ՀՅԴ ԳՄ անդամը չի բացառում, որ իրենք ինչ-որ առումով ասոցացվեցին հնի, սևերի հետ՝ այս էյֆորիայի պայմաններում

«Հրապարակի» հարցազրույցը ՀՅԴ ԳՄ անդամ, պատգամավորության ռեյտինգային թեկնածու Արթուր Եղիազարյանի հետ․

-Դեկտեմբերի 9-ի ընտրություններից հետո ՀՅԴ-ն  տարածած  հայտարարությունից ակնհայտ է, որ ընդունում եք ընտրության արդյունքները, սակայն ընդգծվում էր՝ կարճ քարոզարշավ, ատելության խոսք, կարճ ժամանակ  և այլ գործոններ, որոնք ազդեցին ընտրությունների վրա։  Ձեր՝ իբրև ԳՄ անդամի գնահատականը, թե կոնկրետ ինչը ազդեց և ինչու՞ միայն ՀՅԴ-ի վրա ազդեց։

-Միայն ՀՅԴ-ի վրա չազդեց։ Ազդեց Հայաստանի ողջ քաղաքական դաշտի վրա և չի կարող ազդել մեկի վրա, մյուսների վրա չազդել։ Հիմա «Բարգավաճ Հայաստան»-ը, թեկուզ անցել է, իր վրա չի՞ ազդել։ Եվ շատ ուժերի վրա։ Եվ մոտեցումն այն էր, որ երբ մայիսին Ազգային համաձայնության կառավարություն էր ստեղծվում, այն ժամանակ կառավարության գործունեության ծրագրում հստակ ամրագրված էր՝ մինչև 1 տարվա ընթացքում արտահերթ ընտրություններ և բազմաթիվ խնդիրներ ու ուղիներ էին նախանշված, որ դրանք լուծելուց հետո,  նոր կգնանք արտահերթ ընտրության։ Այդ խնդիրները չլուծվեցին, մենք գնացինք ընտրությունների անտրամաբանական ժամանակաշրջանում, ընդամենը 12  օրվա քարոզարշավով,  եղանակային անբարենպաստ պայմաններում, երբ չէիր կարողանում տանել այն աշխատանքը, որ անում էիր նախկինում՝ քսանքանի օրում։ Գործոնները շատ էին, նաև այն էյֆորիկ մթնոլորտը, որը ձևավորվեց օգոստոսից, այս սև ու սպիտակի  բաժանում, ամենը սրա շուրջ էր։  Եվ նաև հանրային գիտակցության մեջ այդ՝ հների վերադարձով վախեցնելու մտածողությունը, այս ամենը, բնականաբար, իր ազդեցությունն ունեցավ։

-Ինչու՞, օրինակ, նույն ԲՀԿ-ի ու ԼՀԿ-ի վրա նույն  այդ եղանակային պայմանները, այս էյֆորիան չազդեցին, որովհետև իրե՞նք անցան։

- 11 քաղաքական ուժ է մասնակցում, 8-ի վրա ազդեց, 3-ի վրա՝ չազդեց։ Երեքի վրա էլ ազդեց, որովհետև նույն «Բարգավաճ Հայաստան»-ը նախորդ շրջանում մի քանի անգամ ձայն էր ունեցել։ Այսինքն՝ ինքը շատ ավելի մեծ էլեկտորատ է կորցրել։ Այն, որ սա ազդեց ողջ դաշտի վրա, թերևս, տրամաբանական էր, քանի որ  հեղափոխությունը պետք է ավարտվեր։ Եվ նորից եմ ասում՝ մարդկանց գիտակցության մեջ կար հների վերադարձ, և այլն։

-Այսինքն, Դաշնակցությունն ասոցացվում էր հների հե՞տ որպես կոալիցիոն ուժ, չնայած ՀՅԴ-ն մշտապես ընդգծում էր, որ դուք հեղափոխությանը միացած ուժ եք։

-Ողջ խնդիրն այն է, որ մենք նախկինում համագործակցել ենք Հանրապետականի հետ կամ իշխանության։ Մենք փորձեցինք բացատրել այդ համագործակցության շրջանակը։ Մենք ունենք մեր մոտեցումներն ու սկզբունքները։ Դա մեր ճանապարհին կառնչվի իշխանությա՞ն հետ, թե՞ ընդդիմության, մենք մեր ուղուց չենք շեղվում։ Բայց քանի որ նախորդ իշխանության հանդեպ կար էդ ատելության, վախի զգացողությունը, մենք նաև ընտրողների հետ հանդիպելով զգում էինք, որ դա էլ կա։ Ոչ ուղղակի, բայց դե՝ Հանրապետականի հետ եք եղել և այլն։ Շատ դժվար է բացատրելը, որ մենք տարբեր ենք․ մենք այլ ենք, հանրապետականը՝ այլ, և սա քաղաքականություն է, որ դու ում հետ ասես կարող ես քաղաքական դաշտում և՛ համագործակցել, և՛ հակադրվել՝ ելնելով քո արժեքային համակարգից։ Եվ եթե կան խնդիրներ, որոնց համար պետք է համագործակցել, մենք չենք կարող չհամագործակցել․լինի ՀՀԿ, «Իմ քայլը», թե այլ կուսակցություն։ 

-Իսկ հնարավոր է, որ Քոչարյանի հետ համագործացությունը չբացառելու հայտարարությունն էր պատճառը։

-Մեր  մոտ ամեն ինչ նույնականում է անձերի հետ, ոչ սկզբունքների։  Ռոբերտ Քոչարյանը աներ ինչ-որ գործողությունն Նիկոլ Փաշինյանի հանդեպ, մենք նույն կերպ հայտարոթյուն էինք անելու, Նիկոլ Փաշինյանի անվան դիմաց գրվելու էր՝ Նիկոլ Փաշինյան։ Այսինքն՝ մենք երևույթի հանդեպ մոտեցումն ենք արտահայտում, ոչ թե կոնկրետ անձերի։ Բայց մարդիկ այդ բանը չեն տեսնում։ Բայց մենք չենք պատրաստվում մեր սկզբունքներից հրաժարվել, ինչ է՝ ամբոխահաճո լինի։

-Կարելի ասել, որ ՀՅԴ-ին մի քիչ սև տեսան։

-Հնարավոր է․ ամբողջական չի վերլուծվել,  մենք դեռ ամբողջը պետք է ուսումնասիրենք, հասկանանք՝ և մեր վրիպումները, ևս այս ընտրության տրամաբանության շատ խնդիրներ։ Ամեն դեպքում, բացասական մոտեցումներից մեկը պայմանավորված էր նրանով, որ շատ խախտվեցին նախընտրական քարոզչական սկզբունքները, երբ չսահմանված տեղերում, հենց այդ անցողիկ ուժը, ամբողջ քաղաքը, ամբողջ երկիրը պաստառապատել էր և քանի որ   շատ դեպքերում, մարդիկ ուղղակի ուզում են իրենց ասոցացնել հաղթողի հետ, և այս ամեն ինչը նպաստեց։ Բայց նորից եմ ասում՝ երևի, թե ճիշտը սա էր, որպեսզի ավարտվեր հեղափոխությունը։ Եվ մենք հեղափոխությանը միացել էինք հենց էդ մտքով։Եվ հիմա էլ մենք ցանկանում ենք, որ կառավարությունը հաջողի, բայց հաջողի՝ արդարացնելով այն սպասելիքներն ու հույսերը, որ կան, որովհետև սա մեր երկրի իշխանությունն է և մեր կառավարությունը։

-Երեկ անցած թեկնածուներից մեկը գրել էր, որ ամեն մեկը կերտում է իր ապագան, եթե Դաշնակցությունը կողմ քվեարկեր նոր Ընտրական օրենսգրքին, նորով կանցնեիք։

-Ախր,մյուսների պես շաչունակում եք նույնը պնդել․ Դաշնակցությունը կողմ է քվեարկել, պառլամենտում այս օրը եղել է ֆրակցիայի 7 անդամից 5-ը, 5 էլ կողմ են քվեարկել։ Ինչի՞ են մեզ անընդհատ ասոցացնում այդ ԸՕ-ին դեմ գնալու․․․Մենք ո՛չ ԸՕ-ի հեղինակ ենք եղել, ո՛չ էլ մեր առաջարկները ներառված են եղել, բայց հաշվի առնելով, որ նորը նախորդ Ընտրական օրենսգրքից 1 քայլ առաջ է, ՀՅԴ-ն հայտարարել է, որ ինքը կողմ է նոր ԸՕ-ին։ Եվ այդ օրը  ով եղել է պառլամենտում, հինգն են եղել, հինգն էլ կողմ են քվեարկել։

- Նոր օրենսգրքի ընդունման համար մեկ ձայն պակասեց, մինչդեռ ՀՅԴ խմբակցության անդամ Անդրանիկ Կարապետյանը հայտարարեց, որ անձնական գործեր ուներ, չէր եկել։

-Մենք Ընտրական օրենսգրքի հեղինակը չենք․ ո՞վ այն բերել էր, նա էլ պետք է հաշվարկեր՝ կանցնի՞, թե՞ չէ, ինքը քվորում ունի՞, թե՞ չէ։ Եվ մեր առաջ ոչ ոք նման խնդիր չէր դրել, որ, անպայման, ապահովենք ողջ ֆրակցիայի ներկայությունը, որ անցնի։ Իրենք ընտրությունից առաջ մեր հետ նման խնդիր չեն համաձայնեցրել, նման խնդիր չեն ձևակերպել, որ, գիտեք, եթե ձեզնից մի հոգի չգա, չի անցնի․․․Այսինքն՝ հենց այդ մի ձայնն է․․

-Երեկ լուրեր էին տարածվել, որ ՀՅԴ-ում բունտ է հասունանում։

-Բացարձակապես նման բան չկա։ Բնականաբար, հիմա՝ հետընտրական շրջանում կլինեն ժողովներ, կլինեն քննարկումներ, տարբեր տեսակետներ կհնչեն։ Բայց նման բան չկա, հակառակը՝ այս պահին ավելի կուռ ու միասնական ենք։