Սկսվել է դպրոցների տնօրենների ջարդը՝ Զորակի տնօրենին ստիպել են դիմում գրել

Արարատի մարզի Զորակ համայնքի Մոնթե Մելքոնյանի անվան միջնակարգ դպրոցի տնօրեն Տիգրան Բաբախանյանը աշխատանքից ազատման դիմում է գրել։ Բանն այն է, որ մարզպետ Ռազմիկ Թևոնյանը և նրա տեղակալ Արտավազդ Նազարեթյանը շատ կոնկրետ «ընկել են» տնօրենների հետևից և ընտրություններից առաջ փորձում են ազատվել մարզի ըմբոստ և իրենց հրահանգները չկատարող տնօրեններից։

Դպրոցի տնօրեններին «կոնտրոլ» անելու պարտականությունը դրված է հենց Նազարեթյանի վրա։ Այս գործընթացին, մեր տեղեկություններով, ակտիվ մասնակցում է նաեւ Արարատի նախկին մարզպետ և բոլորի «ուրախություն» Գարիկ Սարգսյանը, որն այժմ պետգույքի կառավարման կոմիտեի նախագահն է, սակայն մարզին առնչվող հարցերով ՔՊ-ում ինքն է հաշվետու։ 

Մեզ ասացին, որ Տիգրան Բաբախանյանին աշխատանքից ազատել են, քանի որ վերջինս պարբերաբար հանդես է եկել քննադատական գրառումներով, այսինքն՝ բացառվում է, որ ընտրությունների ժամանակ իշխանության օգտին աշխատեր։ Մենք զրուցեցինք Բաբախանյանի հետ՝ հարցրեցինք, թե ճի՞շտ է, որ իրեն ազատել են աշխատանքից: «Ոչ թե ազատել են, այլ իմ ցանկությամբ է եղել, ես իմ դիմումի համաձայն եմ հեռացել դպրոցից»,- պատասխանեց տնօրենը։

Հետաքրքրվեցինք, թե մարզպետարանի հետ տարաձայնություններ ունեցե՞լ է: «Ես մարզպետարանի հետ տարաձայնություն բացարձակ չեմ ունեցել՝ երբևէ, հատկապես կրթության վարչության հետ, մենք համատեղ շատ աշխատել ենք, արդյունավետ աշխատանք է իրականացվել այդ ամբողջ ընթացքում։ Գուցե իրե՞նք ունեն տարաձայնություն, իրենցից պետք է հարցնել։ Չգիտեմ, ամեն դեպքում, ես որևիցե տարաձայնություն չունեմ, ինքս պետականամետ մարդ եմ, ես մտածում եմ իմ պետության սահմանների, անվտանգության մասին և, լինելով մանկավարժ, դաստիարակում եմ երեխաներ և իմ օրինակով ցույց եմ տալիս, թե ինչպիսին պիտի լինի հայրենասեր մարդը, և ես ունեմ շրջանավարտներ, որոնք այս վերջին պատերազմին ինձ հետ միասին գտնվել են պատերազմում ու կռվել են թուրք ոսոխի դեմ։ Ես երբևէ չեմ ուզենա, որ իմ աշակերտը տեսնի, որ մանկավարժը, իր դպրոցի տնօրենը կյանքում որևէ մեկից կարող է վախենալ»,- պատասխանեց Բաբախանյանը։ 

Իսկ ճի՞շտ է, որ դիմում եք գրել, քանի որ հրաժարվել եք ընտրությունների ժամանակ հօգուտ իշխանության աշխատել՝ հարցրինք Բաբախանյանին: «Նման խոսակցություն չի եղել, ինձ առաջարկ չի արվել, թե ընտրությունների ժամանակ ում օգտին աշխատել։ Ընտրությունների ժամանակ ես լինելու եմ այն ուժի կողքին, որը պետական մտածելակերպ կունենա, որը կապահովի իմ պետության անվտանգությունը, որովհետև այս պետությունը ո՛չ կառավարությանն է, ո՛չ իշխանությանն է, ո՛չ մարզպետարանինն է, ո՛չ էլ որևիցե մի չինովնիկինն է։ Այս պետությունը բոլորինս է, նաև` իմը, իմ երեխաներինը, և ես չեմ պատրաստվում հանգիստ նստել, լռել կամ վախենալ ինչ-որ մի բանից և չարձագանքել, չասել ճշմարտությունը։ Ես անձնավորված որևէ մեկի դեմ որևէ բան չունեմ, եթե իմ պետական մտածելակերպը, եթե իմ այն մտքերը, գաղափարները, որոնք վերաբերում են պետական անվտանգությանը, դեմ են որևէ մեկին, ապա այդ մարդիկ խնդիր ունեն մտածելու, թե իրենք որ տեղում են գտնվում»,- պատասխանեց տնօրենը։ 

Բաբախանյանը դպրոցում կենսաբանություն է դասավանդում, նրան հարցրինք նաև, թե ճի՞շտ է, որ իրեն նաև ուսուցչի աշխատանքից են ցանկանում հեռացնել, տնօրենը պատասխանեց․ «Մարզպետարանից ինձ այդպիսի բան անձամբ որևէ մեկը չի ասել, այլ մարդու միջոցով ինձ փոխանցել են, որ ես նաև մանկավարժական գործունեություն չպիտի ծավալեմ, չգիտեմ՝ ինչու, ինչ վտանգ եմ ներկայացնում, գուցե ինչ-որ մեկին նեղացրե՞լ եմ։ Ես որևէ անձի նեղացնելու նպատակ չունեմ, ուղղակի գուցե ես որոշ անուններ տվել եմ՝ այդ մարդկանց ուղղակի հասկացնելու համար, որ իրենց դեմ ոչինչ չունեմ, իմ գրած ստատուսից ու իմ կարծիքից պետք չէ վախենալ, որովհետև ես մտածում եմ պետության մասին, որտեղ ապրում են նաև իրենց զավակները, և ես չեմ պատրաստվում երբևիցե դադարեցնել իմ մանկավարժական գործունեությունը, որովհետև դա ուղղակի դավաճանություն կլինի իմ երեխաների նկատմամբ»,- պատասխանեց Բաբախանյանը։