Պուտինը Թրամփին «կարևոր» պայման կառաջադրի. Bloomberg

ՌԴ նախագահ Վլադիմիր Պուտինը կպահանջի դադարեցնել զենքի բոլոր մատակարարումները Ուկրաինային ԱՄՆ նախագահ Դոնալդ Թրամփի առաջարկած զինադադարի ժամկետի ընթացքում։ 

Այս մասին հայտնում է Bloomberg-ը՝ հղում անելով Մոսկվայի աղբյուրներին։

Հրատարակության աղբյուրներն ընդգծել են, որ Թրամփի հատուկ բանագնաց Սթիվ Ուիտֆովի Մոսկվա կատարած այցի ժամանակ Պուտինը զինադադարի համաձայնագրի ստորագրման պարտադիր պայման է անվանել զենքի մատակարարումների դադարեցումը։

«Մինչ Ռուսաստանը ցանկանում է դադարեցնել զենքի բոլոր մատակարարումները Ուկրաինային, նրա նվազագույն նպատակն է դադարեցնել օգնությունն ԱՄՆ-ին», - ասում են գործակալության աղբյուրները Մոսկվայում:

Գործակալությունը նշում է, որ Վլադիմիր Պուտինի ձգտած զենքի մատակարարումների դադարեցումը ժամանակավոր է լինելու։  «Զենքի մատակարարումները կվերսկսվեն խաղաղ համաձայնագրի կնքումից հետո, որում Ուկրաինան պետք է համաձայնի սահմանափակել իր ռազմական ներուժը»,- ասվում է հրատարակության հոդվածում։

Իր հերթին, եվրոպացի մի անանուն պաշտոնյա ասել է, որ Եվրոպան չի համաձայնի Ռուսաստանի պահանջին՝ արգելափակել իր դաշնակիցների կողմից Ուկրաինային զենքի մատակարարումները ցանկացած «հրադադարի» ժամանակ։ Դոնալդ Թրամփը մարտի 17-ի առավոտյան հայտարարեց, որ պատրաստվում է զանգահարել Պուտինին և որ զրույցի ընթացքում ցանկանում է քննարկել Ռուսաստանի և Ուկրաինայի միջև հրադադարի, ինչպես նաև Զապորոժիեյի ատոմակայանի վերահսկողության հարցը։  Ռուսաստանի նախագահի մամուլի քարտուղար Դմիտրի Պեսկովը կեսօրին հաստատել է, որ զրույցը տեղի կունենա մարտի 18-ին։

Հիշեցնենք, որ մարտի 11-ին Սաուդյան Արաբիայում կայացած բանակցությունների ժամանակ Ուկրաինայի ներկայացուցիչները համաձայնել են 30 օր ժամկետով ժամանակավոր զինադադար մտցնելու ԱՄՆ առաջարկին։ 

Ռուսաստանի նախագահ Վլադիմիր Պուտինը հայտարարել է, որ համաձայն է մարտերը դադարեցնելու առաջարկին, սակայն դա պետք է հանգեցնի «երկարաժամկետ խաղաղության»։