Ստախոսություն Gallup-ի անունից, Կրեմլի կողմի՞ց

Երեկ Հայաստանի բոլոր լրատվամիջոցները տարածել էին առաջիկա խորհրդարանական ընտրություններին մասնակցող ուժերի վարկանիշի վերաբերյալ սոցիոլոգիական հարցման արդյունքներ, վերնագրերում նշելով Gallup անունը եւ շարքային ընթերցողին շփոթության մեջ գցելով, թե հետազոտությունը կարող է կապ ունենալ ԱՄՆ հանրահայտ Gallup սոցիոլոգիական հետազոտությունների կենտրոնի հետ:

Մինչդեռ չկա նման ոչ մի կապ: Gallup-ի անվան հետ ստորեւ բացահայտվող ձեռնածություններով սեփական MPG ՍՊԸ-ի անունը ասոցացրած, եւ MPG-ի ինքնահնար թվերը լրատվամիջոցներին ներկայացրած անձը, դատելով լուսանկարից Արամ Նավասարդյան անուն-ազգանվամբ քաղաքացին է, որը չունի ոչ մի կրթություն (գոնե իր հանրայնացված կենսագրությունում կրթության մասին նշված չէ), առավել եւս սոցիոլոգիայի հետ թեկուզ ամենահեռավոր առնչություն:

Սույն քաղաքացին իր նման, անհայտ կրթությամբ մեկ այլ անձի` Նարինե Մելիքյանի եւ Երեւանի ժողտնտեսության ինստիտուտի շրջանավարտ Դավիթ Դաբաղյանի հետ 2010-ին կամ 11-ին հիմնադրել եւ Երեւանի Բաղրամյան 2 հասցեում գրանցել է MPG (Marketing Professional Group) կոչվող ՍՊԸ: Նշյալ երեք անձինք Հայաստանի քաղաքացի են, թե ոչ` հայտնի չէ, փոխարենը հայտնի է, որ նրանք ՌԴ «PR Россия» եւ «Маркетолог» կոչվող կազմակերպությունների աշխատակից-գործընկերներ են: Բացի վերոթվարկյալ երկու անհայտ կրթությամբ եւ մեկ ժողինստիտուտի շրջանավարտ հիմնադիրներից MPG ՍՊԸ-ին աշխատակցում են եւս երեք հոգի` մեկ կիրառական մաթեմատիկայի մասնագետ, մեկ կոոպերատիվ համալսարան ավարտած բնապահպան եւ մեկ կրթության մասին տվյալ չնշող շինարար:

Ահա սոցիոլոգիայի հետ «ամենասերտ կապեր» ունեցող շառլատանների այս խումբն էլ թվեր է նկարում եւ հայտարարում ինչի մասին պատահի, միայն թե դա ՌԴ-ի շահերից բխի: Այս խմբակը մեկ տարի առաջ էլ` 2015-ի վերջերին Հայաստանի միջազգային վարկի հետ էր փորձել խաղալ, սոցհարցման արդյունք տարածելով, իբրեւ ՌԴ նախագահ Պուտինը Հայաստանում 79% վարկանիշ կամ համակրողներ ունի: Դա այն դեպքում, երբ ամերիկյան Gallup-ի համաշխարհային հարցախույզներից մեկի պաշտոնական տվյալներով, դեռ տարիներ առաջ, երբ ոչ 2016-ի ապրիլյան էսկալացիան էր եղել ղարաբաղա-ադրբեջանական սահմանին, ոչ էլ Գյումրիում ռուս Պերմյակովի իրականացրած սպանդը, նույնիսկ այդ ժամանակ ՌԴ-ին Հայաստանի բարեկամ համարող եւ համակրող հայաստանցիների թիվը 25%-ից ցածր էր:

Առանձնապես զարմանալի չէ, որ MPG ՍՊԸ-ի վեցհոգանոց խմբակի նոր հարցախույզով էլ այժմ ՀՀԿ-ն 22% վարկանիշ ունի, իսկ իր գոյությամբ այդ ՀՀԿ-ից կախված ու պահվող վարչապետ Կարեն Կարապետյանը` հանկարծ` 81%: Երեւում է MPG-ի ինքնակոչները ոչ միայն սոցիոլոգիայի հետ ամենահեռավոր առնչություն չունեն, ոչ միայն գերակշռող մասով որեւէ կանոնավոր կրթություն չունեն, այլեւ գիտակցության հետ խնդիր ունեն` ընդհանուրի եւ մասի միջեւ հարաբերակցություն չպատկերացնելու աստիճան:
Վերջապես, հանգուցային կետը` MPG-ի խեղկատակները Gallup անվան հետ ի՞նչ կապ ունեն: Եթե խոսքը 1935-ին Ջորջ Գելափի կողմից հիմնադրված ամերիկյան սոցիոլոգիական հետազոտություններով կենտրոնի մասին է, ապա MPG-ն դրա հետ չունի ոչ մի կապ, նույնիսկ առնչություն` ոչ ուղղակի, ոչ միջնորդավորված: MPG-ի շառլատանները կապ ունեն Gallup բրենդը գործածելու իրավունք ձեռք բերած WIN/Gallup կամ WIN/GIA կոչվող կառույցի հետ, որը 2010-ին հիմնադրված բիզնես կոնգլոմերացիա է: Դա աշխարհի 60-70 երկրներից ամենատարբեր ՀԿ-ներ, ՀՁ-ներ, ՍՊԸ-ներ ներառող մի խառնակույտ է, որոնց միավորողը թերեւս Gallup-անվանը առնչվելու գայթակղությունն է եւ դրանով հասարակական մանիպուլյացիաներ կատարելու շահը: Հայաստանից WIN/GIA-ին անդամակցողը MPG ՍՊԸ-ն է:

Լուսինե ՊԵՏՐՈՍՅԱՆ