Դե մարդասպան չի, էլի, մարդ ա․ թիվ 20 դպրոցի տնօրենը՝ թիվ 27 դպրոցի սկանդալային տնօրենի մասին
«Ամեն ինչ էլ մարդու համար է», բայց թիվ 20 դպրոցի տնօրեն Անահիտ Խոսրովյանը Hraparak.am-ի հետ զրույցում չէր ցանկանում խոսել իր կոլեգայի՝ թիվ 27 դպրոցի նորանշանակ տնօրեն Սուսաննա Սարգսյանի մասին։ Նա, հիշեցնենք, խոշոր չափերի չարաշահման համար տնօրենի պաշտոնից ազատվելուց և դատապարտվելուց հետո օրերս նորից ընտրվեց նույն՝ Երևանի թիվ 27 դպրոցի տնօրեն։ Այս հարցը բավականին մեծ աղմուկ բարձրացրեց մամուլում և համացանցում և արժանացավ բուռն քննադատությունների։
-Չխոսենք էդ թեմայով, ի՞նչ կլինի։
-Բայց այդ երևույթը Դուք նորմա՞լ եք գնահատում։
-Չէ, չեմ կարող ոչինչ ասել ու չեմ ուզում պատասխան տալ, միգուցե այսուհետ այդ տիկին Սուսաննան ավելի զգոն կաշխատի, հասկացավ իր սխալները, այսուհետ չի կրկնի, ի՞նչ կա, մարդ ա․․․ հետևողական պետք է լինել ընդամենը։ Դե մարդասպան չի, էլի, մարդ ա․․․
-Իսկ իր ուսուցչական անձնակազմի մասին ի՞նչ կասեք, երբ աղմկում էին, խոչընդոտում լրագրողների աշխատանքը։ Սա նորմա՞լ է, որ նրանք սերունդ պետք է կրթեն, ի՞նչ պետք է սովորեն երեխաները նրանցից։
-Գիտե՞ք, միգուցե էդ միջադեպերից հոգնել էին արդեն, միգուցե էդ իրար չհասկանալուց կարող ա կոլեկտիվն էլ էր հոգնած։
-Դուք կպահե՞իք նմանատիպ ուսուցիչներ Ձեր դպրոցում։
-Դե, էդ պահին մարդը էդպես ա․․․ հո դասարանում չի՞ եղել, ի վերջո, դասարանում ինքը էդպես վարքագիծ չի ցուցաբերի, էլի։ Էդ միջանցքում էր, դպրոցում էլ աշակերտ չի եղել, արձակուրդ ա եղել, մի քիչ ազատություն են տվել իրենց։
Վահե ՄԱԿԱՐՅԱՆ
Կարծիքներ