ԵՄ-ն չի ճանաչում Մադուրոյի հաղթանակը. ճգնաժամը խորանում է

Եվրամիությունը չի կարող ճանաչել Նիկոլաս Մադուրոյի վերընտրությունը Վենեսուելայի վերջին նախագահական ընտրություններում, քանի որ երկրի ընտրական մարմինը դեռևս պետք է տրամադրի քվեարկության պաշտոնական տվյալները: Այս մասին ասվում է ԵՄ խորհրդի հայտարարության մեջ։
Բրյուսելը նշում է, որ ԵՄ-ն շարունակում է «մեծ մտահոգությամբ հետևել Վենեսուելայում տեղի ունեցող իրադարձություններին»։

«Ընտրությունների միջազգային դիտորդական առաքելությունների զեկույցներում հստակ նշված է, որ հուլիսի 28-ի նախագահական ընտրությունները չեն համապատասխանել ընտրական ամբողջականության միջազգային չափանիշներին»,- ասվում է հրապարակված որոշման մեջ։
Ինչպես նշվում է ԵՄ խորհրդի հրապարակման մեջ, չնայած իր պարտավորություններին, «Վենեսուելայի Ազգային ընտրական խորհուրդը (CNE) դեռևս չի հրապարակել ընտրատեղամասերի քվեարկության պաշտոնական գրառումները:

«Առանց դրանց հաստատող ապացույցների, CNE-ի օգոստոսի 2-ին հրապարակված արդյունքները չեն կարող ճանաչվել», - ընդգծում է Եվրամիությունը։
Բրյուսելը նաև նշում է, որ քվեարկության պաշտոնական արձանագրությունների ամբողջական հրապարակումը հետաձգելու ցանկացած փորձ «միայն կասկածի տակ կդնի պաշտոնապես հրապարակված արդյունքների հավաստիությունը»։ Միևնույն ժամանակ, ԵՄ-ն հավելում է, որ Վենեսուելայի ընդդիմության կողմից հրապարակված և մի քանի անկախ կազմակերպությունների կողմից ստուգված ընտրական քվեարկության արձանագրությունների պատճենները ցույց են տալիս, որ «Էդմունդո Գոնսալես Ուրուտիան, ամենայն հավանականությամբ, նախագահական ընտրություններում զգալի մեծամասնությամբ հաղթող է»: