Ոչ այնքան ադեկվատ զրույց՝ «Ադեկվադ»-ի համագումարին ընդառաջ

Ոչ այնքան ադեկվատ զրույց՝ «Ադեկվադ»-ի համագումարին ընդառաջ
Արթուր Դանիելյան

Սեպտեմբերի 7-ին, ժամը 11-ին «Էրեբունի պլազա» հյուրանոցում նոր կուսակցություն է ծնվելու՝  «Ադեկվադ»-ը։ Մինչ օրս այն ոչ թե կուսակցություն էր, այլ համացանցային ինտերնետային  հաղորդում, նախագիծ, ինչպես ասում է նախագծի էպատաժային համահեղինակ Արթուր Դանիելյանը՝ միաբանություն, որի քաղաքական ճյուղը դեռ մեկ ամիս առաջ էր հայտարարել կուսակցության հիմնադիր համագումար հրավիրելու մասին։ Կուսակցությունն անդամներ դեռ չունի, քանի որ դեռեւս գրանցված չեն։ «Օրենքով սահմանված է, որ հիմնադիր համագումարին առնվազն պետք է մասնակցի 100 հոգի, այն դահլիճը, որը մենք վարձել ենք, մոտ 150 հոգի տարողունակություն ունի, եւ մոտավորապես այդքանով էլ համագումար ենք անցկացնում»,- ասում է «Ադեկվադ» նախագծի համահեղինակ Արթուր Դանիելյանը։ Նրան շատերն ընկալում են որպես Ռոբերտ Քոչարյանի պաշտպան եւ Նիկոլ Փաշինյանի կոշտ քննադատ։ Թեպետ հիշում են նաեւ, որ ժամանակին նույնկերպ նախկին վարչապետ Կարեն Կարապետյանին էլ էր քննադատում։

Նա պարադոքսալ հայտարարություն արեց «Հրապարակի» համար։ «Ադեկվադ»-ը կուսակցություն է, որն այսօրվա քաղաքական դաշտից չէ, իսկ Արթուր Դանիելյանը, ինչպեսեւ Նիկոլը, «իզմ»-երին դեմ է։ «Այսօրվա քաղաքական դաշտում մենք մեզ առհասարակ չենք տեսնում։ Մեր գաղափարախոսության ու քաղաքական դիրքորոշման մասին ես կհայտարարեմ համագումարի ժամանակ, իմ ելույթում։ Ինչ վերաբերում է «իզմ»-երին, բազմիցս նշել եմ, որ Փաշինյանի հետ ինչ-որ առումով կարող եմ համաձայնել՝ տեխնոլոգիական պրոցեսը ոչնչացրել է «իզմ»-երը, դրանք՝ որպես մոդել, սնանկացել են։ Մենք չենք կարծում, որ ժողովրդավարությունն այլեւս ապագա ունի։ Այն, որպես հասարակական կառավարման մոդել, սնանկ է։ Այն քաղաքական ուժերի սպեկտրում, որոնք այսօր Հայաստանում գործում են ժողովրդավարության տրամաբանությամբ, մենք չենք կարող տեղավորվել։ Բուն կուսակցությունները Հայաստանում վերածվել են դեկորացիայի, բուտաֆորիաների»։

«Ադեկվադ» կուսակցությունը բացվում է զուտ քաղաքական շահարկումների համար։ Նման ենթադրություն կարելի է անել Արթուր Դանիելյանի հետեւյալ արտահայտությունից․ «Մեր կուսակցության համար քաղաքական ճյուղ հիմնադրելը կրել է մարտավարական, ոչ թե ռազմավարական բնույթ։ Հերթական անգամ, երբ որ մեզ ապօրինի ձերբակալեն, բերման ենթարկեն կամ այլ ճնշումների ենթարկեն, մենք այդ հարցը քաղաքականացնելով՝ որպես լծակ ենք օգտագործելու, բայց Հայաստանի ապագան կուսակցությունների հետ առհասարակ կամ նմանատիպ քաղաքական գործընթացների հետ չենք կապում»։

- Ինչպե՞ս հասկանանք՝ դուք կուսակցություն եք, բայց քաղաքական զարգացումը կուսակցությունների հետ չեք կապում։ Ձեզ հետ է՞լ չեք կապում։

- Մեզ հետ կապում ենք։ Կուսակցությունների հետ չենք կապում։

- Բայց Դուք էլ եք կուսակցություն, չէ՞։

- Մենք կուսակցությունը բացում ենք, որպեսզի, եթե հաջորդ անգամ մեզ ձերբակալեն, մեր փոխարեն կուսակցության անդամներն այդ հարցը քաղաքականացնեն, ու սա որպես լծակ, որպես մարտավարական գործիք օգտագործենք։ 
Երկրորդը․ արտաքին քաղաքական մեր գործընկերների հետ իրավական համաչափ հարթակից համագործակցելու համար է ստեղծվում կուսակցությունը։ Ես չեմ կարծում, որ Հայաստանում քաղաքական զարգացումները որեւէ կերպ կարող են զարգացման բերել։

- Էդ դեպքում ի՞նչ միջոցով պետք է զարգանա հասարակությունը, եթե ոչ քաղաքական։

- Պետք է կրթել ժողովրդին, որ իրենք իրենց առօրյայում կիրթ բողոքեն, եւ երբ որ մենք հասնենք նրան, որ բնակչության կրիտիկական զանգվածը սկսի առողջ վարքագիծ դրսեւորել, այդ դեպքում կլինեն դրական զարգացումներ։ Քաղաքական լծակների միջոցով դրան հասնելը, իմ կարծիքով, անհնար է։