Արտահերթ ընտրությունների հարցն օրակարգից դուրս չի եկել

Մենք երեկ գրել էինք, որ «Իմ քայլում» եղել են պատգամավորներ, որոնք արտահայտվել են արտահերթ ընտրություններ անցկացնելու օգտին։ Նրանցից մեկն էլ Տաթեւիկ Հայրապետյանն է։ Մեր զրույցը պատգամավորի հետ։

- Մենք գիտենք, որ Դուք եւ մի քանի հոգի պնդել եք, որ պետք է ԱԺ արտահերթ ընտրություններ անցկացնել, կասե՞ք՝ ինչո՞ւ եք այդպես կարծում։

- Ես կարծում եմ, որ արտահերթ ընտրությունները ստեղծված իրավիճակից դուրս գալու լավագույն միջոցն են։ Լսել եմ նաեւ գործընկերներիս հիմնավորումները, կարծում եմ՝ որոշումը հետաձգվել է, եւ ճանապարհային քարտեզից հետո արդեն քննարկումներ կծավալվեն։ Ուստի ես համաձայն չեմ, թե արտահերթ ընտրությունների հարցն օրակարգից դուրս է եկել։

- Այդ դեպքում ինչո՞ւ հայտարարվեց, որ չկա հանրային պահանջ, եւ ընտրություններ չեն լինի։

- Եթե չեմ սխալվում՝ խմբակցության ղեկավարն էլ է երեկ այդ մասին խոսել, որ դրան կանդրադառնանք մեր ճանապարհային քարտեզից հետո։

- Խմբակցության հայտարարության մեջ հղում է արվում հանրությանը, որ չկա լայն շերտերի պահանջ, որ ընտրություններ անցկացվեն, ձեր դիրքորոշումը, որ այս իրավիճակից դուրս գալու լավագույն միջոցը ընտրություններն են, ինչի՞ վրա է հիմնված, էլի հանրության հետ շփումների՞։

- Ես՝ ինքս, իմ դիրքորոշումն ունեմ՝ վերլուծելով իրավիճակը, բնականաբար, նաեւ խոսել եմ տարբեր շերտերի ներկայացուցիչների հետ։ Մարդիկ կան, որ կողմ են, մարդիկ կան, որ չեն տեսնում անհրաժեշտություն։ Կարծիքները տարբեր են։ Իհարկե, ամեն մարդ նաեւ արտահայտում է այն շրջապատի կարծիքը, որոնց հետ զրուցում է, քննարկում է անում։

- Փաստորեն, Դուք այն եզակիներից եք, որ նորմալ շրջապատ ունեք, ի տարբերություն ձեր մյուս գործընկերների, որոնց ասելով՝ հանրությունից ազդակներ են ստացել, որ ոչինչ էլ չի եղել, ուղղակի թավիշն է շատ, պետք է թավիշից հրաժարվել։

- Ես այդպիսի գնահատական չէի տա, բայց մարդկանց կարծիքները, իսկապես, տարբերվում են։ Բազմաթիվ մարդիկ նշում են, որ հիմա արտահերթ ընտրությունների պահը չէ։ Ասում են, որ կան կարեւորագույն խնդիրներ, առանց որոնց լուծելու անիմաստ է խոսել քարոզարշավի մեջ ներքաշվելու մասին, այս պահի դրությամբ լուծումներ չի տալիս ստեղծված իրավիճակին։ Եվ ես չեմ բացառում, որ իրենք ավելի ճիշտ են, ես սխալվում եմ, դրա համար եմ ասում՝ ամեն մեկն իր դիրքորոշումն ունի։

 - Ձեր ընդդիմադիր գործընկերները արտահերթ չլինելու ձեր հայտարարությունից հետո կարծիքներ հայտնեցին, որ իշխանությունը, փակելով սահմանադրական լուծումների ուղին, ճանապարհ է բացում հակասահմանադրական ուղու առջեւ։ Կա՞ մտահոգություն, որ այս որոշումն ավելի վտանգավոր է եւ անկայուն իրավիճակի կհանգեցնի։

- Ես իմ ընդդիմադիր գործընկերներին մի բան կասեմ՝ եթե իրենք տեսնում էին սա խնդրի լուծման ճանապարհ, իրենք պետք է ակտիվորեն պաշտպանեին այդ առաջարկը, որը հնչել էր վարչապետի կողմից, եւ իրենք եւս օժանդակեին, որ երկիրը գնա այդ ճանապարհով։ Ցավոք սրտի, այդ դրական արձագանքը մենք չենք ունեցել։ Կարծում եմ՝ դա էլ է պատճառներից մեկը, որ իշխանությունը միայնակ չգնաց արտահերթի։ Եթե բոլորը տեսնում են՝ դա է լուծում, եկեք բոլորով, հատկապես խորհրդարանական ուժերը, որոշում կայացնենք եւ գնանք ընտրությունների։

- Իրենք իրենց բացատրությունն ունեն, բայց, մյուս կողմից, երկրում միայն ընդդիմադիր ու իշխանական ուժերին ձայն տվող քաղաքացիներ չեն ապրում։ 

- Այո, բայց քաղաքացիների մեծ մասը ձայն է տվել այս ուժերին։

- Ձեր թիմում իսկապե՞ս կարծում են, որ ոչինչ էլ չի եղել։ Եվ այն, որ փողոցն այսօր լիքը չէ, չե՞ն կարծում, որ հազարավոր քաղաքացիներ սգի մեջ են, տուն են կորցրել, ու այդ մարդիկ պատրաստ են ամենավատ սցենարին։ Վերջին օրերին լսեցինք, թե ինչ սպառնալից կոչեր են հնչում։ Իմքայլական պատգամավորները չե՞ն վախենում, որ մի օր կարող են դատաստանի ենթարկվել։

- Ես անձնապես վախենալու խնդիր չունեմ, բայց կարծում եմ՝ պետք է զերծ մնալ նման գործողություններից։ Եթե մենք ունենք սահմանադրական ճանապարհ, կարելի է ընտրել այդ ճանապարհը եւ փորձել հասնել խնդրի լուծմանը։ Ի վերջո, անգամ այն ընդդիմությունը, որ հանրահավաքներ էր կազմակերպում, չողջունեց արտահերթ ընտրությունների գաղափարը։ Այն պարագայում, երբ իշխանություններն ապացուցել են, որ իրենք ունակ են անցկացնելու ազատ, թափանցիկ ընտրություններ, եւ եթե դրական լիներ, հստակ կանցկացվեին։

- Բայց որոշ ուժեր չբացառեցին արտահերթին իրենց մասնակցությունը, Ռոբերտ Քոչարյանն անգամ սպառնաց, որ «կկրի»։

- Եթե ես չեմ սխալվում, Ռոբերտ Քոչարյանը չէր հանրահավաք կազմակերպում․․․ Ամեն դեպքում, եթե անգամ եղել է, ապա թեկնածուն Վազգեն Մանուկյանն է, որը չի ողջունում։

- Նիկոլ Փաշինյանի հրապարակած ճանապարհային քարտեզի ժամկետը լրանում է հունիսին, հնարավո՞ր է, որ այդ ժամանակ էլ արտահերթի որոշում չկայացվի, այդ պարագայում ինչպիսի՞ն կլինի Ձեր դիրքորոշումը։

- Սպասենք, ժամանակը ցույց կտա։ Ես իմ որոշումը կկայացնեմ։ Մեր առջեւ խնդիրներ են դրված, որոնք պարտավոր ենք իրագործել եւ հաշվետու լինել քաղաքացուն, դրանից հետո ինքը կորոշի՝ ինչ ճանապարհով պետք է գնալ, եւ իր դիրքորոշումը կարտահայտի թե՛ ընդդիմադիր խմբակցությունների, թե՛ տարբեր այլ միջոցների։ Միգուցե ասեն՝ ոչ, բավարարում է մեզ, խնդիրներին լուծում է տրվում, թողեք հանգստանանք, գնանք մեր ճանապարհով։ Տարածաշրջանում էլ իրավիճակը պետք է  հանգիստ լինի, որ կարողանանք գնալ քարոզարշավի, ընտրությունների։