Իշխանությունն ու ոչ իշխանությունը նույն օրակարգն ունեն

Շուրջ 5 հազար անդամ ունեցող «Ազատ դեմոկրատներ» կուսակցության փոխնախագահ Անուշ Սեդրակյանն այսօր միայն անձի փոփոխության մեջ չի տեսնում երկրում առկա խնդիրների լուծումը: Նա եւս համակարգային փոփոխության կողմնակից է, բայց նրանց «ախորժակն» այս հարցում ավելի մեծ է՝ փոխել ամբողջ տնտեսական ու քաղաքական համակարգը: Դրա մեջ է մտնում նաեւ ոչ միայն իշխանությունների, այլեւ ընդդիմադիր դաշտի փոփոխությունը՝ ՀԱԿ-ով, ԲՀԿ-ով, ՀՅԴ-ով, սակայն դեռեւս ոչ «Ժառանգությամբ» հանդերձ: Նա նաեւ վստահեցնում է, որ թեպետ իրենց անդամների թիվն առայժմ սոսկ 5 հազարին մոտ է, բայց նրանք կարեւորը սկզբունքային, հանուն գաղափարի միավորված «ազատ դեմոկրատներ են»: Հենց այդ սկզբունքների խաթր էլ, ըստ տիկին Սեդրակյանի, իրենց գաղափարակից է նաեւ երկրի բնակչության ոչ պակաս, քան 80 տոկոսը: Երկրում առկա իրավիճակի ու իրենց դիրքորոշման մասին զրուցեցինք Անուշ Սեդրակյանի հետ:

- Տիկի՛ն Սեդրակյան, ըստ Ձեզ՝ ինչպիսի՞ն է այսօր մեր երկրի վիճակը:

- Ինձ թվում է՝ մեր երկրի վիճակը միշտ երկու քայլ ավելի վատն է եղել, քան Ռուսաստանի վիճակը, եւ եթե տնտեսական հարաբերակցությունը դիտարկենք, կհասկանանք, որ մենք հիմա, իհարկե, շատ վատ վիճակում ենք, որովհետեւ օլիգարխացումը հնարավոր է հանդուրժել, երբ որ դու արտաքին հոսքեր ունես:

- Իսկ եթե մեր վիճակը Ռուսաստանից դուրս դիտարկե՞նք:

- Ռուսաստանից դուրս էլի չենք կարող դիտարկել, որովհետեւ մենք պիտի հասկանանք, որ կրճատվում են տրանսֆերտները օբյեկտիվ պատճառներով, կրճատվում են նաեւ դեմոգրաֆիկական հոսքերը, եւ մենք հասկանում ենք, որ եթե նույնիսկ փորձենք կտրվել էդ ամեն ինչից, կհասկանանք, որ տնտեսական ճգնաժամն ակնհայտ է դարձել արդեն: Այսինքն՝ ինքը միշտ կար, բայց ինքը կար շատ հաճախ սխալ կառավարման, գումարների սխալ բաշխման պատճառով: Հիմա արդեն այն օբյեկտիվ նախադրյալներ է ստացել:

- Դուք, որպես «Ազատ դեմոկրատներ» կուսակցության փոխնախագահ, այս ամենից ելքն ինչպե՞ս եք տեսնում:

- Ես կարծում եմ, որ պետք է սկսել հանրային իրազեկման շարժում: Դա պիտի լինի առաջին քայլը, որովհետեւ, ինչպես տեսնում եք, իրազեկված չեն ոչ միայն սովորական քաղաքացիները, այլ նաեւ մեր Ազգային ժողովի պատգամավորները կամ ձեւացնում են, թե իրազեկված չեն:

- Իրազեկել ինչի՞ մասին:

- Օրինակ՝ այն մասին, որ ոչ միայն ֆուրաժային հացահատիկն է ներկրվում, այլ նաեւ ընդհանուր հացահատիկը՝ Ռուսաստանից: Իրազեկել այն մասին, որ նավթի գները պատրաստվում են դարձյալ իջնել, իրազեկել առ այն, որ մենք չենք կարող միանալ մի միության, որտեղ ներքին խժդժություններ կան միության երկրների միջեւ:

- Դա մի փոքր ուշացած չէ՞: ԵՏՄ պայմանագիրն արդեն ստորագրված է: Եվ, ի վերջո, մեր գլխավոր խնդիրն այսօր ԵՏ միությո՞ւնն է:

- Ո՛չ: ԵՏՄ-ի պայմանագիրն արդեն ընդունված է, բայց ես ուզում եմ Ձեզ հիշեցնել, որ մենք նաեւ ԱՊՀ անդամ ենք: Իսկ ո՞ւր է այդ ԱՊՀ-ն:

- Ենթադրենք՝ իրազեկվեցինք: Հետո՞:

- Իրազեկումից հետո, ինձ թվում է, պետք է գան արդեն հաջորդիվ քայլերը, որովհետեւ այսօր օդում, այսպես ասած, ծավալվում է իշխանափոխության գաղափարը՝ առանց որեւէ գործնական հիմքերի: Այսինքն, իշխանափոխություն՝ իբրեւ անձերի փոփոխություն: Մենք պետք է խնդիր դնենք, որ եթե իշխանափոխություն, ապա տնտեսական համակարգի փոփոխություն:

- Հիմա Դուք իշխանափոխություն պահանջո՞ւմ եք:

- Ես պահանջում եմ տնտեսական համակարգի փոփոխություն՝ լուրջ պահանջով: Ով կանի այդ փոփոխությունը, ինձ չի հետաքրքրում: Ինչպես տեսնում եք, այս իշխանությունները եւ ներկա պահին այդ ոչ իշխանական ուժերը մտադիր չեն պահանջել համակարգի փոփոխություն՝ ե՛ւ տնտեսական, ե՛ւ քաղաքական:

- Այստեղ անձի, մասնավորապես Սերժ Սարգսյանի փոփոխություն ենթադրվո՞ւմ է:

- Գիտե՞ք, օրինակ, եթե Սերժ Սարգսյանը վաղը որոշի արմատապես փոխել տնտեսվարման համակարգը եւ քաղաքական պայմանագրերը, բնավ էական չէ, թե ով է իրականացնում այդ փոփոխությունը, ու մենք չենք խոչընդոտի, որովհետեւ ինչպե՞ս կարելի է խոչընդոտել մի մարդու, որը փորձում է անել հաշվարկված քայլեր, բայց, ցավոք, ներկա պահին որեւէ հիմք չկա մտածելու, որ ներկայիս իշխանությունները փորձում են դույզն-ինչ նման քայլեր անել:

- Իսկ ըստ Ձեզ՝ այսօր ժողովուրդը հիմք ունի՞ մտածելու, որ դուք ընդդիմադիր ուժ եք:

- Մենք ոչ միայն ընդդիմադիր ուժ ենք, մենք ընդդիմադիր գաղափարական պլատֆորմ ունեցող ուժ ենք՝ ի տարբերություն այլ ուժերի:

- Այսօր շատ ընդդիմադիր կամ ոչ իշխանական ուժեր, խոսելով իշխանափոխության մասին, կարծես մի փոքր վախվորած են դնում կոնկրետ անձի փոփոխության պահանջ ու փորձում են ձեւակերպել՝ «համակարգային, տնտեսական» եւ այլն:

- Բացարձակ վախվորածության խնդիր չկա: Ինձ, ուղղակի, ապշեցնում է մի բան, որ ակնհայտորեն թե՛ էքսպերտային շրջանակները, թե՛ ինչ-որ տեղ լրագրողներն ու նաեւ քաղաքական ուժերը չեն ուզում ֆիքսել այն, որ ոչ իշխանական ու իշխանական ուժերի օրակարգում այսօր բացարձակ տարբերություն չկա: Իսկ կարելի՞ է միանգամից բոլորի փոփոխությունը պահանջել՝ Հանրապետականի, ԲՀԿ-ի եւ բոլոր նրանց հարող ուժերի, այն ուժերի, որոնք հանդես են գալիս նույն օրակարգով:

- Այսինքն՝ նաեւ «Ժառանգության» ու Կոնգրեսի՞ փոփոխությունը:

- Ես կարծում եմ, որ այս պահին «Ժառանգությունը» շարունակում է ունենալ տարաձայնություններ եռյակի օրակարգի հետ, եւ ես ակնկալում եմ, որ այդ տարաձայնությունները խորանալու են, դրա համար եկեք սպասենք դեպքերի զարգացմանը... Իսկ մյուս ուժերը՝ ՀԱԿ, ՀՅԴ, ԲՀԿ, նրանք բացահայտ իշխանությունների հետ նույն օրակարգով են աշխատում: