Որտե՞ղ կկրի պատիժը Պերմյակովը, եւ կլինի՞ բողոքի ցույց Գյումրիում

Որտե՞ղ կկրի պատիժը Պերմյակովը, եւ կլինի՞ բողոքի ցույց Գյումրիում

ԱԺ գյումրեցի պատգամավորներ Սուքիաս Ավետիսյանից եւ Մարտուն Գրիգորյանից հետաքրքրվեցինք, թե ինչ փուլում է ոճրագործության զոհ դարձած Ավետիսյանների գործով մեղադրվող ռուս զինծառայող Վալերի Պերմյակովին պատասխանատվության ենթարկելու գործընթացը։ Հետաքրքրվեցինք նաեւ, թե որքանով են նրանք կապ պահում Ավետիսյանների հարազատների հետ։ Նշենք, որ Պերմյակովն այժմ գտնվում է Հայաստանում, նրա դատավարությունը, որի առաջին դատը կկայանա մոտ ժամանակներս, նույնպես անցկացվելու է Հայաստանում՝ ռուսական զորամասում, իսկ թե պատիժը որտեղ կկրի, դեռ հայտնի չէ։



ՀՀԿ-ական Սուքիաս Ավետիսյանն ասաց, որ գործընթացի վերաբերյալ ինքը տեղեկություններ ստանում է լրատվամիջոցներից։ «Բայց որ դատավարությունը լինելու է հնարավորինս հրապարակային, դա միանշանակ է, որովհետեւ դրա հետ կապված նախնական պայմանավորվածություններ եղել են ռուսական կողմի հետ, եւ իրենք էլ չեն առարկել, որ դատավարությունը լինելու է ՀՀ տարածքում եւ հնարավորինս հրապարակային»,-ասաց նա։ Ավետիսյանը նշեց, որ ինքը գյումրեցիների կողմից նոր բողոքի ալիք բարձրացնելու տեղ չի տեսնում, որովհետեւ բողոք լինում է այն դեպքում, երբ գյումրեցիներին, Ավետիսյանների ընտանիքի հարազատներին այս դեպքի հետ կապված ինչ-որ բան չի բավարարում․ «Եթե հրապարակային դատավարություն է լինելու եւ Գյումրիում է լինելու, ի՞նչ բողոքի ալիքի մասին է խոսքը»։



- Ի՞նչ երաշխիք ունեք, որ մեղավորն արժանի պատիժ կստանա։



- Միանշանակ։ Ես հենց առաջին օրվանից ասել եմ, որ ես չեմ կասկածում, որ նա արժանի պատիժ կստանա, եւ կարծում եմ, որ ամենաբարձր պատիժը կստանա։



- Վերջին դեպքը, որ տեղի ունեցավ ռուսական ռազմաբազայում, երբ ռուս զինվոր սպանվեց, Դուք որեւէ կապ տեսնո՞ւմ եք Ավետիսյանների դեպքի հետ, կարելի՞ է զուգահեռներ անցկացնել դրանց միջեւ։



- Կապ չեմ տեսնում, եթե զուգահեռ ենք տանում, ապա հերթական անգամ պետք է ասենք, որ դեռեւս կարգապահությունը եւ կանոնագրքային հարաբերությունները Ռուսաստանի՝ հատկապես 102-րդ բազայում, այն հիմքերի վրա չէ, որպեսզի բացառեն նման դեպքերը։ Այսինքն՝ իրենք կարգուկանոնի խնդիր ունեն։



- Ավետիսյանների ընտանիքի հարազատների հետ որեւէ կապ պահո՞ւմ եք, հանդիպումներ ունենո՞ւմ եք նրանց հետ՝ իմանալու, թե ինչ խնդիրներ ունեն, ինչ վիճակում են, ինչի կարիք ունեն։



- «Որեւիցե կապ» հասկացությունը հետեւյալն է. քանի որ ես նաեւ Ավետիսյանների գործի հետ կապված հարցերով զբաղվող խորհրդարանական հանձնախմբի անդամ եմ, Գյումրիում հանդիպում ենք ունեցել նրանց հետ եւ ասել ենք, որ եթե ինչ-որ խնդիրներ կլինեն, կնճռոտ հարցեր, որոնք իրենց չեն բավարարի, ապա իրենք կարող են դիմել հանձնախմբի անդամներին, եւ մենք այդ խնդիրները կքննարկենք։ Հիմա իրենք կոնկրետ ոչ մի նման խնդրով չեն դիմել։ Ես, բայց, չեմ կարծում, որ մենք անընդհատ պետք է փորձենք մեր հանդիպումներով էդ մարդկանց վերքը թարմացնել։
Գյումրեցի մեկ այլ պատգամավոր՝ Ավետիսյանների դեպքից հետո գյումրեցիների բողոքի ցույցերին ակտիվորեն մասնակցած նախկին ԲՀԿ-ական Մարտուն Գրիգորյանի մոտ նույնպես Պերմյակովի գործի հետ կապված տեղեկությունները հիմնականում լրատվամիջոցներից են, հետեւաբար, շատ ասելիք չունի։ Պատգամավորը եւս տեղյակ է, որ դատավարությունը լինելու է Հայաստանում, իսկ, ահա, պատիժը կրելու հետ կապված՝ վստահ չէ, քանզի որեւէ մեկից նման վստահեցնող խոսք չի լսել։ Իսկ դատավարության՝ այստեղ անցկացվելու հարցը նա ձեռքբերում է համարում եւ դրական քայլ այս գործընթացում․ «Իսկ պատիժը կրելը… ես կարծում եմ, որ պատիժը, ամեն դեպքում, խստագույնն է լինելու՝ ցմահ, էս պարագայում՝ հիմա թե Հայաստանում կկրի պատիժը, թե Ռուսաստանում, կարծում եմ… էական չէ»։



- Ձե՞զ համար էական չէ, թե՞ առհասարակ։



- Իմ կարծիքով, ես իմ կարծիքն եմ ասում, քանի որ ինքն էդ պատիժը կրելու է, հիմա թե էստեղ է կրելու էդ պատիժը, թե Ռուսաստանում… Իհարկե, ցանկալի էր, որ էստեղ լիներ։



- Բայց գյումրեցիների բողոքը, դժգոհությունը հիմնականում հենց դրա հետ էր կապված, որ, բացի դատավարությունից, նաեւ պատժի կրումը Հայաստանում անցկացվի, քանզի ՌԴ-ում կարող է այլ պայմաններում կրի պատիժը, Հայաստանում՝ բոլորովին այլ։



- Ուրեմն էդ պահանջներին որ նայենք, պահանջները շատ-շատ են։ Պահանջներից մեկն էլ այն է, որ «տվե՛ք՝ մենք էստեղ վառենք, տվե՛ք՝ մենք էստեղ սպանենք…»։ Իսկ օրինական պատժի առումով ես էլ եմ ասում, ես էլ, որպես գյումրեցի, բնականաբար, ցանկություն ունեմ, որ ինքը դատապարտվի եւ պատիժը կրի Հայաստանում, բայց, դե, ցանկությունը մի բան է, հնարավորությունը՝ այլ բան։



- Դուք որեւէ բողոքի ալիք, ցույցեր ենթադրո՞ւմ եք այս առումով, որ գյումրեցիները կարող են նորից փողոց դուրս գալ։



- Չեմ կարող էդ հարցին էս պահին պատասխանել, քանի որ չգիտենք, թե դատավարությունն սկսելուց հետո ինչ ընթացք կունենա։ Եթե ընթացքը բավարարի, նորմալ լինի, իմ կարծիքով՝ դժվար թե խնդիր առաջանա։ Պատժի սահմանումից շատ բան է կախված, թե ինչ պատիժ կտրվի։



- Կապ պահո՞ւմ եք՝ որպես գյումրեցի պատգամավոր, Ավետիսյանների հարազատների հետ, հանդիպումներ ունենո՞ւմ եք նրանց հետ եւ որքանո՞վ եք հետեւողական այս գործընթացում։



- Բնականաբար։ Ես անցած ուրբաթ, թե շաբաթ օրն եմ հանդիպել Ավետիսյանների հարազատների հետ, զրուցել եմ այս խնդիրներով, ինչ հարցեր որ նրանց հետաքրքրել է, ես, հնարավորության սահմաններում, պարզաբանումներ տվել եմ։ Իրենք մեր թաղի բնակիչներն են, եւ ես առաջին օրվանից իրենց կողքին եմ եղել, բայց բոլորս էլ հասկանում ենք, որ էստեղ շատ բան անել կամ շատ էսպես օգուտ տալ էս հարցում բարդ է, դժվար է։



- Օրերս ռուսական այդ 102-րդ ռազմաբազայում տեղի ունեցած դեպքը՝ ռուս զինվորի սպանությունը, Ավետիսյանների դեպքի հետ, ըստ Ձեզ, որեւէ կերպ կապվո՞ւմ է, կամ զուգահեռներ կարելի՞ է անցկացնել դրանց միջեւ։



- Ճիշտն ասած՝ ո՛չ կապվում է, ո՛չ զուգահեռներ կարելի է անցկացնել, որովհետեւ լրիվ այլ բան է։ Սա երեւի զինվորական, տղայական հարթության վրա տեղի ունեցած դեպք է, իսկ էն մինչ օրս անհասկանալի ոճրագործություն է, եւ զուգահեռներ տանել չի կարելի։ Բայց, մյուս կողմից, պետք է ասեմ, որ էդ ռուս զինվորի սպանության դեպքը շուտ բացահայտվեց։



- Իսկ Ավետիսյանների դեպքը բացահայտվա՞ծ եք համարում, բավարարո՞ւմ է Ձեզ այն, ինչ կա այս գործով։



- Դժվարանում եմ պատասխանել, քանի որ դատական պրոցեսները երբ սկսվեն, ավելի շատ ինֆորմացիա կլինի, այսօր ինֆորմացիայի պակասի խնդիր կա։



- Մեր դատախազի խոսքերին, նրա կատարած քայլերին այս գործով վստահություն կա՞ Ձեր կողմից, նրա տղամարդկային խոստումը, որն այդքան շահարկվեց, հետեւողականությունն այս գործում վստահություն ներշնչո՞ւմ են Ձեզ։



- Ես չեմ կարծում, որ Հայաստանում կլինի մեկը, որ հնարավորություն ունենա եւ այս գործի հետ կապված չփորձի անել իր հնարավորություններից ավելին, որպեսզի այս դեպքը նորմալ բացահայտվի, եւ քննությունը նորմալ ընթանա։ Իսկ չվստահելու խնդիրը, էսպես ասեմ, դրված չէ իմ առաջ, կոնկրետ, այսինքն, էդ նախատրամադրվածությունը, որ չվստահեմ դատախազին եւ Քննչական կոմիտեին։ Ես, որպես պատգամավոր, հույս ունեմ, որ թե՛ Քննչական կոմիտեն եւ թե՛ դատախազությունն ամեն ինչ անելու են, որպեսզի օբյեկտիվ քննություն ընթանա, եւ մեր գյումրեցիների պահանջները բավարարվեն։ Սա իմ ցանկությունն է, եւ ես կուզեի էսպես լիներ։



 


Վահե ՄԱԿԱՐՅԱՆ