Նախագահ Արմեն Սարգսյանի նախաձեռնած խորհրդակցությունների շրջանակում տեղի ունեցած հանդիպումները
Հրադադարի, ԼՂՀ տարածքի մեծ մասի հանձման համաձայնագրից հետո նախագահ Արմեն Սարգսյանը մի շարք հանդիպումներ է ունեցել «իր նախաձեռնած խորհրդակցությունների շրջանակում»։
Ստորև ներկայացնում ենք մի շարք հանդիպումների ժամանակագրությունը։
Այսօր՝ նոյեմբերի 23-ին, Սարգսյանը հանդիպել է հասարակայնության ներկայացուցիչների, այդ թվում՝ քաղաքագետների, վերլուծաբանների, լրագրողների, հասարակական, մշակութային գործիչների հետ:
Նրանց թվում են եղել՝ երաժիշտ, ԵՊԲՀ համալսարանի հոգաբարձուների խորհրդի նախագահ Վահան Արծրունին, , ազգագրական պարերի մասնագետ, կիբեռնետիկ, արցախյան պատերազմի մասնակից Գագիկ Գինոսյանը, Պատմական գիտությունների դոկտոր, պրոֆեսոր, ՀՀ ԳԱԱ Պատմության ինստիտուտի տնօրեն, ակադեմիկոս Աշոտ Մելքոնյանը , ՀՀ ժողովրդական արտիստ, օպերային երգչուհի Հասմիկ Պապյանը, «Կովկաս» ինտիտուտի տնօրեն, քաղաքագետ Ալեքսանդր Իսկանդարյանը, նույն ինստիտուտի գիտաշխատող, քաղաքագետ, տնտեսագետ Հրանտ Միքայելյանը, քաղաքագետ Ալեն Ղևոնդյանը, կինոռեժիսոր Էդգար Բաղդասարյանը, քաղաքական տեսաբան, լրագրող Հայկ Խալաթյանը և այլք։
Նշենք, որ նոյեմբերի 16-ին Արմեն Սարգսյանը հանդես էր եկել ուղերձով , որում նաև նշել էր վարչապետի հրաժարականի, ազգային համաձայնության կառավարության ձևավորման, արտահերթ խորհրդարանական ընտրություններ անցկացնելու անհրաժեշտության մասին։
Այնուհետև նոյեմբերի 20-ին «Առավոտ» թերթին տված հարցազրույցում նախագահը, անդրադառնալով ստեղծված լարված ներքաղաքական վիճակին, նշել էր, որ «․․․ այս պետությունում կա ինստիտուտ, որը կոչվում է նախագահական ինստիտուտ, որը հենց այս պահերի համար է ստեղծված, որպեսզի լինի այն հարթակը, որտեղ մարդիկ հավաքվեն և գտնեն այն ընդհանուրը, որն իրենց բոլորին կապում է: Դրանից հետո այս կառավարությունը կլինի՞ կառավարություն, որտեղ բացի իշխող, խորհրդարանում ներկայացված կուսակցությունից կլինեն նաև այլ կուսակցություններ՝ խնդրեմ: Եթե կլինի որոշում, որ որևէ կուսակցություն չլինի, և լինի պրոֆեսիոնալների, տեխնոկրատ կառավարություն՝ խնդրեմ: Բայց այդ համաձայնությանը պետք է գալ ոչ թե փողոցում, այլ՝ սեղանի շուրջ: Ես չեմ ուզում, որ փոխանակ հավաքվենք սեղանի շուրջ և մեր խնդիրները լուծենք, քաղաքակիրթ մարդու նման հասնենք այն մեխանիզմներին, որ կարող են մեզ ճգնաժամից հանել, պետք է գնանք փողոցում այսօր հայհոյենք, վաղն իրար վրա քար նետենք և, Աստված չանի, որ մյուս օրը այն զինվորը, որին զենք են տվել հայրենիքը պաշտպանելու համար, այդ զենքն ուղղի հայրենիքի դեմ: Դա անթույլատրելի է»:
Նա նաև նշել էր, որ արտահերթ ընտրությունները կարող է լինեն կես կամ մեկ տարի հետո «Ես չեմ ասել, որ այդ ընտրությունը պետք է վաղն անենք: Իհարկե ոչ: Եթե այսօր էլ ընտրություններ անենք, զգացումների, զգացմունքների, նվաստացած, ջղայնացած մարդկանց ընտրություններ կլինեն, որոնք չեն արտահայտելու այն, ինչ իրական է»,- ընդգծել էր նա:
Նույն օրն ի պատասխան «Հրապարակ» թերթի հարցմանը նախագահի աշխատակազմից հայտնել էին , որ «Հանրապետության նախագահն Արցախի վերաբերյալ եռակողմ համաձայնագրի ստորագրումից հետո հայտարարել է, որ, հաշվի առնելով առկա իրավիճակով պայմանավորված՝ ժողովրդի ստվար զանգվածի խոր մտահոգությունները, անհապաղ նախաձեռնում է քաղաքական խորհրդակցություններ՝ համազգային շահերի պաշտպանության մեր օրակարգից բխող լուծումներն ամենակարճ ժամկետներում համաձայնեցնելու նպատակով։ Այդ խորհրդակցություններն ու դրանց շրջանակում ունեցած հանդիպումները Հանրապետության նախագահն ամփոփել է ուղերձով, որում բառացիորեն ասել է՝ «ակնհայտ է, որ երկիրը ցնցումներից զերծ պահելու համար ի վերջո անխուսափելի են լինելու Ազգային ժողովի արտահերթ ընտրությունները»: Այսինքն՝ նախագահն ուղերձով իր դիտարկումները ներկայացրել է նախաձեռնած հանդիպումներն ավարտելուն պես»:
Նոյեմբերի 16-ին Արմեն Սարգսյանը հանդիպել էր ԱԺ «Իմ քայլը» խմբակցության մի խումբ պատգամավորների հետ՝ խմբակցության ղեկավար Լիլիթ Մակունցի գլխավորությամբ։
«Հանդիպմանը քննարկվել են երկրում ստեղծված ներկա իրավիճակին վերաբերող հարցեր»,- նշված էր հաղորդագրության մեջ։
Նոյեմբերի 13-ին նախագահը հանդիպումներ էր ունեցել Արցախի հերոս, գեներալ-մայոր Արկադի Տեր-Թադևոսյանի և քաղաքացիական խորհրդի նախաձեռնող խմբի հիմնադիրների հետ:
Այնուհետև առանձին-առանձին հանդիպել էր Հայաստանի դեմոկրատական կուսակցության նախագահ Արամ Սարգսյանի, «Հայ կառուցողական» կուսակցության ղեկավար Անդրեաս Ղուկասյանի և «Քաղաքացու որոշում» սոցիալ-դեմոկրատական կուսակցության ներկայացուցիչներ Սուրեն Սահակյանի ու Գոռ Հակոբյանի հետ:
Նույն օրը հանդիպել էր նաև մշակույթի և մարզական ոլորտի, հասարակական կազմակերպությունների մի խումբ ներկայացուցիչների հետ:
Նոյեմբերի 12-ին Հանրապետության նախագահ Արմեն Սարգսյանը, շարունակվող քաղաքական խորհրդակցությունների շրջանակում, հանդիպում էր ունեցել «Ազգային օրակարգ» կուսակցության ներկայացուցիչների հետ՝ կուսակցության խորհրդի նախագահ Արա Հակոբյանի գլխավորությամբ:
Սրան հաջորդել էր առաձին հանդիպումները «Հանուն Հանրապետության» կուսակցության ղեկավար մարմնի ներկայացուցիչ, ԱԺ պատգամավոր Արման Բաբաջանյանի և Ազգային ժողովի «Իմ քայլը» պատգամավորական խմբակցության ներկայացուցիչների՝ ԱԺ փոխնախագահ Լենա Նազարյանի, «Իմ քայլը» խմբակցության ղեկավար Լիլիթ Մակունցի, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի հետ։
Նոյեմբերի 11-ին Հանրապետության նախագահն ընդունել էր «Մեկ Հայաստան» կուսակցության նախագահ Արթուր Ղազինյանին և քաղխորհրդի անդամ Վլադիմիր Մարտիրոսյանին, այնուհետև «Հանրապետություն» կուսակցության նախագահ Արամ Սարգսյանին։
Նոյեմբերի 10-ին Արմեն Սարգսյանն հանդիպում էր ունեցել «Հայրենիք» կուսակցության նախագահ Արթուր Վանեցյանի հետ։
Այնուհետև նախագահն ընդունել էր Հայաստանի Հանրապետական կուսակցության գործադիր մարմնի անդամներ Վահրամ Բաղդասարյանի, Էդուարդ Շարմազանովի և ՀՀԿ երիտասարդական կազմակերպության ղեկավար Հայկ Մամիջանյանի հետ, այնուհետև «Ժառանգություն» կուսակցության վարչության նախագահ Նարինե Դիլբարյանին և կուսակցության վարչության անդամ Անդրանիկ Գրիգորյանին: Սրան հաջորդել էր ՀՅԴ Բյուրոյի անդամ Արմեն Ռուստամյանի և ՀՅԴ Հայաստանի Գերագույն մարմնի անդամ Արծվիկ Մինասյանի հետ հանդիպումը:
Նույն օրը հանդիպում էր ունեցել ՀՀ ԱԺ «Լուսավոր Հայաստան» խմբակցության ներկայացուցիչների՝ խմբակցության քարտուղար Գևորգ Գորգիսյանի և պատգամավոր Անի Սամսոնյանի հետ: Սրան հաջորդել էր ՀՀ մարդու իրավունքների առաջին պաշտպան, «Ընդդեմ իրավական կամայականության» ՀԿ տնօրեն Լարիսա Ալավերդյանի, նախկին փոխարտգործնախարար, դեսպան Արման Նավասարդյանի և Հայաստանի դեմոկրատական կուսակցության նախագահ Արամ Սարգսյանի հետ հանդիպումը:
Կարծիքներ