Վերջին 20 տարվա ընտրություններում Գյումրին երբեք իշխանամետ չի եղել

«Հրապարակի» զրուցակիցը գյումրեցի նախկին պատգամավոր Վարդեւան Գրիգորյանն է:

- Պարոն Գրիգորյան, Գյումրին ՏԻՄ ընտրությունների է պատրաստվում: Այժմ ի՞նչ է կատարվում այդտեղ, ի՞նչ անուններ են շրջանառվում, ի՞նչ տրամադրություններ կան:

- Դե, ինչպես գիտենք, Բալասանյան դաշինքը հրաժարվեց, ավագանիները մանդատները վայր դրեցին, այսօր կարդացի ՔՊ կուսակցության ավագանու խմբակցության ղեկավարի հարցազրույցը, որ իրենք չեն պատրաստվում թեկնածու առաջադրել կամ քվեարկել ինչ-որ մեկի օգտին: Թե ինչ կլինի, դժվար է ասել, ՔՊ-ն արդեն հայտարարել է, որ իր թեկնածուն Սարուխանյան Կարենն է, մյուս թեկնածուների մասին էլ դեռ ոչ մի հստակ բան չկա:

- Թեկնածուներից մեկն էլ ՀՊՏՀ Գյումրու մասնաճյուղի տնօրեն Կարեն Պետրոսյանն է, որը հանրության շրջանում հայտնի է իր հակաեկեղեցական ակցիաներով, ասում են` նա Արամ Զավենիչի «Հանրապետություն» կուսակցության թեկնածուն է, թեպետ ինքն այդ լուրերը հերքում է: Կա՞ն թեկնածուներ, որոնց Դուք համարում եք արժանի:

- Պետք է նախ իմանալ, թե ովքեր են այդ թեկնածուները, որ նոր ասենք՝ արժանիներն ովքեր են: Պետրոսյան Կարենին ճանաչում եմ շատ լավ, ուսանող ժամանակներից գիտեմ, բայց վստահ էլ չեմ՝ առաջադրվելո՞ւ է, թե՞ ոչ:

- ՔՊ-ի թեկնածուի մասին ի՞նչ կարծիք ունեք:

- Նրան ընդհանրապես ծանոթ չեմ, մի տարի թեպետ աշխատեցի հետը, բայց չճանաչեցի իրեն: Հորն եմ շատ լավ ճանաչել, հասակակիցներ ենք եղել, մի թաղից էինք….

- Ստացվում է այնպես, որ այն բոլոր քաղաքներում, որտեղ իշխող ուժը` ՔՊ-ն, հաղթանակ չտարավ ու չկարողացավ ընթացքում իշխանությունը խլել հաղթած ուժից, հիմա էլ ամեն գնով նոր ընտրությունների է գնում:

- Այո, երբ անալիզ ես անում, այդպես է: Վանաձորում այդպես եղավ, նույնը բանը եղավ Ալավերդիում, Փարաքարում, Գորիսում են ինչ-որ պրոցեսներ գնում: Նմանություններն ակնհայտ են: Այսպես թե այնպես, ինչքան էլ որ ասում են` ադմինիստրատիվ լծակները չեն օգտագործվում ու չունեն դերակատարում, այդպես չէ, լավ էլ լծակներն օգտագործվում են, եւ կարող եմ նույնիսկ ասել, որ լուրջ դերակատարում ունեն գալիք համապետական ընտրությունների վրա: Իմ կարծիքով` հենց սա է պատճառը, որ իշխող ուժն այսպես է վարվում:

- Ընդդիմության մասին ի՞նչ կասեք: ՀՀԿ-ն, ԲՀԿ-ն, որի ակտիվ անդամներից էիք ժամանակին, ինչո՞ւ այս փուլում ակտիվ չեն: ԲՀԿ-ի հետ կապ ունե՞ք հիմա:

- Չէ, ճիշտն ասած, երկար ժամանակ կապ չունեմ, իհարկե, կուսակցությունից դուրս չեմ եկել, բայց կապ չունեմ:

- Այդ դեպքում ինչո՞ւ չեք շփվում:

- Խորը պատճառներ չկան, երեւի քաղաքական պրոցեսները ե՛ւ երկրում, ե՛ւ Շիրակի մարզում դասավորվեցին այնպես, որ այդպես եղավ: Քաղաքական պրոցեսներ այս ընթացքում չեն եղել` նախքան այս ընտրությունը, երեւի թե դա է պատճառը: Չեմ կարող հստակ ասել` ակտի՞վ են, թե՞ ոչ: Ճիշտն ասած, կոնկրետ խոսակցություններ իսկապես չկան, գուցե ճիշտը սպասելն է: Ընտրության օր նշանակվելուց հետո, ինձ թվում է՝ նոր ամեն ինչ հստակ կլինի:

- Գյումրիում մարդիկ ի՞նչ տրամադրություններ ունեն: Գո՞հ են գործող իշխանությունից, ՔՊ-ից, թե՞ ավելի շատ դժգոհ են:

- Վերցրեք վերջին 20 տարիների ընտրությունները եւ կտեսնեք, որ Գյումրին երբեք իշխանամետ չի եղել, երբեք ու երբեք: Գյումրին միշտ եղել է իշխանության դեմ, քան կողմ:

- Վերջին ընտրություններից էլ դա երեւաց:

- Գյումրեցիներն իրոք երբեք իշխանամետ չեն եղել:

- Ինչո՞վ է պայմանավորված դա:

- Շիրակի մարզը հանրապետության ամենաաղքատ մարզն է, գործազրկության ցուցանիշներով առաջին տեղում է, ամենագործազուրկ տարածքն է: Էլ ինչի՞ համար իշխանության օգտին ձայն տան, եթե, այսպես թե այնպես, ոչինչ չի փոխվում, իսկ գործազրկության հանգամանքը պայմանավորված է հենց իշխանությամբ: Տարիներ շարունակ Շիրակի մարզը նման վիճակում է:

- Ո՞րն է դրա պատճառը:

- Գյումրին նախկինում արդյունաբերական հզոր կենտրոն էր, այսօր մանր մի երկու-երեք ձեռնարկություն է աշխատում ընդամենը, ինչքան գիտեմ` ամենամեծ ընկերությունում մոտ 700 աշխատող կա ընդամենը: Այսինքն` մեծ ձեռնարկություններ ընդհանրապես չկան: Հիմնական աշխատատեղը մնացել է կրթական համակարգը՝ դպրոցները, բուհերը, բայց դե՝ այնպես չէ, որ այնտեղ էլ մեծ ծավալի աշխատողների կարիք կա:

- Իշխանություններն ասում են, որ զբոսաշրջությունը Հայաստանում ծաղկում է: Գյումրին այս առումով զարգացում չի՞ ապրել: 

- Տուրիզմի ակտիվացում կա, բայց դա որոշակի է ազդում մարզի վրա: