Ի՞նչ ակնկալիք ունի Ռուսաստանը Կիևի հետ բանակցություններից. հայտարարություն

Ստամբուլում գտնվող ռուսական պատվիրակության ղեկավար, Ռուսաստանի նախագահի օգնական Վլադիմիր Մեդինսկին հայտարարել է, որ ռուսական պատվիրակությունը Ստամբուլում ընթացող բանակցությունները դիտարկում է որպես 2022 թվականին ընդհատված խաղաղության գործընթացի շարունակություն։

«Ուղիղ բանակցությունների նպատակն է երկարատև խաղաղություն հաստատել՝ վերացնելով հակամարտության արմատական ​​պատճառները», - ասելէ Մեդինսկին։

Նրա խոսքով՝ Մոսկվան վճռական է «փնտրելու հնարավոր լուծումներ և շփման կետեր»։

Մեդինսկին հայտարարել է, որ Ռուսաստանի նախագահ Վլադիմիր Պուտինի կողմից հաստատված պատվիրակությունն ունի «բոլոր անհրաժեշտ իրավասություններն ու լիազորությունները»։

Ռուսաստանի նախագահ Վլադիմիր Պուտինը երեկ ուշ երեկոյան հաստատել է Ուկրաինայի հետ բանակցությունների պատվիրակության կազմը։ Բանակցային խումբը գլխավորող Վլադիմիր Մեդինսկուց բացի, խմբի կազմում են փոխարտգործնախարար Միխայիլ Գալուզինը, Գլխավոր շտաբի գլխավոր վարչության պետ Իգոր Կոստյուկովը և պաշտպանության փոխնախարար Ալեքսանդր Ֆոմինը, ինչպես նաև մի քանի փորձագետներ։

Ուկրաինական պատվիրակությունը գլխավորում է Ուկրաինայի պաշտպանության նախարար Ռուստեմ Ումերովը, ով վերջերս Անկարայից մեկնել էր Ստամբուլ։

Ռուսական պատվիրակության ղեկավարը չի նշել, թե երբ կսկսվեն բանակցությունները։ Զելենսկին Անկարայում կայացած ճեպազրույցի ժամանակ ասել է, որ դրանք կարող են սկսվել կամ մայիսի 15-ին, կամ ուրբաթ՝ 16-ին։ «Ինտերֆաքս»-ը հաղորդում է, որ ռուսական պատվիրակությունը մեկնել է Ստամբուլի Դոլմաբահչե պալատ, որտեղ նախատեսված են բանակցություններ ուկրաինական կողմի հետ։

Ավելի վաղ Մեդինսկին հայտարարել էր, որ Ռուսաստանը պատրաստ է փոխզիջումների։ «Մենք աշխատանքային տրամադրվածություն ունենք. բոլոր շահագրգիռ գերատեսչությունների ղեկավարությունը ներկա է այստեղ՝ որպես պատվիրակության մաս», - ասել է նա։