Սթափ որոշումների հրամայականը
COVID-19 համավարակը լուրջ տնտեսական ճգնաժամի առաջ է կանգնեցրել
աշխարհին և առաջիկա մի քանի տարիների կտրվածքով մտահոգիչ են ինչպես
համաշխարհային, այնպես էլ Հայաստանի տնտեսական կանխատեսումները:
Ճգնաժամը վերահաստատեց, որ երկրի համար դժվար պահին
հանքարդյունաբերությունը փրկօղակ է, որն ապահովում է բյուջետային
մուտքերի կայունությունը և հնարավորինս մեղմում տնտեսության կտրուկ
անկումը։ Ակնհայտ է, որ առանց հանքարդյունաբերության բերած
արտարժութային ներհոսքերի, բազմապատիկ ծանր է լինելու ֆինանսական հատվածի
և գների կայունության խնդիրը։
Միաժամանակ, մասնավոր տրանսֆերներին և զբոսաշրջության ոլորտում սպասվող
անորոշության պայմաններում մետաղական հանքարդյունաբերությունն առաջիկա
տարիներին շարունակելու է անվտանգության բարձիկի դեր կատարել՝ երկրի
տնտեսության ու բյուջեում մուտքերի ապահովման համար։
Արդեն իսկ ստեղծված տնտեսական և սոցիալական խնդիրները հաղթահարելու համար
անհրաժեշտ են երկարաժամկետ և իրական ծրագրեր, որոնց լուծման կարևորագույն
բանալիներից մեկը կարող է լինել հենց հանքարդյունաբերությունը: Ուստի,
այսօր, առավել քան երբևէ, անհրաժեշտություն է առաջացել վերաիմաստավորել
հանքարդյունաբերության ներուժը, վեր կանգնել ոլորտի հասցեին հնչող
մակերեսային և դեկլարատիվ տարբեր հայտարարություններից, մշակել և
իրականացնել գիտական հիմքով ոլորտի զարգացման երկարաժամկետ
ռազմավարություն: Հանքարդյունաբերության դերն անփոխարինելի է լինելու նաև
երկրի աճող պետական պարտքը սպասարկելու գործում` որպես ամենամեծ հարկային
ծանրաբեռնվածությամբ, ամենամեծ տնտեսական կումուլյատիվ էֆեկտով և
արտարժութային պոտենցիալով ճյուղ։
Լիահույս ենք, որ կառավարությունն ու գիտակից հասարակական շրջանակներն
այսօր ամբողջությամբ և իրատեսորեն են ընկալում հանքարդյունաբերության
անփոխարինելի դերը և պատրաստ են աջակցել՝ բնագավառը անպատասխանատու և
ապագիտական թիրախավորումից պաշտպանելու, ոլորտն ի շահ պետության
զարգացնելու հարցում՝ հատկապես այն դեպքում, երբ առկա է չօգտագործված
ռեսուրս, իսկ, ի հեճուկս տարածված միֆերի, ոլորտում ներդրումներ բերելը
պահանջում է ահռելի ջանքեր: Ժամանակն է գիտակցել, որ
հանքարդյունաբերության դեմոնիզացիայի արշավին տուրք տալը հարվածում է
հավասարակշռված և դիմացկուն տնտեսություն ունենալու մեր ընդհանուր
նպատակին:
Հանքագործների և մետալուրգների միությունն իր պատրաստակամությունն է
հայտնում աջակցելու ՀՀ կառավարությանը պատասխանատու
հանքարդյունաբերության ներդրման ջանքերում՝ ի նպաստ ճգնաժամի
հաղթահարման և երկրի տնտեսական կայունացման:
Հարգանքով՝
Հայաստանի հանքագործների և մետալուրգների միություն
Կարծիքներ