Հայտնի գործիչները` ոճաբանի աչքով. Անի Զախարյան

Hraparak.am-ի «Հայտնի գործիչները` ոճաբանի աչքով» շարքի շրջանակներում շարունակում ենք վերլուծել նրանց իմիջը. թե ինչ են հագնում եւ ինչու, ինչ չպետք է հագնեն, ինչպես դիմահարդարվեն, ինչ աքսեսուարներ կրեն։ Շարքի նախորդ երեք «զոհերը» եղել են Սփյուռքի նախարար Հրանուշ Հակոբյանը, Մշակույթի նախարար Հասմիկ Պողոսյանը, ԱԺ ՕԵԿ խմբակցության ղեկավար Հեղինե Բիշարյանը, ԱԺ պատգամավոր Զարուհի Փոստանջյանը , ԱԺ նախագահի տեղակալ Հերմինե Նաղդալյանը, ԱԺ պատգամավոր Նաիրա Զոհրաբյանը, ՀՀԿ խմբակցության պատգամավոր Նաիրա Կարապետյանը։ Այս անգամ մենք անդրադարձել ենք «Նոր քաղաքական մշակույթ» կուսակցության ղեկավար, սկանդալային իրավիճակներում մշտապես հայտնվող, բոլորին հայտնի Անի Զախարյանին: Դիզայներ-ոճաբան Նիակրիսին նախապես տրամադրել ենք նրա տարբեր տարիներին արված մոտ 20 լուսանկար: Եւ ահա ներկայացնում ենք արդյունքը։

Ոճը անթույլատրելի է. չի օգտվում ոճաբանի ծառայություններից

Քաղաքականության մեջ էպատաժային, առանձնացող արտաքին ունենալը միանշանական պլյուս է, այդկերպ կարելի է շատ հեշտ հիշվել և ընտրողների ինչ որ խավի ձայներ ստանալ: Բայց ինչ վերաբերում է տիկին Զախարյանին՝ էպատաժը նրա կերպարում հասնում է անճաշակության գրոտեսկի բարձրագույն աստիճանին: Տիկին Զախարյանը փորձում է բոլոր թույլատրելի և անթույլատրելի միջոցներով ընդգծել իր մարմինը, իհարկե գեղեցիկ կազմվածքը ցանկացած կնոջ զենքն է, բայց այդ զենքը չպետք է դառնա զանգվածային ոչնչացման զենք: Ես վստահ եմ, որ Անի Զախարյանը երբևէ չի օգտվել ոճաբանի ծառայություններից, և կարծում եմ՝ նաև դիմահարդարի: Անիի ոճում սխալներն այնքան շատ են և տեսանելի, որ չարժե անգամ դրանք վերծանել:

Ինչ չանել

Միանշանակ նման մարմին ունենալու դեպքում կարելի է բավականին համարձակ և սեքսուալ հագնվել, շատ լավ օրինակ է Ֆրանսիայի նախկին առաջին տիկին Կառլա Բրունին: Ես խորհուրդ եմ տալիս ընդմիշտ հրաժարվել բարձր երկարաճիտ կոշիկներից, ծնկից ավելի քան 10 սմ կարճ կիսաշրջազգեստներից, միանշանակ չկրել ջինսեր, որոնք ցուցադրում են բաց որովայնը, և իհարկե քաղաքականության մեջ հարիր չէ թափանցիկ կամ կիսաթափանցիկ հագուստը:

Սխալ դիմահարդարում

Տիկին Զախարյանին շատ են սազում բաց գույները՝ սպիտակ, կաթնագույն, բաց վարդագույն, արժի հրաժարվել դեմքին մոտ սև գույնը կրելուց, քանի որ սև գույնը միշտ տարիք է ավելացնում և հոգնած տեսք է հաղորդում: Ինչ վերաբերում է դիմահարդարմանը, ասում են՝ դեմքի դեմքը հոնքերն են, և շատ հաճախ հոնքերի սխալ ձևը, հաստությունը կնոջը զայրացած կամ զավեշտալի տեսք են տալիս, հիմա արդիական են հաստ, գրեթե բնական հոնքերը: Կարծում եմ՝ Անիի արտաքինը կշահի, եթե փոխվի հոնքերի հաստությունը, ձևը: Մուգ շրթներկը ևս չի գեղեցկացնում տիկին Զախարյանին, այլ ընդգծում է հայկական մեծ քիթը:

Անխնամ տեսք ունի

Ընդհանուր առմամբ՝ ամբողջական կերպարը էժան և անխնամ է թվում, և եթե փորձենք դատել առաջին հայացքից, ապա կարող ենք վստահ ասել, որ այս կինը քաղաքական գործիչ չէ: Առանց պրոֆեսիոնալ միջամտության հնարավոր չի լինի շտկել իրավիճակը:
Խորհուրդ չեմ տալիս հրաժարվել սեքսուալ, գրավիչ ոճից, բայց ցանկացած կնոջ և հատկապես քաղաքական գործչի կերպարում պետք է ակնհայտ լինի խնամվածությունը, խոսքը իհարկե «ֆենած» մազերի մասին չէ. ամենահեշտ միջոցը թանկ և տպավորիչ լինելու մեկ կոմպլեկտում 3-ից ոչ ավելի գույն համադրելն է: Ամեն դեպքում հետաքրքիր էր Անիի նկարները զննելը, չնայած որ ոչ մի կերպ չէի հավատում աչքերիս:

Պատրաստեց՝ Աննա Պապիկյանը