Ինչ մեղքեր էլ բարդի նախկին նախագահների վրա, մեկ է`նրանք բանակցել են, իսկ հողերը տվել է ինքը

«Հրապարակը» զրուցել է «Հայաստան» խմբակցության պատգամավոր Հռիփսիմե Ստամբուլյանի հետ:

- Տիկին Ստամբուլյան, ԱԺ-կառավարություն հարցուպատասխանի ժամանակ վարչապետը Ձեր հարցից վրդովվեց, վիրավորական արտահայտություններ հնչեցրեց ընդդիմության հասցեին, հետո մատ թափ տվեց ու ասաց, որ պետք լինի՝ այլ բան էլ թափ կտա: Ինչ խոսք, այսօրինակ կեցվածքը, բառամթերքն ու վարքագիծը հարիր չէ վարչապետի պաշտոնին, սակայն այդուհանդերձ, եթե իրավիճակն այսպիսին է, ինչ իմաստ կա առհասարակ խորհրդարանում հարց-պատասխանին մասնակցելու:

- Ես առհասարակ երբեք վարչապետին նպատակահարմար չեմ համարել հարց ուղղել: Ինքն ինձ համար միշտ եղել է այն մարդը, որը չպետք է իմ հարցերին պատասխանի: Եթե ուշադիր հետևել եք իմ գործունեությանն, ապա կհիշեք, որ անգամ եղել է դեպք, որ ես ասել եմ, որ նա իմ հարցին չպատասխանի: Այն օրվա իմ հարցը շատ նորմալ հարց էր, որը հուզում է հասարակությանը, մասնավորապես` տնտեսագետներին, մենք փաստացի հացի պաշարի խնդիր ենք ունենալու և որևէ ավելորդ բան ես իրեն չէի ասել: Հողերն իսկապես հանձնվել են, նոյեմբերի 9-ի փաստաթուղթը ստորագրվել է իր կողմից, որքան էլ ղժղժա, ինչ էլ անի, մեկ է, մենք ունենք ցավալի փաստ: Հանձնված են հողերը, հացահատիկի դաշտերը թշնամու տիրապետության տակ են: Մենք հիմա ՌԴ-ից բավականին մեծ ծավալով հացահատիկ ենք ներկրում, սակայն եթե ՌԴ-ն պատժամիջոցների պատճառով հասավ այդ խնդրին, մենք կանգնելու ենք փաստի առաջ: Ժողովուրդն ունենալու է հացի խնդիր: Իմ հարցն, ըստ էության, ուղղված էր էկոնոմիկայի նախարարին, վարչապետին չէր ուղղված, պարզապես ինքը չգիտեմ ինչ իրավիճակում էր և ինչու որոշեց արձագանքել իմ հարցին:

- Ոմանք կասկածում են, որ այդպես արեց, որպեսզի ՌԴ-Ուկրաինա հակամարտության մասին հարցին չպատասխանի:

- Ես հիմա չեմ ցանկանում գուշակություններով զբաղվել, իսկապես ես չգիտեմ թե իր այդ հոգեվիճակն ինչով էր պայմանավորված և ինքն ինչու էր այդ վիճակում, սակայն մենք ունենք փաստ, որ իր քաղաքական կապիտալը նախկիններն են, թալանն է և այլն: Հասարակության մեջ ինքը դա է սերմանել: Իր ուժը դրա հիման վրա է: Ու երբ հարցեր են հնչում իրեն, որոնք այդ նույն ժողովրդի համար խիստ անհրաժեշտ են, ինքը փորձում է շրջանցել այդ հարցերը: Չի պատասխանում, ուղիղ պատասխան երբեք չի տալիս: Մարդկանց խոստացել էր, որ թանկացում Հայաստանում չի լինելու, բայց հիմա մենք ի՞նչ ենք տեսնում: Ունենք ահավոր մեծ թվերի հասնող արտագաղթ: Ցավալին այն է, որ արագաղթում են ոչ միայն իրեն ընտրողներն, այլև ազգային կապիտալ ունեցող անհատները: Մենք լրջագույն խնդիրների առաջ ենք կանգնել: Հայաստանից հեռանում է և ունեվորը, և չունեվորը:

- Բայց պատգամավոր Սոնա Ղազարյանն ասում է, որ սա իր երազած Հայաստանն է:

- Ես երբեք անձնավորված որևէ մեկին չեմ մեկնաբանում: Դա իմ ոճի մեջ չէ, հատկապես, երբ խոսքը կնոջ մասին է: Եթե մեր երազած հայրենիքը մի ամբողջ սերունդ չունենալն է, ապա ավելորդ է խոսելը: Խոսում են Մադրիդյան սկզբունքների մասին: Այդ մարդիկ իրենց ամբողջ կյանքում այնքան ոչինչ չեն ստեղծել ու կառավարել, որ անգամ չեն էլ հասկանում` մի բան է բանակցել, մի բան է ստորագրելը: Ուզեն, թե ոչ, իրենք են այդ փաստաթղթի տակ ստորագրել: Ինչ մեղքեր էլ որ բարդեն նախկին նախագահների վրա, մեկ է` նրանք բանակցել են, բայց տվե՞լ են այդ հողերը: Կամ բանակցությունների մեջ երբևէ եղե՞լ է Հադրութի և Շուշիի հարցը: Կամ առհասարակ եղե՞լ է, որ բանակցությունը լինի միայն հող տալու մասին: Երբևէ նման բան չի եղել: Ցանկացած բանակցություն լինում են երկկողմանի: Մենք այսօր ունենք մի փաստ, որ մեր մեջքի ետևում փաստաթուղթ է ստորագրվել:

- Իսկ գուցե ընդդիմադիր խմբակցություններն այլևս չմասնակցե՞ն հարց-պատասխանին: Դուք էլ Ձեր խոսքում նշում եք, որ վարչապետն այնուամենայնիվ չի պատասխանում հարցերին, կամ պատասխանում է այնպես, ինչպես ինքն է ցանկանում:

- Խմբակցությունը դեռևս չունի նման որոշում, ես պատասխանից զերծ կմնամ:

- Դուք տեսնո՞ւմ եք իմաստ վարչապետին հարց ուղղելու:

- Ես այնքանով եմ իմաստ տեսնում, որ գոնե այդ հարց-պատասխանի ընթացքում իրեն ընտրած մեր շատ սիրելի քաղաքացիները երեւի հասկանում են, որ միայն ստով և կեղծիքով, անվերջ նախկինների թեզերն առաջ տանելով իշխանություն պահել հնարավոր չէ: Իրեն ընտրած քաղաքացիներն էլ սա հասկանալու են և ոտքի են կանգնելու, ես իրականում այդ տենդենցը տեսնում եմ: Այսօր իմ հնչեցրած հարցերը հուզում են քաղաքացիներին: Քաղաքացիներն ունեն հացի խնդիր, թանկացումներ են, կարող ենք ունենալ նաև հացահատիկի խնդիր: Իմ հարցը հուզում էր ցանկացածին: Իսկ կմասնակցենք հաջորդ հարց-պատասխանին, թե ոչ, դա կորոշվի ֆրակցիայի մեծամասնության կողմից:

- Շատ է խոսվում նաև ընդդիմության՝ մանդատները վայր դնել-չդնելու մասին: Չե՞ք ցանկանում վայր դնել մանդատները:

- Բազմաթիվ անգամ անդրադարձել եմ այդ հարցին: Մանդատ վայր դնելը հարցի լուծում չէ: Ինձ համար մանդատը կարևոր չէ: Ես թողել եմ իմ բոլոր կարևոր գործերը, և եկել եմ իմ հայրենիքի համար ինչ-որ մի լավ բան անելու: Իրականում ԱԺ գալով ես մյուս կողմում շատ բան եմ թողել: Եթե պատերազմ չլիներ, եթե չլիներ այս իրավիճակը, ես ինքս ԱԺ չէի գա: Այսինքն` մանդատ դնելու հարցը, հարցի լուծում չէ:

- Ստացվում է այնպես, որ իշխանություններն ինչ ուզում, անում են, իսկ ընդդիմությունը որևէ կերպ նրա գործողությունների վրա ազդել չի կարողանում: Օրինակ` նախագահի ընտրության հարցը: Իշխող ուժն ում ցանկացավ, առաջադրեց ու ընտրեց, ընդդիմադիր երկու խմբակցությունները ոչինչ անել չկարողացան: Ի վերջո, մանդատներն ի՞նչ են տալիս ընդդիմադիրներին: 

- Այո, այս պահի դրությամբ այդպես է ստացվում, իրենք ինչ ցանկանում՝ բանակցում են, հետո գալիս ասում են, որ Մադրիդյան սկզբունքներն են պատճառը, չնայած, որ իրենք այդ սկզբունքներից հրաժարվել են: Քաղաքացիները մեզ վստահել են, մենք խորհրդարան ենք եկել, հիմա թողնենք՝ հեռանանք, դա հարցի լուծում չէ: Ես ինքս կառչած չեմ մանդատին, բայց ես եկել եմ ԱԺ առաքելությամբ: Եթե ես իմանամ, որ մեր գնալով ինչ-որ հարց կլուծվի, առաջին մանդատը վայր դնողը ես կլինեմ, բայց ես վստահ եմ, որ դրանով հարց չի լուծվելու: