Ռոմանոս Պետրոսյանի ու Կոտայքի մարզպետ Ահարոն Սահակյանի հարաբերությունները խիստ սրվել են

Մեր տեղեկություններով՝ վերջին շրջանում լարվել են Կոտայքի մարզպետ Ահարոն Սահակյանի եւ ՊՎԾ պետ Ռոմանոս Պետրոսյանի հարաբերությունները: Ռոմանոս Պետրոսյանը մարզպետ աշխատած ժամանակահատվածում մարզպետարանի ենթակայության տակ գտնվող հիմնարկ ձեռնարկություններում աշխատանքի էր տեղավորել իր բարեկամներին, ընկերներին, հեղափոխության ժամանակ իրենց հետ քայլածներին: Լարվածությունն այնպես է սրվել, որ մարզպետը որոշել է ազատվել Ռոմանոսի կադրերից, գուցե՝ հակառակը․ սկսել է ազատել Ռոմանոսի կադրերին, դրա համար են հարաբերությունները սրվել։ Ինչեւէ՝ սկսել է հենց Կոտայք ՋՕԸ-ից:

Մենք արդեն գրել էինք, որ «Կոտայք» ջրօգտագործողների ընկերությունում տնօրենի Ժ/Պ են ընտրել, որին միջամտում էր Ռոմանոսի եղբայրը՝ Ռուբեն Պետրոսյանը, որպեսզի անկացնի իր թեկնածուին, սակայն ընտրության արդյունքնում ձայների առավելությամբ ընտրվել է Կամարիս համայնքի նախկին ղեկավար Գոռ Հակոբյանը: Գոռ Հակոբյանը, Ջրային կոմիտեի եւ Կոտայքի մարզպետարանի ներկայացուցիչները այցելել էին Կոտայքի ՋՕԸ, իրավիճակը քննարկել, եւ Գոռ Հակոբյանին ներկայացրել՝ տնօրենի ժամանակավոր պաշտոնակատարի պաշտոնին: Ռոմանոսի եղբորը՝ Ռուբեն Պետրոսյանին, այս ամենը զայրացրել էր: Նա նախկին տնօրեն Վլադիկ Աբրոյանի հետ պահում են կնիքը, փակում են տնօրենի աշխատասենյակի դուռը, եւ հեռանում ՋՕԸ-ից: Որոշ ժամանակ անց վերադառնում են եւ «դեբոշ» սարքում հենց ՋՕԸ-ի բակում , թե ով է իրավունք տվել Գոռ Հակոբյանին ներկայացնելու տնօրենի ժամանակավոր պաշտոնակատար: Իրավիճակն այն աստիճանի է լարվում, որ ստիպված ոստիկաններ են ժամանում: 

Այս առնչութամբ զրուցեցինք Կոտայքի մարզպետ Ահարոն Սահակյանի հետ:

-Պարո՛ն Սահակյան, «Կոտայք» ՋՕԸ-ի տնօրենի ընտրության հետ Դուք ի՞նչ առնչություն ունեք: 

- ՋՕԸ-ի տնօրենի հետ կապված այնքանով առնչություն ունեմ, որ որպես մարզպետ այդ հիմնարկից բավականին լուրջ բողոքներ կային բնակիչներից: Վերջին 1 տարում, որպես մարզպետ եմ առնչվել, դրանից առաջ էլ, որպես համայնքի ղեկավար առնչվել եմ Գառնի տեղամասի հետ կապված խնդիրներին, որոնք լուծում չեն ստացել: Հետո կողքից տեղեկանում եմ, որ «Կոտայք» ՋՕԸ-ում ուզում են խորհրդի նիստ անել:

-Խորհրդի նիստը Ձեզանից գաղտնի են պահե՞լ:

- Այո, գաղտնի են արել, ես իմացել եմ Ջրային կոմիտեից, ու խորհրդի անդամների այն մարդկանցից, ովքեր որ սրտացավ են եղել այդ հիմնարկի համար, տեղեկացրել են, որ նման բան է կազմակերպվում, եւ ես էլ առաջարկել եմ խորհրդի անդամներից մի քանիսին իրենք իրենց թեկնածուն առաջարկեն: Ես, անկեղծ ասում եմ, միջամտել եմ, խորհուրդ եմ տվել, որ մարդիկ ընտրություն անեն, թե ո՞րն է ճիշտը: Գյուղացու հետ աշխատած անձնավորությունը կարծում եմ շատ մեծ փորձ ունի այդ ոլորտում, քան՝ կապի ծառայություններ մատուցող ընկերության աշխատակիցը: Ժամանակավոր պաշտոնակատար արդեն նշանակվել է՝ Գոռ Հակոբյանը, հիմա այնտեղ ինչ որ խոչընդոտում են այդ պրոցեսին: Որքանով ես տեղյակ եմ, տնօրենի աշխատասենյակի դուռը փակ է, կնիքը՝ պահարանում է: Գոռ Հակոբյանը թղթերը մուտք է արել պետռեգիստր, կարծում եմ երկուշաբթի գրանցում կստանա, եւ կանցնի աշխատանքի:

-Տեղյա՞կ եք, որ ծեծկռտուք եղել է «Կոտայք» ՋՕԸ-ում:

- Ծեծկռտուքը դուք եք ասում, բայց նման բան ես էլ եմ լսել: Ինձ տեղեկություն հասավ, որ իրավիճակը լարված է, ես ոստիկաններ եմ ուղարկել այդտեղ, կոնֆլիկտային վիճակը չդառնա լուրջ խնդիր:

-Վերջերս Ձեր եւ Ռոմանոս Պետրոսյանի հարաբերությունները լարվել են, ի՞նչն է պատճառը:

- Ոչ մի լարվածություն չկա, հարաբերություն էլ չկա, որպես այդպիսին:

-Մեզ պատմում են, որ Ռոմանոսի Պետրոսյանը՝ թե՛ մարզպետ աշխատած ժամանակ, թե՛ ներկայիս պաշտոնում, իր բարեկամներին, ծանոթներին, ընկերներին տեղավորում է աշխատանքի, ինչը Ձեր սրտով չի:

-Ես առանց անուններ տալու ուղղակի ուղիղ ասում եմ, ես ընդհանրապես ծանոթ, բարեկամ, ընկեր այդ սկզբունքներով երբեւիցէ չեմ աշխատել, ու չեմ էլ աշխատելու: Իսկ թե նախկինում ով, ինչ է արել՝ չեմ ուզում խոսել այդ մասին: Էլի եմ ասում, քանի որ ես նման մեթոդներով չեմ աշխատել ու աշխատում, բնականաբար, եթե նմանատիպ իրավիճակ եղել է ուրիշների աշխատանքի հետեւանքով՝ միանշանակ իմ ժամանակ շտկվելու են դրանք, թե ով, ում, որտեղ է նշանակել ու ճիշտ է նշանակել, թե չի նշանակել, դա չեմ ուզում քննարկել: Ես ուզում եմ ասել, որ իմ աշխատած ժամանակահատվածում ես ճիշտ նշանակումներ եմ անում, ու առաջնահերթությունը տալիս եմ մարդու պրոֆեսիոնալիզմին, ոչ թե բարեկամներին, ծանոթներին կամ ընկերներին: 

ՀԳ Նշենք, որ այս ընկերությունում վերջին տարիներին պաշտոններ են ստացել Ռոմանոս Պետրոսյանի հարազատներն ու ընկերները: Այսպես՝ Կոտայքի ՋՕԸ-ի վարչխորհրդի նախագահը Վահրամ Սեդրակյանն է, ով Ռոմանոս Պետրոսյանի թիմակիցն է, այս կառույցին «շունչ ու հոգի» տվողը, նաեւ ներկա պահին աշխատում է շրջակա միջավայրի նախարարությունում: Նա է տնօրեններ նշանակում, կամ ազատում: Ով 2019 թ․ ապրիլին վարչխորհրդի նախագահ է ընտրվել օրենքի խախտումով՝ օրենքը սահմանում է, որ ՋՕԸ-ի վարչխորհրդի անդամը պարտադիր պետք է լինի կամ ջրօգտագործող, կամ էլ՝ հողի սեփականատեր, իսկ Վահրամն այդ ժամանակ ո՛չ ջրօգտագործող է եղել, ոչ էլ սեփական հող է ունեցել, փոխարենն՝ ունեցել է Ռոմանոսի դաբրոն՝ նշանակվելու ՋՕԸ-ի վարչխորհրդի նախագահ: 2021 թվականին Սեդրակյանի հետ առաջին անգամ կնքվում է ջրօգտագործողի պայմանագիր, որպեսզի համապատասխանի կանոնակարգին: Վահրամի քավորությամբ՝ Պավել Ցուգունյանը, ով Ռոմանոս Պետրոսյանի կնոջ քեռու որդին է, աշխատել է «Կոտայք» ՋՕԸ-ի տնօրեն: Գուրգեն Օսիպյանը Պավել Ցուգունյանի մորաքրոջ տղան է։ Նա 2019-ին ընդունվել է «Կոտայք» ՋՕԸ՝ որպես «Նաիրի» տեղամասի պետի տեղակալ, իսկ 2020-ի հունվարին դարձել տեղամասի պետ, չունենալով բարձրագույն կրթություն: «Ջրվեժ-Ձորաղբյուր» տեղամասի պետը Անդրանիկ Խաչատուրյանն է՝ Ռոմանոսի ընկերոջ եղբայրը: Նշանակվել է Արարատ Աղաբեկյանի փոխարեն, ով Ցուգունյանի քրոջ ամուսինն է եւ մեզ հասած տեղեկություններով՝ նա եւս ո՛չ բարձրագույն կրթություն ունի, ո՛չ էլ աշխատանքային փորձ, որը պահանջվում է ՋՕԸ-ի տեղամասի պետ աշխատելու համար: Ռոմանոս Պետրոսյանի թիմակիցներից՝ «Կոտայք» ՋՕԸ-ում է հաստատվել նաև ՔՊ խմբակցության ղեկավար Հայկ Կոնջորյանի եղբայրը՝ Ավետ Կոնջորյանը։ Նա 2021-ին նշանակվել է «Կոտայք» ՋՕԸ-ի վերահսկողության բաժնի պետի տեղակալ, իսկ հիմա զբաղեցնում է պետի պաշտոնը: Նշենք, որ դատալեքսից պարզեցինք, որ 2010 թվականին հարուցված քրեական գործի շրջանակններում Ավետ Կոնջորյանը մեղադրվում էր բնակարանների առուվաճառքով, խաբեությամբ ուրիշի գույքին տիրանալու եւ քաղաքացու վստահությունը չարաշահելով 9000 դոլար հափշտակելու համար: Վլադիկ Աբրոյանը, ով Գնել Սանոսյանի ընկերն է, «Կոտայք» ՋՕԸ-ում աշխատանքի է ընդունվել 2020 թվականին` որպես իրացման բաժնի պետ։ Սեպտեմբերին Վլադիկ Աբրոյանը նշանակվել է տնօրենի ժ/պ, իսկ 2021 թվականի ամռանն ընտրվել է տնօրեն՝ լինելով մրցույթին մասնակցած միակ թեկնածուն։