կարեւորագույն, ճակատագրական, բախտորոշ հարց, որը քննարկվում է Ազգային ժողովում. դա Հայաստանի՝ ԵՏՄ-ին միանալու պայմանագիրն է: Հիմա էդ հարցում մարդկանց մոտեցումն ինձ համար կարեւոր է՝ հասկանալու համար, թե մենք ուզո՞ւմ ենք շարունակել Հայաստանը տեսնել որպես անկախ պետություն, թե՞ մենք Հայաստանը պատկերացնում ենք սրա կամ նրա մաս: Էդ առումով ինձ չի հետաքրքրում՝ ով է իրեն հռչակում ընդդիմադիր կամ ինչ, ես ունեմ սկզբունքներ, եւ էդ սկզբունքներին հակասում է այն, որ ուժը, որը համաձայն է, որ Հայաստանը 23 տարի անց վերադառնա Խորհրդային Միության ինչ-որ ռեինկարնացիայի կազմի մեջ, դա ինձ համար մտահոգիչ է:



- Այդուհանդերձ, իշխանափոխության գաղափարը կարծես դրված է բոլոր ոչ իշխանական, ընդդիմադիր ուժերի քայլերի առանցքում: Դուք իշխանափոխությունն ինչպե՞ս եք պատկերացնում՝ հաշվի առնելով այն, որ եռյակն առանձին է պայքարում, Նիկոլ Փաշինյանը՝ առանձին, արտախորհրդարանական որոշ ուժեր՝ լրիվ առանձին:



- Ես կտրականապես համաձայն չեմ Ձեր գնահատականի հետ, որովհետեւ որեւէ իշխանափոխության խնդիր այսօր չի դրվում, եռյակն ինքը չգիտի, թե ինչ է ցանկանում, եւ ես այդ գործընթացն անվանել եմ իշխանակիսության գործընթաց, ընդ որում՝ էդ երեք կուսակցություններից մեկի ղեկավարը հստակ նշել է, որ ինքը կողմնակից է բազմակուսակցական կառավարման ձեւի, ինչը կոալիցիայի մեղմասացություն է: Այդ առումով ես չեմ տեսնում, որ եռյակը ձգտում է իշխանափոխության, եւ իշխանափոխությունն այս կամ այն անձին մեկ այլ անձով փոխարինելը չէ, որովհետեւ ինձ համար որեւէ նշանակություն չունի, թե որ ուժն է կեղեքում Հայաստանը: Ինձ պետք է, որ լինի համակարգային փոփոխություն:



- Շատերն են ասում, որ համակարգային փոփոխություն է պետք՝ մոռանալով, հավանաբար, թե ով է ղեկավարում այսօրվա գործող համակարգը, եւ տպավորություն է, որ համակարգային են ասում, որպեսզի բացահայտ գործող նախագահի հրաժարականը չպահանջեն:



- Ձեր հարցը սխալ է, որովհետեւ Դուք իրավունք չունեք ինձ նման հարց տալ, որովհետեւ ես թե՛ գործող նախագահի, թե՛ նախորդ նախագահի օրոք բանտերում եմ նստել իմ պայքարի համար եւ ես նորից պահանջելու եմ, որ նորից լինի իշխանափոխություն, բայց ինձ համար իշխանափոխությունը չի կարող ընկալվել մի բան, երբ որեւէ ուժ, որն էդ նույն իշխանության օրոք իշխանության մաս է կազմել, բոլոր էդ ապօրինություններին մաս է կազմել, դիզել է մեծագույն կարողություն եւ էդ կարողությունն այսօր օգտագործում է մարդկանց ավտոբուսներով հանրահավաքների բերելու համար, որ անցկացնի հանրահավաքներ, որոնց համար մեզ ժամանակին կարմիր բերետավորները գալիս ու բերման էին ենթարկում: Ինձ համար հեչ նշանակություն չունի, թե ով է գալու եւ շարունակելու այսօրվա «բեսպրեդելը», քանզի սա «բեսպրեդել» է:



- Ստացվում է, որ եռյակ ասելով՝ հասկանում ենք ԲՀԿ-ին, որը հենց ինքն էլ ձգտում է իշխանափոխությա՞ն:



- Ինձ համար էական չէ՝ ԲՀԿ կանվանեք դա, թե ոչ: Ես ասում եմ՝ եռյակի ձեւավորած հարթակում կանգնած մարդկանց մոտեցումն ինձ համար անընդունելի է, երբ այդ հարթակից հռչակվում է, որ «մենք պետք է ձեզ թելադրենք, թե ինչ անեք», որովհետեւ ես ավելի շատ կողմնակից եմ եղել նրան, որ հարթակին թելադրում է ժողովուրդը:



 



Վահե ՄԱԿԱՐՅԱՆ