Ցեղասպանության հուշարձանը Ջրահարսի հետ կապ չունի

Գյումրու գլխավոր ճարտարապետ Հենրիկ Գասպարյանը պատասխանեց «Ցեղասպանության հուշարձան զուգարանների ֆոնին» մեր հրապարակմանը։ Մենք ներկայացրել ենք, որ Գյումրու քաղաքապետարանը նախատեսում է Ֆրից Սողոյանի «Վերածնունդ» անունով հուշարձանը տեղադրել Խաղաղության օղակի պուրակում, հայտնի Բոշի սադում։ Սակայն գյումրեցիներն անհանգստացած են, քանի որ այն տեղում, որտեղ հուշարձանն է դրվում, անցնում է քաղաքային կոյուղին, իսկ հետևում հասարակաց երկու զուգարաններ կան։«Քաղաքաշինական խորհրդի համաձայնություն կա, և կա նաև քաղաքապետի որոշում դրա մասին, - ասաց ճարտարապետը, - բայց ո՞վ է դժգոհում։ Ես նման բան չեմ լսել, ճիշտն ասած»։ 

- Ճի՞շտ է, որ Մուշուրբան էլ են դնում այդ տեղում, և ստացվում է, որ երեք արձան է տեղադրվում կողք կողքի՝ մուշուրբան, Ջրահարսը և Ցեղասպանության 100-ամյակի հուշարձանը։ ։

- Ոչ, Մուշուրբան այդտեղ չի դրվելու։ Նման առաջարկություն եղել է, Մուշուրբան այստեղ տեղադրելու, բայց դա միանշանակ հանել ենք։ Նախ, սա պուրակ է, և կարող են մի քանի արձաններ լինել։ Վերածնունդ հուշարձանը տեղադրելու համար շատ տեղեր ենք նայել, դրա հեղինակը, գիտեք, Ֆրից Սողոյանն է։ Գտել ենք, որ նպատակահարմար է, որ այդտեղ դրվի։

- Զուգարանների ֆոնի՞ն։

- Պուրակի մեջ կարող է լինել հասարակական զուգարան։ Բայց զուգարանը վերականգնվում է, տեսքի է բերվում, այդպես չի մնալու, որպեսզի խանգարվի դա։ Նոր հուշարձանը «Ջրահարսի» հետ կապ չունի։ Ջրահարսը դրված է ջրավազանի մեջ, դեռևս սովետական շրջանից։ Արձանները մեկը մեկին չեն խանգարում։

- Էդվին Թախմազյանը, ամերիկահայ բիզնեսմեն, այգու նոր տերն է, այնպես չ՞է։

- Նա վարձակալ է։ Ինչ-որ մենք անում ենք, սա գլխավոր ծառուղու մասն է։ Մենք մաքրել ենք այդտեղ, ավելորդ շինությունները քանդել ենք։ Մեր քաղաքացիները որ անցնում են, բոլորը ինձ շնորհավորում են տարածքը տաղավարներից, տնակներից և կրպակներից մաքրելու համար։ Նաև այլ տարածք կա, որ վարձակալներն են իրենց միջոցներով բարեկարգելու, կանաչապատելու, խաղահրապարակներ են տեղադրելու հետո։

- Իսկ ինչ՞ու «Մուշուրբան» հանվեց Սայաթ-նովա փողոցից։

- «Մուշուրբեն» ժամանակավոր էր դրվել, 2013 թվականին, երբ մեր քաղաքը մշակութային մայրաքաղաք էր, այդ միջոցառումների շրջանակում էր դրվել։ Դա հիմնական չէր դրվելու։

- Գյումրու խորհրդանիշ էր, թող մնար։

- Ավելի շատ «Մուշուրբի» համար էինք բողոքներ ստանում, քան թե էս «Վերածնունդի» համար։ Հիմա մենք այնտեղ Սայաթ-Նովայի արձանն ենք դնելու, իսկ թե «Մուշուրբեն» ուր կդնենք, հայտնի չէ։