«Հրապարակ». Մոտ օրերս թուրքամետ կուսակցությունը կհիմնադրվի

Մայիսի 20-ին տեղեկացել էինք, որ Երեւանում թուրքամետ կամ գուցե` թուրքական կուսակցություն հիմնադրելու փորձ են արել: Երեւանի ավագանու անդամ Մարինա Խաչատրյանն էր անդրադարձել բլոգեր Արթուր Չախոյանի ձերբակալությանը, ով փորձել էր խափանել նշված կուսակցության բացման համագումարը։ «Երեւանում՝ Խուլ ու համրերի կենտրոնում, նախատեսվում էր բացել թուրքական կուսակցություն, որի հետեւում կանգնած է Թուրքիայում բնակվող Նատալյա Ալեքսանյան ներկայացող անձնավորություն, ով իրականում առեւտրական Տաթեւիկն է։ Սույն տիկինն ինտերնետային տիրույթում ակտիվ քարոզով փորձել է ՀՀ-ում բացել թուրքական կուսակցություն, որի ղեկավար կազմի մեջ է մտնում նախկինում ԼՀԿ անդամ, այնուհետ Մգեր Արմենիայի կուսակցության անդամ Ռոման Նազարյանը»,- մեզ հետ զրույցում ասել էր Խաչատրյանը: Մենք տեղեկացանք, որ նախաձեռնողները պատրաստվում են իրենց «սեւ գործն» ավարտին հասցնել: Զրուցել ենք այդ կուսակցության ապագա նախագահ Ռոման Նազարյանի հետ:

- Ինչո՞ւ եք որոշել թրքամետ կուսակցություն հիմնադրել: Ի՞նչն է ձեզ դրան դրդել:

- Դա թուրքական կուսակցություն չէ, ինչպես ասում են, ո՞նց կարող ենք մենք նման բան բացել: Այդ կուսակցությունն ունի կանոնադրություն, ծրագիր, մեր գաղափարներից մեկը ՀՀ տարածքային ամբողջականության պահպանությունն ու սուվերենությունն է` տարածաշրջանում խաղաղությունը:

- Բայց Ձեր թիմակիցը` ոմն Նատալի, ով բնակվում է Թուրքիայում, ողջ որը թրքամետ քարոզ է անում:

- Նատալի Ալեքսանյանին է խոսքը վերաբերում, ով ապրում է Թուրքիայում, եւ դա է պատճառը, որ նրան թրքամետ են ասում, բայց այդ նույն հաջողությամբ ՀՅԴ-ն Ստամբուլում ու Անկարայում ունի գրասենյակ, մենք եկեղեցու թեմ ունենք այնտեղ, ուրեմն եկեղեցին թրքամե՞տ է:

- Այդ կինը բացահայտ թրքամետ է` Ալիեւին է գրավոր դիմել, խնդրանք հղել:

- Արա Բաբլոյանն էլ էր գրավոր Ալիեւին դիմել, հետո ի՞նչ, ասել էր, որ պատրաստ է բոլոր ադրբեջանցի երեխաներին օգնություն ցուցաբերել, հիմա ի՞նչ, նա թո՞ւրք է:

- Դուք երգիչ Մգեր Արմենիայի հետ կուսակցություն էիք հիմնել, ընդդիմադիր էիք, ռուսներին էիք գովաբանում, Հայաստանի փրկությունը միութենական պետության կազմում տեսնում, ինչպե՞ս հայտնվեցիք հակառակ բեւեռում:

- Այո, Մհերի հետ կուսակցություն էինք հիմնել` «Ազգի ձայն»-ը: Այն ժամանակ նոր էր ավարտվել պատերազմը, եւ ռուսները նոր էին ստանձնել արցախահայերի անվտանգությունը: Կյանքն ապացուցեց, որ ես էլ, բոլոր մարդկանց նման, սխալական եմ եղել՝ վստահելով ռուսներին: Արդյունքում եղավ այն, ինչ եղավ: Մեր արցախցիները բռնեցին գաղթի ճանապարհը, դա՝ այն դեպքում, երբ ռուսական կողմը մասնակից է եռակողմ համաձայնագրին: Պուտինը ստորագրել է, որ 5 տարի առնվազն մարդկանց անվտանգությունն ապահովելու է, բայց ոչ մի բան էլ չարեց, այդքանից հետո իրավունք ունե՞նք փոխել մեր տեսակետը:

- Բայց Դուք նաեւ այս իշխանություններին էիք դեմ, իսկ հիմա սկսել եք նրանց գովքն անել, ասում են` Աննա Հակոբյանն է ձեր կուսակցությանն օժանդակում:

- Նույն Նիկոլ Փաշինյանի հրաժարականը ռեալ ես ու Մհերն ենք պաշտպանել: Շուռնուխից քայլելով եկանք, Երեւան հասանք, իսկ նույն այսօրվա ընդդիմադիրները մեզ ծաղրում էին, հատկապես` քոչարյանականները:

- Տեղեկացանք, որ մոտ օրերս կուսակցության հիմնադիր համագումարն է: Կմանրամասնե՞ք:

- Կուսակցության անունը` Հայաստանի պետականակենտրոն կուսակցություն է: Այո, օրերս տեղի կունենա հիմնադիր համագումարը, մոտ օրերս հայտարարությամբ հանդես կգանք, կասենք, թե երբ է լինելու համագումարը: Վարչության գերակշիռ մասը պատերազմի թոհուբոհով անցած մարդիկ են, արյուն թափած տղերք են:

- Ի՞նչ պաշտոններ եք զբաղեցնելու Դուք եւ Նատալին:

- Նատալին չկա, հարգելիս: Ես լինելու եմ նախագահը: Վարչության կազմում էլ թուրքեր չկան:

- Բայց այդ կինը հայտարարել էր, որ Ձեզ հետ միասին կուսակցություն է հիմնում:

- Այո, ասել է, բայց դե յուրե ինքը ոչ մի փաստաթղթում չկա, եթե անգամ լիներ էլ, նա թուրք չէ:

- Ձեր կուսակցության գաղափարները պրոթուրքակա՞ն են:

- Մեր կուսակցության անունն արդեն իսկ խոսում է պետականամետության մասին: Մենք ո՛չ թուրքամետ ենք, ո՛չ եվրոպամետ, ո՛չ ռուսամետ, մենք հայամետ ենք: Մեզ համար հայի շահն է կարեւոր: Ես չգիտեմ, թե որ երկրի հետ է մեր շահը համընկնում: Պետք չէ դառնալ ինչ-որ մեկի խամաճիկը, բայց կարելի է համագործակցել: Ես այս իշխանությունների տեսակետը կիսում եմ, որովհետեւ մեր ընդդիմադիրները, հոգեւորականներն ո՞ւմ երեխաների հաշվին են ամպագոռգոռ հայտարարություններ անում:

- Բայց Փաշինյանը 6 տարում այնքան զոհ է տվել, որ նախկին երեք նախագահները միասին չեն տվել:

- Ես կիսում եմ Ձեր կարծիքը, որ սա խաղաղություն չէ, որ եղել են զոհեր, բայց, ի տարբերություն նախկին իշխանությունների, այս իշխանությունները գնում են Եռաբլուր, խոնարհվում, ծաղիկ դնում, դրան էլ գումարած՝ գումար են փոխհատուցում զոհերի հարազատներին: Այն տարիներին ես տեսել եմ, թե ինչպես են սեւազգեստ մորը Բաղրամյան 26-ից շպրտում:

- Հիմա էլ Եռաբլուրում են ծեծի ենթարկում զոհվածների ծնողներին: Փոխհատուցումներ անցյալում էլ էին տալիս` դա հին որոշում է: Եվ գումարով ինչպե՞ս եք չափում` մարդիկ ամենաթանկը` զավակներին են կորցրել:

- ՀԿ-ներ են բացում որոշ զոհվածների ծնողներ ու տրվել են ընդդիմության սադրանքներին, ընկել են նրանց խելքին:

- Մարդիկ զավակ են կորցրել, բնական է, որ ընդդիմադիր են դարձել նրանց մահվան պատճառ դարձած մարդկանց: Դուք Թուրքիայի հե՞տ եք տեսնում Հայաստանի ապագան:

- Ռուսաստանն անփոխարինելի չէ, պատմությունն ինչքան նայում ենք, Ռուսաստանի իշխանությունների թեթեւ ձեռքով է եղել: Թուրքիան պետք է ընդունի 15 թ. ցեղասպանությունն ու պատրաստակամ լինի փոխհատուցման, պետք է հետ գա Նախիջեւանը: