Արա Աբրահամյանը դժգոհ է, որ իրեն անձամբ նամակ չեն ուղարկել. ինտրիգներ Զարեհ Սինանյանի այցի շուրջ

Սփյուռքի գործերով գլխավոր հանձնակատար Զարեհ Սինանյանի այցը Ռուսաստան ուղեկցվեց տհաճ անակնկալով: «Ռուսաստանի հայերի միության» ղեկավարությունը փորձեց խոչընդոտել այն, կոպիտ արտահայտություններով նամակ ուղարկելով հանձնակատարի գրասենյակ: Սինանյանն, ինչպես հայտնի է, մինչև սեպտեմբերի 17-ը գտնվելու է Ռուսաստանում, հանդիպումներ է ունենում Մոսկվայի, Սանկտ Պետերբուրգի և Սոչիի հայկական համայնքային կառույցների ներկայացուցիչների, գործարարների, ուսանողների հետ: 

Եւ ահա սեպտեմբերի 12-ին, երբ Սինանյանը Սանկտ Պետերբուրգում էր, «Ռուսաստանի հայերի միության» Սոչիի մասնաճյուղը գրությամբ դիմում է ՀՀ սփյուռքի հանձնակատարի գրասենյակ, խնդրելով հետաձգել Սինանյանի այցը Սոչի, պատճառաբանելով այնտեղ ընթացող ՏԻՄ ընտրությունները: «ՌԴ-ում, Սոչի քաղաքում, ինչպես նաև Աբխազիայի հանրապետությունում տեղի ունեցող նախընտրական քարոզարշավի հետ կապված պարոն Զարեհ Սինանյանի այցելությունը համարում ենք ոչ նպատակահարմար և ոչ արդյունավետ: Ուստի խնդրում ենք հետաձգել այցը, ժամկետը նախապես համաձայնեցնելով «Ռուսաստանի հայերի միության» Մոսկվա քաղաքի ղեկավարության հետ», - ասված է գրության մեջ: 

Այն հասցեագրված էր սփյուռքի հանձնակատարի գրասենյակի աշխատակազմի ղեկավարի տեղակալ Երեմ Սիմոնյանին, և քանի որ Զարեհ Սինանյանը չէր պատասխանում մեր զանգերին, մեկնաբանության համար դիմեցինք պարոն Սիմոնյանին: Նա մեզ հայտնեց, որ Զարեհ Սինանյանը, չնայած այս գրության, այնուամենայնիվ, մեկնել է Սոչի, և այժմ գտնվում է այնտեղ: 

Ինչո՞վ էր խանգարելու Սինանյանի այցը ընտրություններին: 

«Դա հիմնականում պայմանավորված էր նրանով, որ քաղաքային խորհրդի  հայ համայնքի դեպուտատները այս պահին ընտրություններով են զբաղված և բացակայում են քաղաքից: Դուք գիտեք, որ Կրասնոդարի մարզում ու Աբխազիայում տեղական ինքնակառավարման մարմինների ընտրություններ են, և դեպուտատները հիմնականում խառն էին, - պարզաբանում է Երեմ Սիմոնյանը, - ես խոսեցի համայնքի ղեկավարի ու տեղակալի հետ, իրենք ասացին, եթե հնարավոր է՝ մի փոքր հետաձգենք, հիմա ոչ նպատակահարմար ժամանակահատված է, բայց այս պահին պարոն Սինանյանը այնտեղ է: Նա Սանկտ-Պետերբուրգից ժամանել է Սոչի»: Գրության մեջ հորդորում են համաձայնեցնել «Ռուսաստանի հայերի միության ղեկավարի հետ», գուցե, Արա Աբրահամյանը դժգո՞հ էր, որ իր հետ անձամբ չեք համաձայնեցրել: 

Մեր հարցին Երեմ Սիմոնյանը պատասխանեց. «Մենք նախապես համաձայնեցրել ենք բոլորի հետ, գրավոր ենք համաձայնեցրել: Իրենք ասում էին, որ ոչ միայն  հայերի միության տեղական մարմիններին ուղարկենք նամակը, այլ նույնաբովանդակ նամակ ստանա միության Մոսկվայի ղեկավարությունը»: Արդյո՞ք ինտրիգների հոտ չի առնում պարոն Սիմոնյանը: 

«Սկզբում ես էլ նման կերպ ընկալեցի, ճիշտն ասած: Մտածեցի, խնդիրը ո՞րն է, որ ոչ նպատակահարմար են համարում: Հետո, որ խոսեցինք, հասկացա, որ բառը ճիշտ չեն ընտրել, երևի: Այս պահին Սինանյանը Սոչիում է, հյուպատոսը, դեսպանատունը դիմավորել են, հայերի միության նախագահի տեղակալը՝ Գերման Սերգեեվիչ Անանյանցը անձամբ է եկել Մոսկվայից, Արա Աբրահամյանի հանձնարարությամբ: Ամեն ինչ ընթանում է համահունչ», - նշեց «Հրապարակի» հետ զրույցում սփյուռքի հանձնակատարի գրասենյակի ներկայացուցիչը: