Փաշինյանին շտապ դաշնակիցնե՞ր են պետք
«Հայկական ժամանակ» թերթում օրերս մի բավականին սթափ ու սթափեցնող վերլուծություն կարդացի, որտեղ այսպիսի տողեր կային. «Հեղափոխությունն իր ամենադժվար օրերն է ապրում, եւ իշխանություններին միայն սոցկայքերում աջակցելը քիչ է: Անհրաժեշտ է իրական աջակցություն, եւ այդ աջակցությունը կարող է ցույց տալ միայն ժողովուրդը: Որովհետեւ հեղափոխության միակ շահառուն ժողովուրդն է: Այլ շահառուներ չկան, ու հենց դա է, որ բարդացնում է իրավիճակը»: Առաջին պահին ես այս ամենը ընկալեցի որպես կոչ վարչապետին. «Գնա, Նիկոլ Փաշինյան, մի հատ էլ արի, որովհետև ֆեյսբուքյան ռեսուրսը պրծնելու վրա է, իսկ ժողովուրդն էլ, կարծես, չգիտի ինչ անել»: Հետո հանկարծ հարց առաջացավ` իսկ ինչո՞ւ են հեղափոխության առաջնորդներն այս «գյոզալ» հեղափոխությունը հասցրել «ամենադժվար օրերի»: Իմ իմանալով` քանի դեռ ԱԺ ընտրություններ տեղի չէին ունեցել, նման հոդվածներ չէին գրում: Հիմա ստացվում է, որ ԱԺ ընտրություններից հետո, երբ նա 88 պատգամավոր տարավ խորհրդարան, ամեն ինչ կտրուկ վատացավ: Ինչ-որ չեմ կարողանում հասկանալ, թե ինչպես է դա հնարավոր:
Հոդվածի հեղինակը կարծում է, որ հեղափոխության համար այս ծանր օրերից իշխանություններին կարող է հանել միայն ժողովուրդը, որն ըստ նրա` հեղափոխության միակ շահառուն է: Մի քիչ անհավատալի բան է ասում շահառուի մասով, բայց մենք համամիտ ենք հեղինակի այն մտքին, որ նման դեպքերում, այսինքն, երբ ժողովրդական իշխանությունները հայտնվում են չնախատեսված ք..-ի մեջ, նրանց փրկության հույսը միշտ մնում է ժողովուրդը: Ամեն ինչ, սակայն, կախված է այն բանից` կկանգնի՞ արդյոք ժողովուրդը ևս մեկ անգամ նույն հեղափոխության կողքին: Սա շատ նման է նույն գետը երկու անգամ մտնելուն, ինչը հազիվ թե ժողովրդի սրտով լինի:
Խնդրո առարկա հոդվածում հետաքրքրական մասեր շատ կան: Ի՞նչ արժե, օրինակ, այս խոստովանությունը. «… ինչպես մեկ տարի առաջ, այնպես էլ հիմա, Նիկոլ Փաշինյանը քաղաքական դաշտում ոչ մի իրական դաշնակից չունի»: Լա՞մ, թե՞ խնդամ… Վախ, վախ, վախ, Փաշինյանը քաղաքական դաշտում դաշնակից չունի: 2017թ. խորհրդարանական ընտրություններում դաշնակից(ներ) չունե՞ր: Ինչ եղան այդ դաշնակիցները 2018-ին, փախա՞ն, ինչո՞ւ:
Միայն չասեք, որ Փաշինյանը «խռիկ չտվեց» նրանց, այլ իրենց կամքով հեռացան: Բա հիմա ո՞նց անենք, երբ Փաշինյանն արդեն վարչապետ է, այն էլ սուպեր, ու նրան, հնարավոր է, ոչ մի դաշնակից էլ պետք չէ: Դաշնակցելն, ինչ է, պարտադրա՞նք, որ վերցնես ու վարչապետին պարտադրես քեզ հետ դաշնակցել: Մյուս կողմից էլ` մի մոռացեք, որ 2018թ. հոկտեմբերի 2-ի դրությամբ Փաշինյանը դաշնակիցներ ուներ, բայց, պահի ազդեցության տակ բռնեց և հենց փողոցում ստորագրեց այդ դաշնակիցներից հրաժարվելու հրամանագրերը:
Հետևյալ պարբերություններում ևս հոդվածագիրը չի դադարում մեզ զարմացնելուց: Նա ուղղակի հանճարեղ մտքերի տարափ է տեղում ընթերցողի գլխին, վերջինիս թույլ չտալով ուշքի գալ. «Դրան (դաշնակից չունենալուն, Էդ.Ա.) գումարվել են նաեւ հետեւյալ գործոնները: Առաջին՝ Ռուսաստանում այդպես էլ չհամակերպվեցին այն մտքի հետ, որ ԵԱՏՄ անդամ երկրներից մեկում կարող է հեղափոխություն տեղի ունենալ, որի արդյունքում այդ երկիրը կսկսի շարժվել սեփական ներքաղաքական օրակարգով: Ու քանի որ Հայաստանում ավանդաբար մեծ թիվ են կազմում նրանք, ովքեր երկրի ապագան տեսնում են միայն Ռուսաստանի «ֆորպոստի» կարգավիճակում, նրանք որսացին Ռուսաստանից եկող ազդակները եւ կտրուկ ակտիվացրին իրենց գործունեությունը:
Հասկանայի է՝ դա ներկայացնելով որպես մտահոգություն պետության անվտանգությամբ (թեեւ բուն նպատակն այդ հարցերը շահարկելով ռեւանշի հասնելն է): Երկրորդ՝ Արեւմուտքն էլ իր հերթին տասնամյակներ շարունակ տարբեր մեխանիզմներով փորձում էր ազդել մեր հանրային գիտակցության վրա եւ հասարակության մեջ այնպիսի արժեհամակարգ ձեւավորել, որն ի վերջո կհանզեցներ ժողովրդավարական անշրջելի բարեփոխումների: Արդյունքում՝ իսկապես ձեւավորվեց քաղաքացիական հասարակություն, որն էապես նպաստեց հեղափոխության հաղթանակին: Բայց հեղափոխությունը, պարզվեց, «գունավոր» չէր եւ բացառապես ներքաղաքական օրակարգ ուներ. Հայաստանի արտաքին քաղաքական վեկտորը, մեծ հաշվով, չփոխվեց: Սա էլ իր հերթին նպաստեց, որ Արեւմուտքն ու արեւմտյան արժեհամակարգի անվերապահ նվիրյալները «սառեն» հեղափոխությունից (սովորաբար չափազանց ակտիվ այդ երիտասարդները չմասնակցեցին դատարանների շրջափակման ակցիաներին ու մի կերպ թաքցված հրճվանքով ազդարարում էին, թե ակցիաներին շատ քիչ մարդ է մասնակցել): Մի խոսքով՝ իշխանություններն ու հեղափոխության կողմնակիցները պետք է հանեն վարդագույն ակնոցներն ու սթափ գնահատեն իրավիճակը»: Զգացի՞ք Աննա Հակոբյանի խմբագրած թերթի ռազմախը: Ամեն կին չէ, որ ամուսնուն կոչ կաներ` հանել վարդագույն ակնոցները: Հայկական իրականության մեջ դա նույնիսկ նոնսենս է: Բայց այստեղ դա չէ գլխավորը: Փաստորեն Փաշինյանի բախտը չի բերել նաև արտաքին դաշնակիցների գծով: Ռուսաստանը չի ընդունում «թավշյա» հեղափոխությունը, Արևմուտքն էլ, փոխանակ մեզ վերցնելու, հազիվ թևանցուկ արած` երես է դարձնում մեզնից, ինչ է, թե դատարանների վրա մի թեթև ակցիա ենք արել: Ասել է, թե Ռուսաստանն ու Արևմուտքն էլ հակահեղափոխական դուրս եկան:
Բա հիմա որտեղի՞ց դաշնակից ճարենք Փաշինյանի համար, որ նա չսպասի, թե երբ պետք է Ժողովուրդն այս «սոդոմ-գոմորում» տեսնի իր շահն ու քայլ անի` վատ օրեր ապրող հեղափոխությունը փրկելու համար:
Էդիկ Անդրեասյան
Կարծիքներ