Քոչարյանը Ռուսաստանի մեծ բարեկամն է․ ՌԴ նախագահի մամուլի խոսնակ

ՀՀ նախկին նախագահ Ռոբերտ Քոչարյանը Ռուսաստանին բարեկամ քաղաքական գործիչ է։

Ռուսական «ՌԵԳՆՈՒՄ» տեղեկատվական գործակալության հաղորդմամբ ասել է Ռուսաստանի Դաշնության նախագահի մամուլի խոսնակ Դիմտրի Պեսկովը՝ անդրադառնալով ՀՀ երկրորդ նախագահ Ռոբերտ Քոչարյանին։

Նշենք, որ Քոչարյանն այսօր ասուլիս է տվել ռուսական լրատվամիջոցներին։

«Ռոբերտ Սեդրակովիչն ինքը, իհարկե, Ռուսաստանի մեծ բարեկամն է: Նա Հայաստանի համար օգուտների և հետագայում փոխգործակցությունը Ռուսաստանի հետ զարգացնելու ու խորացնելու համոզված կողմնակից է», - նշել է Պեսկովը:

Այս կերպ Կրեմլի խոսնակը մեկնաբանել է այն լուրերը, որ Քոչարյանը համակարգում է իր գործողությունները Մոսկվայի հետ` կապված Հայաստանի քաղաքական կյանքին մասնակցելու ցանկության հետ:

Պեսկովը շեշտել է, որ Քոչարյանը մարդ է, որը քիչ ջանքեր չի ներդրել Հայաստանի զարգացման գործում: ՌԴ ղեկավարի մամուլի խոսնակը նաև նշել է, որ հայ քաղաքական գործիչների մեծ մասը Ռուսաստանի հետ հարաբերությունների հետագա ամրապնդման կողմնակիցներ են։