Ո՞ւմ էին ուղղված Փաշինյանի ակնարկները (տեսանյութ)
ՔՊ համագումարում այսօր Նիկոլ Փաշինյանը հիշեցրեց, որ հեղափոխության օրերին իրենք չգնացին ընդդիմադիր կոալիցիաներ ձևավորելու ճանապարհով՝ գործընթացի ողջ պատասխանատվությունը վերցնելով միայն իրենց վրա՝ ՔՊ կուսակցության և «Մերժիր Սերժին» նախաձեռնության: Նա նաև նկատեց, որ արտաքին ոչ մի ուժի թույլ չեն տվել և թույլ չեն տալու միջամտելու իրենց ներքին գործերին:
«Մենք իսկապես ժողովրդավարական կուսակցություն ենք: Սա չի նշանակում, թե մեր կուսակցությունում բոլորի ասածը հավասարապես ազդեցիկ է: Սա նշանակում է, որ բոլորը այստեղ իրենց ասելիքն ասելու հնարավորություն ունեն»,-ասաց Նիկոլ Փաշինյանը:
Այնուհետև նա միտք արտահայտեց, որի տակ թաքնված ակնարկներն ակնհայտորեն ուղղված էին իր որոշ կուսակից ընկերներին:
«Փորձը ցույց է տալիս, որ ժողովրդավարությունն իր հետ բերում է նաև մարտահրավերներ, քանզի հաճախ մեր կուսակցությունը և կուսակցականները զերծ չեն եղել հանրության շրջանում առկա միտումներից, երբ, օրինակ, ընտրությունների ժամանակ տեղի են ունենում ոչ այնքան քաղաքական, որքան անձնական հարաբերությունների վրա հիմնված ընտրություն»-ասաց Փաշինյանը՝ խնդրելով վարչության կազմի ընտրության ժամանակ սա հաշվի առնել:
Փաշինյանի այս ակնարկները չի բացառվում՝ ուղղված էին Ռոմանոս Պետրոսյան-Սասուն Միքայելյան անձնական հակասություններին, որոնք հերթական անգամ դրսևորվեցին Աբովյանի ընտրություններում, երբ Միքայելյանը չսատարեց ՔՊ-ի թեկնածուին: Հրազդանի քաղաքապետի ընտրություններին էլ Ռոմանոս Պետրոսյանը չէր աջակցել Միքայելյանի որդուն:
Մանրամասն՝ տեսանյութում:
Կարծիքներ