Ոստիկանը չի կրակում, երբ հարձակվողների հետևում զգում է ժողովրդի շունչը 

Պաշտպանության, ազգային անվտանգության և ներքին գործերի հանձնաժողովի նախագահ Անդրանիկ Քոչարյանը, որը 2008 թվականին զբաղվում էր Մարտի 1-ի իրադարձությունների փաստահավաք աշխատանքով, «Ազատություն» ռադիոկայանի տնօրենի հետ հարցազրույցում հայտարարել է․ «Եթե քաղաքացիները մտածում են շենքեր գրավելու մասին, նաև թող մտածեն, որ այդ շենքերը գտնվում են պետական պահպանության տակ, դա նշանակում է՝ պետությունը շենքերը չի պահում, այլ պետականությունը, դա էլ նշանակում է, որ նա մոնոպոլ իրավունք ունի կրակելու»։ Սա ասում է նաև 2018թ․ Ռադիոտուն գրաված քաղաքական ուժի ներկայացուցիչը։ 

«Հրապարակի»  հարցազրույցը ՀԱԿ անդամ, նախկին ազատամարտիկ Վարդան Մալխասյանի հետ։

-Պարոն Մալխասյան, իբրև Մարտի 1-ը դատապարտած ուժի ներկայացուցիչ, քաղաքացի, ազատամարտիկ, Անդրանիկ Քոչարյանի հարցազրույցը նորմա՞լ եք համարում։

-Ախր, գիտեք ինչ, իրա ասածները պտի կոնտեքստից չկտրվի։ Լրագրողները մեկ-մեկ տենց բաներ անում են։ Ինքը ի՞նչ է ասել, ասել է՝ կան պետական պահպանության օբյեկտներ, որը ոստիկանության կողմից զինված հսկողության տակ է։ Բայց եթե էդ օբյեկտների վրա հարձակում լինի, իրենց կանոնակարգով իրենք պետք է զենք կիրառեն։ Թե չէ հակառակ դեպքում ինչո՞ւ ա զինված հսկողության տակ դնում էդ շենքերը։ Հենա իզուր տեղն էդքան աշխատավարձ չեն տա ոստիկաններին, չեն պահի էդ օբյեկտներում։ Այսինքն՝ եթե այդ օբյեկտները հսկողության տակ են, ու մարդիկ հարձակվում են էդ օբյեկտների վրա, հարձակվողները թույլ են տալիս շատ ծանր հանցագործություն։ Եվ դա պետք է կանխեն, չէ՞։ Իրենք հո չե՞ն ասել՝ խաղաղ ցուցարարների վրա կրակեք։ Ես տենց բան չեմ լսել։ Պետական պահպանության ենթակա շենքերի վրա հարձակվելու դեպքում պտի էդ պաշտպանողները պաշտպանեն։ Տեսաք՝ ՊՊԾ գնդում ոնց եղավ։ Մտան, երեք հոգի զոհվեց։

-Իսկ Ռադիոտան մոտ ո՞նց եղավ։

-Գիտեք, այնտեղ ոստիկանները կարային զենք կիրառեին։ Բայց  վախեցան կիրառելուց։ Ինչի՞ համար, որովհետև ամբողջ հայ ժողովուրդն էդ ժամանակ կանգնած էր հեղափոխականների թիկունքին։ Երբ իշխանությունները զգում են ժողովրդի շունչը, նրանք չեն համարձակվում կոշտ միջոցներ ձեռնարկել։ Թե չէ օրենքով էն ժամանակ էլ կարային զենք կիրառեին։ Զինված մարդիկ պահպանում էին, էդ օբյեկտն իրավունք չունեին մտնելու։

-Իսկ հիմա, եթե անգամ ողջ հայ ազգը չի կանգնած ընդդիմության թիկունքին, ուրեմն կարող են կրակել, այո՞։

-Էս ցուցարարների թիկունքին կանգնած է Հայաստանի մի տոկոսը։ Իրենց չի հաջողվում դրանից ավելի հավաքել։ Իսկ էն ժամանակ կանգնած էր ժողովրդի կեսից ավելին։

-Դուք փետրվարի 20-ի հանրահավաքը տեսե՞լ եք։

- Տեսել եմ։ Բնակչության 1 տոկոսը 30 հազար մարդ է։ Հիմա հիշո՞ւմ եք, որ տարիներ առաջ, երբ իրենց հարց տվեցին, թե ինչքան անդամ ունեք, պատասխանեցին, որ հարյուր հազարավորներ։

-500 հազար։

-Շարմազանովին երբ հարցրին, թե, վերջապես, գաղտնի՞ք է, կարա՞նք իմանանք` ՀՀԿ թիվը ինչքան է, ասաց՝ 250 հազար։ ՀՅԴ-ն՝ մի քանի հազար։ Հլը էն մյուս կուսակցությունների մասին չեմ խոսում, իրենց դնենք մի կողմ։ Էս 3 կուսակցությունների տվյալներով՝ իրենց անդամների թիվը գերազանցում է 600 հազարը, եթե իրենք կուսակցության անդամների 10 տոկոսը չեն կարում հավաքել, էլ ո՞նց պիտի հեղափոխություն անեն։

-Ամեն դեպքում, Նիկոլ Փաշինյանը 10 տարի շարունակ ասել է՝ Մարտի 1։ Ու հիմա ասելով՝ ըստ կանոնակարգի՝ կրակելու իրավունք ունեն, հենց Մարտի 1-ը չե՞ն վարկաբեկում։ Այսինքն՝ Մարտի 1-ը դատապարտող ուժը սպառնում է Մարտի 1-ով։

-Էլի եմ ասում, պետք է ամբողջ տեքստը ուշադիր կարդալ։ Ինքը չի ասել՝ ցուցարարների վրա կկրակենք, ասել ա՝ պետական պահպանության օբյեկտների վրա հարձակվելու դեպքում էդ պահպանողները կանոնկարգով իրավունք ունեն զենք օգտագործել։ Հիմա սրանց թիկունքին մարդ չկա։

-Ասում եք՝ ինստրուկցիա: Ինստրուկցիայով դավաճանության համար պետք է ապօրինի հրամանների, կոռուպցիայի և այլ դեպքերի պարագայում ձերբակալել։ Անմեղության կանխավարկած չեմ խախտում, բայց նման կասկածի դեպքում կկալանավորե՞ն Փաշինյանին, ըստ ինստրուկցիայի։

- Էդ որ նախկինները կողոպտել են երկրի ամբողջ ունեցվածքը, իրենց ձեռքին է մեդիադաշտը, էդ լրատվամիջոցներով ինչ մանիպուլյացիա ասես, կարան անեն։ Ես էս իշխանությունների ոչ դատապաշտպանն եմ, ոչ փաստաբանը։ Նրանք էլ շատ սխալներ են թույլ տալիս։ Ես տեղն էկած դեպքում խորապես քննադատում եմ իրենց սխալները։ Ես նայում եմ, տեսնում եմ՝ հիմի էլ են կաշառք վերցնում, բայց առաջվա նման հո չէ․․․ Առաջ խայտառակ վիճակ էր։

-Բոլորը ասում են՝ խայտառակ վատ է կազմակերպվել՝ միտումնավոր, թե ոչ, ցույց կտա դատավարությունը, որը, վստահ եմ, կլինի, կանոնավոր բանակը վերածեցինք ջոկատայինների և այլն։ Հազար ու մի կասկած կա՝ դավաճանություն, վաճառել և այլն։ Սա ավելի պակաս հանցագործություն է, քան թալանն ու նախկինների կոռումպացված լինե՞լը։ Իսկ ի՞նչն է ավելի վտանգավոր, դատապարտելի՝ թալա՞նը, Մարտի 1-ի 10 զոհե՞րը, թե՞ 5000 զոհը։

-Ես նման բան չասացի։ Բայց հիմա էդ պատերազմն ավարտվեց։ Ավարտվեց, մենք պարտվեցինք, կապիտուլյացիայի ենթարկվեցինք։ Հիմա հարկավոր է էդ բոլոր սխալները քննել։ Բոլորը բոլորին դավաճան են անվանում։ Հո մենակ ասելով չէ՜։ Պտի հիմնավորումներ լինեն։ Դուք ծանո՞թ եք ՀԱԿ-ի որոշումներին։ Մենք ասում ենք՝ իշխանությունը պտի փոխվի, բայց պտի փոխվի սահմանադրական եղանակով։ Սա փոքր երկիր ա, ստեղ որ ցնցումներ եղան․․․

-Է, Սերժի ժամանակ էլ Վլադիմիր Գասպարյանն էր ասում՝ սա փոքր երկիր է։ 

-Այո։ Ես ասում եմ՝ սխալներ շատ կան, հարկավոր է էդ սխալները բոլորը հանգիստ ձևով վերհանել, մեղավորներին պատժել։ Բայց ոչ զենքով, բռնությամբ, իրար կոտորելով։ Եթե էս երկրում մարդիկ իրար նկատմամբ զենք կիրառեցին, էս երկիրը լրիվ  կկորցնի պետականությունը, կվերջանա։

-Ո՞վ է մեղավոր այդ ատելության համար, իշխանությունները չե՞ն սկսել առաջինը։

-Մեղավորություն բոլորն ունեն։

-Իրենք դագաղ էին տանում ՀՀԿ-ականների տների մոտ, բա նրանք էլ՝ օղի։

-Բոլորն են մեղավոր: Հարկավոր է, որ ժողովրդին․․․ Նժդեհն ինչ ա ասում, ասում ա՝ ապագան վտանգված ժողովուրդների վերջին խաղաթուղթը վերադաստիարակությունն է։ Վերադաստիարակվեք, վերադաստիարակեք մեր ժողովրդին, որպեսզի եթե նոր ընտրություններ լինեն, չգիտեմ երբ, ժողովուրդը էդ բոլոր իմ ասածները նկատի ունենալով՝ գնա ընտրության։ Մինչև մենք գիտակից ընտրող չունենանք, գաղափարներն իրարից ճիշտ տարբերակող, մեր երազած իշխանությունն այդպես էլ չենք ունենա։