Լիբանանահայերն իրենց պետության նվիրյալներն են, իսկ նրանց տարհանման մասին կարծիքները՝ իմաստազուրկ
Նախ կցանկանայի ցավակցություն ու զորակցություն հայտնել Լիբանանի բնակչությանը՝ պատուհասած տեխնածին աղետի հետևանքով բազմաթիվ զոհերի ու ավերածությունների կապակցությամբ:
Լիբանանի հայերը դարեր շարունակ ապրում են լիբանանցիների հետ, իսկ նրանց մի մասը ցեղասպանությունը վերապրածների սերունդներն են, ում սրտաբաց ընդունել է Լիբանանի արաբ ժողովուրդը:
Այդ փոքրիկ ու հրաշալի ծովափնյա երկիրը բազմաթիվ աղետներ է տեսել, պատերազմներ, որոնք չեն ընկճել նրա բնակչությանը, այդ թվում՝ հայերին: Այնպես որ, տեղին չէ նրանց տարհանման վերաբերյալ կարծիքներ հայտնելը: Անշուշտ, լավ կլինի, որպեսզի մեր հայրենակիցներն անվտանգ միջավայրում ապրեն, էլ ավելի լավ կլիներ, եթե Մայր Հայրենքում հաստատվեին: Բայց ստացվել է այնպես, որ հայի առաքելությունն աշխարհասփյուռ լինելն է…
Լիբանանում և Սիրիայում բնակվող հայերը ՀՀ-ի համար արաբական աշխարհի, Մերձավոր Արևելքի հետ մեր հուսալի կապուղիներն են: Անկախ աշխարհաքաղաքական զարգացումներից, արաբները եղել են ու կմնան աշխարհին մշակութային մեծ ժառանգություն պարգևած ժողովուրդ: Սիրիայի և Լիբանանի արաբներն ապաստանել են ցեղասպանությունից մազապուրծ եղած հայերին, ովքեր նվիրվել են հյուրընկալ պետություններին, ինտեգրվել ու ներգրավվել նրանց զարգացման գործընթացներում: Այս աղետն էլ նրանք կհաղթահարեն իրենց համաքաղաքացի արաբ եղբայրների ու քույրերի հետ, որոնց կմիանա Հայաստանի ու աշխարհասփյուռ հայությունը:
Այս ծանր պահին մեր պետության գլխավոր խնդիրը ոչ միայն լիբանանահայերի մասին մտահոգվելն է, այլև Հայաստանի բարեկամ երկրի պետության կողքին կանգնելը: Դրա վկայությունը կարող է լինել ՀՀ Նախագահի կամ ՀՀ Վարչապետի այցը Լիբանան՝ տեղում մեր անելիքները քննարկելու համար: Մինչ այդ, համապատասխան կապուղիներով կարելի է ճշտել, թե հրատապ ինչ աջակցության կարիք կա. փրկարարներ, բժիշկներ, շինարարներ և այլն: Առաջիկայում հատկապես կարևոր դերակատարում կարող է ունենալ մեր շինինդուստրիան: Լիբանանի Կառավարության հետ համաձայնեցնելով, նպատակահարմար կլինի հավաքագրել անհրաժեշտ ոլորտների կամավոր – մասնագետների:
Ուրախալի է, որ հայ գործարարներն արդեն իսկ հայտնել են իրենց պատրաստակամությունը՝ ֆինանսական օժանդակության վերաբերյալ: Պետության և մասնավոր հատվածի ջանքերը պետք է մեկտեղել և ձեռամուխ լինել գործուն աջակցություն ցուցաբերելու լիբանանի բարեկամ ժողովրդին:
Լիբանանի ժողովուրդը միայնակ չի մնա աղետի դեմ հանդիման:
Գագիկ Վարդանյան
տնտեսագիտության դոկտոր, պրոֆեսոր
Կարծիքներ