450 հազարի ձնծաղիկ ու «ռաշիրիտելի կրիշկա»․ Դիանա Գասպարյանի գնումների պլանը

Էջմիածնի քաղաքապետ Դիանա Գասպարյանի հաստատած՝ Էջմիածնի քաղաքապետարանի 2020 թվականի գնումների պլանը տնային տնտեսուհու առևտրի ցուցակ է հիշեցնում, որի տակ ամուսինը ավելացրել է նաև իրեն պետքական 1-2 ապրանք։ Էջմիածնի քաղաքապետարանի գնումների շրջանակն սկսվում է ձնծաղիկից և ավարտվում «ռաշիրիտելի կրիշկայով»։

Մասնավորապես՝ քաղաքապետարանի կարիքների համար Գասպարյանը պատրաստվում է գնել մինչև 3 հազար  փունջ ձնծաղիկ՝ 150 դրամով, 450 հազար դրամի չափով,  17 շիշ «Ֆանտա», 17 շիշ «կոլա», 2800 դրամի տավարի քաբաբ, 9 հազար դրամի շաուրմա, ֆրի, էլի «կոլա» ու «ֆանտա» ( այսուհետ՝ «ջրեղեն»), 5 հազարի «բոմբոներկա»,ֆրի, տանձ ու խնձոր, չիր ու չամիչ և այլն։

Այնուհետև սկսվում է «ամեն ինչ տան համար» բաժինը․ Զուգարանակոնքի մաքրող միջոց՝ 126 հազար, լվացքի փոշի, մաքրող հեղուկներ, «ավել-սավոկ»  և այլն։ Հետո արդեն գալիս են մեքենաների պահեստամասերը՝ «ռաշիրիտելի կրիշկա», «Զաշիտնիկ» և այլն։

Ի դեպ, պաշտոնական փաստաթուղթ համարվող գնումների պլանում, որը ստորագրել է քաղաքապետը, հենց այդպես էլ ձևակերպել են ՝ «ռաշիրիտելի կրիշկա» և «Զաշիտնիկ»։ Դիանա Գասպարյանի առևտուրն ամբողջությամբ կազմել է 20 մլն դրամ, մոտ 40 հազար դոլար։