Աշխարհը եւ կյանքի շարժումը
Սկսենք հիմքից․․․ Որևէ մեկը, որ ապրում է՝ դիակ չէ - ցույց տալու համար իր գոյությունը, իր երևացող ու աներևույթ էությունը - անում է մի բան։ (բանն է սկիզբը)։
Աշխատավոր մարդն անում է իր գործն իր ձեռով, օգտագործելով իր փոքր կարողությունը։ Նոբելը գյուտեր էր անում և դրանց հետագա արդյունքը կտակում մարդկանց, որոնց կյանքի նպատակը կլինեին նոր գյուտերը։ Պուտինը, Բայդենը և նրանց տեսակն ամբողջ աշխարհում սարքում են սատանայական բանսարկություններ, ցույց տալու համար, որ իրենք են կառավարում աշխարհի շարժման ընթացքը և շարժում հիմարների կամքն ու չնչին ոգին։ Մտածողները - հին հույներից, սկսած Սոկրատից մինչև հրեա իմաստունների, մարգարեների ու քրիստոնեական մտածողությունը - փորձում էին աշխարհի կառավարումը հանձնել բարոյականությանը։ Այն գործում է մինչև այսօր՝ փչելով վերջին շունչը։ Գյոթեն, Նիցշեն, նրանց նմաններն ու հետևորդները, օրինակ՝ Ջեյմս Օլդրիջը, Ռոբերտ Քերզոնը, մնում են անընկալելի սահմանափակ մտքի տեր մարդկանց համար։
Որովհետև սրանց՝ սահմանափակ մտքի տեր մարդկանց մտածողությունը հնաոճ է՝ ստրուկի մտածողություն՝ պատմություններ առանց գնահատականների ու փաստերի - համաձայն ստացած կրթության ու դաստիարակության փշրանքների և բարոյապաշտական ստորաքարշության։ Բոլոր մարդկանց մեջ բարոյապաշտները ամենավտանգավորներն ու ամենաչնչիններն են, որովհետև նրանք զոհերն են իրենց իսկ հասկացած բարության։ Սրանց բարությունը արհեստական ճանապարհով ձեռք բերված բարություն է, ինչպես եկեղեցականի բարությունը՝ այն ավելի երեսպաշտություն է - բարեպաշտություն առանց բարի լինելու։ Բարությունը ի բնե տրված հատկություն է, որը գիտակցվում և ուժեղանում է մարդու փորձով՝ բնական ճանապարհով - ոչ թե մետաֆիզիկական հայեցողությամբ և բարոյապաշտության ստորաքարշությամբ։
Կարելի է, առանց սխալվելու ռիսկի ասել, որ ասորիների հսկայական քաղաքակրթության կործանման հիմնական պատճառը եղավ մոլեգնած բարեպաշտությունը՝ Քրիստոսը աստվա՞ծ է, թե՞ մարդ։ Նույնն է հույների, ղպտիների, Հռոմի և, անշուշտ, Բյուզանդիայի ու Հայաստանի կործանման պատճառը՝ բարեպաշտությունը։
Բարեպաշտներից ավելի այսօր վտանգավոր են դիվանագետները։ Դրանցից ամենազազրելին, իհարկե, անգլիացիներն են, ամենագռեհիկները՝ թուրքերը, իսկ ամենաիդեալիստներն ու անկարողները հայերն են - միշտ մնում են նույնը, առանց զարգանալու և նորը սովորելու ցանկության։ Այնպես որ, սիրելի հայրենակիցներ, զսպեք ձեր մռայլ եզրակացությւոնները և լողացեք հոսանքի ուղղությամբ… Մենք, այսինքն մեր դիվանագետները, հայ են և կրում են ցեղի ավանդույթները՝ պարկեշտություն, ճշմարտացիություն ու եղբայրություն։ Միայն տանն ենք՝ ներքին կյանքում բզկտում իրար եղբայրաբար․․․ Իսկ դրսինները, անգլիացիները, թուրքերը, ռուսները, ի տարբերություն մեզ, պերճախոս են, սրամիտ են, հարուստ են, մաղձոտ չեն, նենգ են ու լկտի և հարգված։ Ինչ էլ անեն - օրինական է նրանց արածը, ինչպիսի խարդախություններ էլ անեն այդ կրթված ու պարկեշտ մարդիկ՝ օրինական է, որովհետև մեղավոր չեն իրենք, որ կան ծեծված ու ճնշված ժողովուրդներ, որոնք անկարող են կառավարել իրենց ճակատագիրը և որ կարիքից ու ստրկացումից ազատ ժողովուրդներն ունեն իրենց նպատակներն ու օգուտները պաշտպանելու զորություն․․․
Պարտավոր ենք հիշել, որ ապրում ենք դաժան մրցակցության, անամոթ-արյունռուշտ մորթապաշտների և չնչին էգոիստների աշխարհում՝ ինչքան էլ երգենք դեմոկրատիայի և մարդու իրավունքների քաղցր, մշուշապատ, իմաստ չպարունակող հիմները, մարդու միտքը սահմանափակ է, հայի միտքը, ոգին՝ առավելապես – հավերժական անշարժ, հավերժական ինքնագոհ, ինքնահավան կենցաղի, ժուռնալիստիկայի մեջ համատարած՝ պարզամիտ, մոլեգին փառասիրություն, իսկ երբ գործը հասնում է իսկական արժեքների ճանաչմանը - սկսվում է առնետների ապրուստ փախցնելու մոլեգնությունը, ատամների, ժանիքների շնշնկոցը, աչքերի դաժան, մոլեգին փայլը - հանկարծ չհռչակվի, չգնահատվի մեկը, որ իրենցից չէ, իրենց աղբանոցից չէ։
Ես խոսում եմ արվեստի, մարդկանց մասին, որովհետև արվեստը շարժում է՝ մտքի շարժում, ոգու շարժում, առաջադիմության շարժում ու դաստիարակություն։ Այս մասին ոչ ոք ոչինչ չի խոսում։ Խոսում են փառամոլության, սնափառության, ագահության մասին։ Չնչին են մեր հերոսները - «Գիքորը», «Ո՞վ կհաղթեր քաջ Թաթուլին․․․», Մոսին թոլ էլավ, Սարոն սպանվեց, Անուշը խելագարվեց․․․ Հերոսների հերոսը՝ ճանճ ջարդող քաջ Նազարը, «Գելն ու գառը», «Փախր այծյամ, փախիր - որսոդն է գալիս…»։ Մոր կաթի հետ մեր մանկիկը թույն է ծծում և ուզում ենք մտածողներ ու հերոսներ ունենա՞լ։ Սա մենք չենք գիտակցում։ Ընդհակառակը՝ փառաբանում ենք և միլիոններով հրատարակում և տարածում աշխարհով մեկ՝ որտեղ հայ կա, կա հայի շունչ, կա հայի երեխա, կա հայի հոտ, բայց չկա այն, ինչ ունեն ուժեղ, բարգավաճ, զարգացած, ապագայի մասին մտածող, մտավոր որակներով ապրող մարդիկ։ Մտածենք՝ ո՞ւմ հետ ենք մեզ համեմատում, ո՞ւմ հոգուց ենք սնվում – Բալզակի, Դիդրոյի, Ռոմեն Ռոլանի, Ժան-Ժակ Ռուսոյի, թե՞ ինչ-որ…
Պարտադիր չէ, որ հայը ծնի Բեթհովեն և նրա 9-րդ սիմֆոնիան։ Բայց մտածող մարդու համար պարտադիր է, ճահճում չհայտնվելու և միտքը, հետևաբար, ոգին ուժեղացնելու համար, ծանոթ լինել եվրոպական մշակույթի գոնե փշրանքներին։ Գրականության, փիլիսոփայության, էթիկա, քաղաքականության, դասական երաժշտության և, ընդհանրապես, սովորել մտածել՝ ինչն է ճշմարտանման և ինչը լկտի, ցինիկ կեղծիք, ինչ է արարելը և ինչը կործանելը, ովքեր են ցուցամոլ ավրոմոլները քաղաքականության ու մտածողության ոլորտներում և ովքեր նրանք, որոնք փնտրում են կյանքը չթունավորող, առողջ ողջախոհություն ու արիություն, պաշտպանելու համար թույն ու անկարողություն տարածող փառամոլ, անկիրթ-դատարկաբան, կեղծավոր-հայերենապաշտ այս րոպեական օգտապաշտներից։
Ինչո՞ւ եմ ասում այս բոլորը: Ասում եմ, որովհետև մարդու ապրելու էթիկական խնդիրն ավելի բարձր է, քան ցանկացած ժողովրդի գոյության խնդիրը: Եթե ուզում ենք հարատևել, պետք է հասկանանք մեր արմատական հիվանդությունները - ովքե՞ր ենք մենք։ Ինչո՞ւ ենք խեղճ ու հալածված, ծեծված ու ճնշված: Այս հարցերը մենք մեզ չենք տալիս՝ վախենում ենք մեր հպարտության ու ինքնասիրության նվաստացումից: Եվ հակառակը՝ մեծախոսում ենք – թաքցնելու համար մեզանից մեր խեղճությունը: Ստում ենք, կեղծում ենք, խաբում ենք ինքներս մեզ, ինչպես մարդասպանը՝ հանկարծ դառնում է մոլեգին աստվածապաշտ - խաղում է, իբր խիղճն է արթնացել։ Այսպես՝ երեսպաշտությունը սրբացրել ենք դարերով, և բզկտում ենք իրար ամեն տեղ և ամեն քայլափոխի - դառել է սովորություն, բնազդ - սովորական աշխատավոր մա՞րդ, թե մտքի, արվեստի, պետական գործչի - բոլորը կեղծում են, բոլորը խաղում են, բոլորը քանդում են՝ քար առ քար, տուն առ տուն, պետություն, մտածողություն, հայրենիք, էթիկա ու վարք - և, ի վերջո – այլասերում ու կործանում – մտքի, մտածողության կործանում, հաղթում է երեսպաշտների ոհմակը և մեռնում է հայրենիքը, սպանում են հայրենիքն ու նրա լավագույն, ազնվագույն, նվիրված զավակներին և նրանց նվիրական երազանքները – ազատության, ազնվության և եղբայրության երազանքները՝ հանուն փառասիրության, հանուն իշխանական տենչանքի բավարարման, հանուն հարստանալու և հրամայելու իրավունքի, հանուն կառավարման ու բռնության տենչանքի: Տեր-Պետրոսյանը 1991-96 թվերի ընթացքում կործանեց ու ոչնչացրեց հայ մարդու 70 տարվա ստեղծածը՝ մահը, ապականությունը – բացառապես բոլոր խավերի – սառնամանիք, խավար, հացի հերթեր, անտառների ու այգիների ոչնչացում տաքանալու համար, հարյուր հազարների գաղթը, հարյուր հազարների մահը, հազարավոր գործարանների ջարդը, թափոնի վերածելն ու վաճառքը պարսիկներին: Եվ ոչինչ՝ վայելում է մարդը - և՛ պատիվ, և՛ հարգանք, և՛ առանձնահատուկ սպասարկում, և մեծարում, և՛ իշխանական պահվածք ու լուռ սարկազմ՝ հանդեպ նրանց, ում սպանել կամ ապականել է նրա սադիստական ոգին և որոնք այսօր էլ չեն ըմբռնվել:
Սրանց ստրկապաշտ ոգին խոնարհվում է, ինչպես շնիկները, որոնք ծեծվել են տիրոջ ձեռքերով և որպես հավատարիմ անասուններ, լիզում են այդ ձեռքերը: Քոչարյանն ու Սերժը՝ նրա գործը շարունակող մանրիկ, անխոհեմ, գավառաբարո, ավազակաբարո, մանկամիտ աշակերտներ են ընդհամենը: Ի՞նչն է սրանց մղում այսպիսի վարքի: Այս հարցը մեզ համար, մեր չնչին մտքի համար, անքննելի է:
Ոգեշունչ իդեալիստները, սկսած Բյուզանդիայի աղքատ, հալածված ու գազազած, որմնախորշերում ապրած տականքի փրկության գաղափարներով ներծծված լուսավորչից, դարերով, մինչև այսօր էլ՝ ու դեռ ինչքան ժամանակ էլ, բզկտելու են մեր կյանքը, քանի դեռ անասնական, գազանային, խելագար կամ կիսախելագար կիսակրթված խուժանն է կառավարելու ոգին ցեղի, որի անունն է հայ: Սրանք այն մարդիկ են, որոնք գերհաճույք են ստանում – տևականորեն - արյան և դիակի հոտից: Լուսավորիչը սրբերի շարքն է դասվել: Ինչո՞ւ, արդարորեն, այդ շարքը չի կարող դասվել նաև Լևոն Տեր-Պետրոսյանը, և նրա գործը շարունակողները: Սրանք խելագարներ են, այսինքն մարդիկ, որոնց ողորմելի միտքը չի կարող զսպել բնատուր գազանային ոգին ու կամքը: Այս միտքը ապացուցել են ամենահամոզիչ փաստարկներով մարդկության երբևէ արարած երկու մեծագույն մտածողները – Սպինոզան (հրեա) և Գյոթեն (գերմանացի)։
Այս օրինակները բերում եմ հասկանալու համար մեր ճակատագրի բուն ընթացքը և մտածելու համար մեր վաղվա օրը, վաղվա ապագան: Բայց սրանց տեսակի փառամոլ ճիվաղները չեն միայն մեր ճակատագիրը կառուցողները: Մեր առաջադիմության ճանապարհին կանգնած են շատ-շատերը՝ անգիտակցաբար, տգիտությամբ պայմանավորված: Օրինակ՝ գիրքը այրել, ինչպես Հիտլերի ֆաշիստները կամ ինկվիզիցիան, թե չհրատարակել, այն պատճառաբանությամբ, թե «փող չի բերի», նույն բանը չէ՞: Ի՞նչ տարբերություն: Երկու դեպքում էլ անհետ կորչում են մտքերը, զգացումները, նպատակները, գաղափարները, որոնք կարող են ծնել նոր մտքեր, զգացումներ, գաղափարներ, նոր աշխարհայացք, նոր ճաշակ, նոր ապրելակերպ, նոր, թարմ վարք, ծնել ինչ-որ նոր ապրելակերպի բեղուն ծիլեր: Կամ հրատարակիչը ինչպե՞ս է հասկանում որ «փող չի բերի»: Չէ՞ որ ընթերցող մարդիկ տարբեր են – մեկին աղբով ու թույնով կհրապուրեն, իսկ մյուսին՝ հրապուրում է հարուստ բովանդակությունը, բարձր ճաշակը, իմացության կիրքը, կյանքի խորությունն ու ժողովրդի ապագան:
Ի՞նչ արած՝ մեր տգիտությունը մեզ հետ է հավերժ, հետևաբար և՝ ճակատագիրը: Սպասել արդեն անհնար է: Պետք է մտածել… Եթե հրատարակիչը վաշխառու է, նրա ձեռը պետք է կտրվի, ինչպես գողի ձեռը մեր հարևան մահմեդական երկրում: Պետք է սովորեցնել մտածելու արվեստը և ոչ թե հարյուր երեսուն տարի շախմատ խաղալ՝ առանց մտածելու հաջորդ քայլերը, կամ ինչպես նորագույնները, որոնք կիսատ-պռատ կարող են ամեն ինչի հիմքում դնել կոռուպցիոն այլասերվածությունը, որը նույնպես արդյունք է չարարակամության, անպատասխանատվության տգետ այլասերվածության, տգետ, բռնակալ կամքի ագահության: Մեր կյանքի մթնոլորտը շատ նման է հնավաճառ սև շուկայի՝ ամեն ինչ կարելի է գտնել՝ բայց օգտագործված, բանեցված, քրքրված կամ ժանգոտված, կիսամաշ, որոնց կարիքը ունեն կարիքավոր ողորմելի աղքատները… Հազար յոթ հարյուր տարի է ինչ բացվել է մեր սև շուկան և գործում անարգել՝ հարուստները նույնպես օգտվում են այդ շուկայից, որովհետև ուրիշը չկա… Եվ իրենց հագուստն ու միտքը հարստացնում այդ շուկայի բարքերով…
Քնած է մեր միտքը: Բայց արթուն է երևակայությունը և հրեշներ է ծնում: Ինքնատելության ժանտախտը ոչնչացնում է մեզ, ինքներս մեզ քշում ենք դեպի անդունդը: Բայց հույսի նշույլ նույնպես կա: Թույլ, աննշմար, արթնացող մանկան պես անմեղ ու երջանկություն խոստացող: Հիմա մարդու ոգին, տղամարդու ոգին, ավելի զգալի է: Անշտապ հեռանում է անմիտ, խղճուկ, ստրկական կենցաղի ավանդական կույր ոգին և, նույնպես անշտապ, արթնանում է մարդու, տղամարդու, ինքն իրեն ճանաչող ու տրամաբանորեն գործող, հասկացող ու մտածող ոգին: Կայծը բռնկվել է: Բռնկվել է մենք մեզ վերադառնալու, վերադառնալու այն բանին, ինչպիսին եղել ենք: Սա ոգու և բանականության, տղամարդու, ոչ թե առևտրականի, փողի, վաշխառուի գծուծ ու հոտած ուղեղների հոգեբանություն է: Այս ծիլերը հավերժական են ազնիվ տեսակի գեներում – սա պետք է ըմբռնել և հոգալ բազմանալու: Ինքնաբազմացումը հավերժական է, անվերջ է, բայց աննշմար, դանդաղ: Ո՞վ կարագացնի – սա է խնդիրը: Արագացնել հատուկ խնամքով, նպատակադրված, ինչպես անում են ազնվական անգլիացիները՝ հատուկ դպրոցներում և մեր հարևան ղզլբաշ վայրի քրդերը իրենց սարերում: Տասնվեց տարեկան տղան արդեն ունի իր ձին, հրացանը և պաշտպանում է իր ընտանիքը թուրքի ավազակներից: Իսկ նրա 14 տարեկան քույրը՝ առողջ, գեղեցիկ կառուցվածքով, ընտանիքի այծերի հոտն է արածեցնում սարերի լանջին, անտառներում կամ ձորերում: Մենակ, քաջ ու անվախ: Նրանք ոչխար չեն խնամում: Միայն այծեր, որոնք ձմռանն էլ կարող են հոգալ իրենց ապրուստը ծառերի թփերով: Իսկ մեր պատանիները, երբ դեռ ապրում էին այնտեղ, հայրենիքում - շտապում էին Ստամբուլ բեռնակիր դառնալու կամ հացթուխ: Փող էին վաստակում տղերքը, իսկ տունը, երեխաները, այգիները, դաշտերը մշակում ու ծերանում էին մենակ, անտղամարդ մայրիկներն ու հարսիկները: Եվ հորինում էին հայրեններ – սիրո ու կարոտի երգեր: Սրանց պաշտպանությունը նույնպես ստանձնում էին ղզլբաշ պատանիները: Այսօր էլ այդ վայրի ղզլբաշները ապրում են իրենց հայրենիքում՝ ձիով, հրացաններով, իրենց կենցաղով և քաջությամբ… Իսկ մեր տղաները այսօր էլ շտապում են խոպան փող աշխատելու, կամ քարշ գալիս Երևանի փողոցներում գարեջրի բաժակը ցուցադրաբար խաղացնելով ձեռքերի մեջ:
Խառնակ բնավորություն, մանրախնդիր ապուշ ու հերոս երևալու անհաղթահարելի ցուցամոլություն: Անշուշտ, նրա պապը եղել է համբալ, հայրը ավտոլվացողը, ինքը կլինի, ամենաշատը, խոհարար: Ինչի՞ն է պետք գիրք կարդալ կամ զենք բռնել: Էշ ծնվածը էշ էլ կմեծանա: Թամբողներ ու ճիպոտով քշողներ կգտնվեն… Ով կթամբի և ով կքշի ճիպոտով կամ առանց ճիպոտի: Ապագան ցույց կտա…
Ժողովրդի հավաքական ոգին՝ ապրելու ոգին, նույնն է, ինչ բերքաբեր հողի ոգին – այն չպետք է թողնել բախտի քմահաճույքին, պետք է մշակվի, խնամվի, գուրգուրվի, ինչպես գուրգուրվում է հողը հոգատար տիրոջ կողմից, կամ երեխան՝ ծնողի: Ինքնագործ ժողովուրդը նման է որբի – կամ կդառնա մարդ՝ պատահականությամբ, կամ հանցագործ ոհմակի կամակատար անդամ:
Զարգացման, փոփոխման կարող են մղել այս մտքերը, զարգացումն ու փոփոխումը գիտակցող մարդիկ: Հայ միտքը բորբոսնել, փափկել ու կիսադիակային վիճակի է հասել՝ ասում են: Բայց, գուցե միամտորեն, ես դեռ հավատում եմ, որ դեռ կան մարդիկ, որոնց համար դեռ կա արևի լույսը, դաշտի կանաչն ու փոթորկից հետո հանդարտվող ծովը: Հավատում եմ, որ ոչ բոլոր հայերն են վերածվել փտող ու հոտող կենդանի դիակների: Դիակները թող մեռնեն՝ հենց այսօր: Իսկ ապրողները պիտի պայքարեն և ապրեն: Սա է ապրել ուզող կյանքի օրենքը: Դրա ապացույցը մեզ լավ կամ վատ կազմակերպող պետությունն է, մշակույթը, որ կարողացել է ստեղծել մեր ոգին՝ գյուղերը, քաղաքները, այգիները, դաշտերը, պատանի զինվորները, որոնք պատրաստ են փրկելու հարազատ ժողովրդին:
Սա կհասկանա՞ն – իշխանատենչ, հնոտիապաշտ մեր կուսակցությունները, որ մեր սուրբ փրկությունը միասնության մեջ է, պետության շուրջը համախմբվելու մեջ՝ ինչպիսին էլ այն լինի… թե՞ կշարունակենք մեր տկարությունը սնուցող չարիքը՝ ինքնամեծարումն ու կործանարար ստախոսությունը, կեղծիքը, երեսպաշտությունը – այսպես մենք ոչնչացրինք մեր հայրենիքն ու կառուցեցինք մեր ձեռով օսմանական թուրքիզմը: Սրա պատճառը այն էր, որ մեր քաղաքակրթությունը աղքատների, հոգելքվածների քաղաքակրթություն էր՝ քրիստոնեական պարզամիտ ու դավադիր քաղաքակրթություն: Մենք դեռ անմշակույթ ժողովուրդ էինք: Այսօր մշակույթի հիմքերն, ասես, դրվում են և մենք հասկանում ենք՝ թե ո՞վ ենք մենք և ի՞նչ է մեր ուզածը: «Վերանորոգվիր կամ մեռիր» - սա է օրվա պահանջը: Մարզված զինվոր, ամենակատարյալ հեռահար, հզոր զենք, հաղթելու և ապրելու սրբազան ու չխամրող տենչ՝ համախմբվել, մարզվել, մշակվել, փոխվել ու հարատևել: Մարտի դաշտում մեր ոգին ոչ թե մարտիրոս, այլ ցեղի միասնությունը պահպանող պատ, պարիսպ ու ամրոց պետք է դառնա:
Մեր թուլության, խեղճության ակունքները – մենք չենք տարբերում քաղաքական գործունեությունը անձնական փառասիրության եսասիրական, ինքնամեծարման սատանայական կործանարար հակումներից՝ Պուտինն ու Բայդենը, նաև Էրդողանն ու Ալիևը «մե՞ծ» են՝ ոչ թե հրեշնե՞ր, և նրանց խորհրդատուները, մանկլավիկները, ստրուկները, սպասարկողները, ևս ուզում են հեղինակություն վաստակել և «մեծ» երևալ: Թող ուտեն իրար այդ ոջիլներն ու ճիճուները - հասարակ, միամիտ, հիմար և, նույնպես, փառամոլ, դաժան ու եսասեր ռուսներն ու ուկրաինացիները, թող ծախսեն մահաբեր, կործանարար, ավերող, քանդող ու թունավորող զենքերը, որ ոջիլն ու ճիճուն խելք հավաքեն իրար արյուն լափելով: Ինչքան երկարատև և շատ խմեն իրար արյուն, այնքան մեծություն, պատիվ կվաստակեն աշխարհը շարժող հրեշներն ու սատանաները և այդքան շատ կհավատան իրենց մեծությանը և այն բանին, որ նրանք անում են հանուն առաջադիմության, համաձայն պատմության հրամայականի և անձնական զորության…
Կգտնվե՞ն հումանիստներ, որ դատեն սրանց համաձայն Աստծո ու մարդկային օրենքների: Թե՞ ողորմելիները կլռեն, իսկ հրեշները կստիպեն ոջիլներին ու ճիճուներին, որ ուտեն իրար և մեղմեն իրենց ոխը ու զայրույթը: Չէ՞ որ մարդը անասուն է՝ լինի ոջիլ, ճիճու թե հրեշ…
Միլիոնների մեջ մեկը միայն կարող է ըմբռնել, որ մարդը, ով էլ լինի – ոջիլ, հրեշ, աստված թե ճիճու – հանուն սատանայական փառասիրության, հանուն ինքնամեծարման ու փառքի, կարող է ոչնչացնել ոչ միայն ուրիշներին՝ անգամ ինքը իրեն, երևակայելով՝ ետմահու փառքը որպես պատիվ, հարգանք ու բարձրագույն գնահատական՝ ապրող ճիճուների ու հրեշների համար: Ի՞նչ կարող ես անել՝ հիմարի, ապուշի, ընկնավոր խելագարի համար – որոնցով լիքն է կյանքն ու աշխարհը – չկա ավելի բարձր բան կյանքում, քան փառքը…
Այսպես են մտածում ու ապրում նրանք, որոնք ոչխարային հնազանդությամբ մորթում են իրար Ուկրաինայում… Ոչ միայն Ուկրաինայում…
Ի՞նչ է հիմա ձեր ուզածը: Որ ձեզ հավատա՞ն: Երեսուն տարի ստել եք, խաբել եք, կեղծել եք՝ հերոս ու բոհեմ – գոռոզ ու մեծամիտ աղբ, ինքնահավան ու փառասեր աղբ՝ խաբել ու գողացել ու խաղացել, վայելել եք, ոչնչացրել եք ամենը, ինչ կյանք էր փոխանցում, վստահություն ու հավատ էր փոխանցում, ազատություն ու ազնվություն էր փոխանցում: Ո՞ւր են դրանք, ուզում եք որ ձեզ հավատա՞մ: Նույնը չե՞ք, ինչ կայիք, կյանքի տերեր: Դուք երբևէ ներողություն խնդրե՞լ եք ապրող մարդկանցից ձեր չարագործությունների համար – մութի, սառնամանիքի, անտեր ու թափառական երեխաների, նրանց իզուր զոհված հազարավոր հայրերի, ապականված և փողոց ընկած որբ մայրերի կրած տառապանքների համար: Դուք՝ КГБ-ում կոփված կիսագրագետ «հանճարներ» ու վհուկներ: Դանդաղ բացվում է ձեզ և ձեր էությունը թաքցնող վարագույրը: Նույն դանդաղությամբ դուք դառնում եք ավելի ճանաչելի, և, քանի շարժվի ժամանակը, այնքան մերժվելու եք դուք, որպեսզի ապրենք մենք: Ավելի լավ կլինի ձեզ համար, որ հեռանաք ինքնակամ և մենք մոռանանք վհուկի ձեր փառահեղ անցյալը: Եվ կապրի Արցախը, և կբարգավաճի Հայաստանը, նրա քաղաքակրթությունը, մշակույթն ու առօրյա ապագան…
Բավական է շահարկեք եղեռնը – դուք հենց հիմա զբաղված եք եղեռնագործությամբ – չեք տեսնո՞ւմ, թե ինչպես են փողոցում իրենց պահում երիտասարդ կանայք և պատանիները, որոնց նկատմամբ հույս ենք փայփայում, թե կլինեն պահապան զինվորներ, ինչ հաղորդումներով են դաստիարակում երիտասարդությանը հեռուստաէկրանները, դուք չեք ուզում տեսնել, որ ձեր հրապարակային արարողություններին, ինչպես եկեղեցում, մասնակցում են պաղ սրտով, շվարած, լքված, հուսահատ, աղքատ ու փառամոլ, արկածախնդիր կիսախելագարներ, որովհետև հենց այսպիսին եք դուք ինքներդ – բախտ եմ ունեցել ճանաչելու այդպիսի բարոյապաշտ ու համեստ հանճարների, իրենց նեխահոտ աշխատասենյակներում: Միշտ ապշել եմ, թե ինչու են այսպես պոռոտախոս այս հանճարաշատ առաջնորդները: Վերջերս միայն հասկացա, որ դա միջոց է թաքցնելու համար ներքին փուչ դատարկությունը կամ այն աղետավոր խոցը, որ կրծում է նրանց խեղճ փառամոլությունը: Ապրի Արթուր Շոպենհաուերի հանճարը: Նա բացեց իմ կուրությունը:
Լավ՝ ենթադրենք, թե դուք փառամոլ հրեշներ չեք և, իսկապես, ձեզ ցավ է պատճառում թուրք մարդակերների, այդ հրեշների թողած ցավը մեղմելու ոխորը: Հարցնում եմ – Բայց չէ՞ որ մեր նպատակը դա չէ: Ձեզ մենք՝ ժողովուրդը, ընկալում է որպես առաջնորդներ և ոչ թե խռովարարներ: Հետևաբար՝ նոր էթիկա, նոր վարք, մոռանալ հինը, հոտածը, կմախքը, չդառնալ հարազատ ժողովրդի դահիճը, մի ավերեք մեր տունը – մեզ մնացել է մի ափ հայրենիք և մի բուռ ժողովուրդ: Մի դարձրեք հայրենիքը որբանոց: Եթե կարող եք՝ նայեք ձեզ մի քիչ հեռվից, մի քիչ կողքից – ու կտեսնեք, թե ինչ խղճուկներ ու ինչ չնչին ու ողորմելի արարածներ եք դուք: Մտածելու և ելք գտնելու փոխարեն, թե ինչպես կտրենք այն թույն տարածող գլուխը, որ երազում է և այն լեզուն, որ արտասանում է «Էրիվան» կամ «Գյոդակչայ» բառերը – մտածում և ելք եք որոնում, թե ինչպես կտրեք գլուխն ու լեզուն սեփական եղբոր, որ մտածում ու գործում է այլ կերպ, քան դուք:
Ձերպեսների մտածելակերպը միշտ կործանարար է եղել Հայաստան աշխարհի համար, հայ մարդու տեսակի համար: Մենք մեր տունը քանդեցինք մեր իսկ ձեռքերով ու ապականված փառասիրությամբ: Ո՞ւր է Կարսը, ո՞ւր է Արդահանը, Վանը, Սասունը, Մուշը: Այնտեղ, որտեղ իրենց տեղն է՝ գերության մեջ: Ինչո՞ւ: Ո՞ւր են ձեր մշակած մտքերը, ո՞ւր են ձեր գիտական կամ գրական ուսումնասիրությունները, ֆիլմերը, ինչ գաղափարներ ու գործունեություն եք դուք թելադրում ու տրամադրում երիտասարդությանը: Միայն մեխանիկական, կույր, զգացական հայրենասիրություն: Դժբախտաբար այդպես է եղել դարեր շարունակ: Հիշենք Ավարայրի ճակատամարտը: Երկու կողմից 140 հազար մարդը: 120 հազարը հայեր: 60 հազարական երկու կողմերից՝ Սպարապետ Վարդան Մամիկոնյան – քրիստոնեական հավատի մոլեռանդ պաշտպան (եկեղեցու պահապան հրեշտակ) և Սյունիքի տեր, Հայաստանի փոխարքա (նշանակված պարսկական թագավորի կողմից) պաշտպանում է զրահադաշտականությունը (քաղաքական նկատառումներով) խմում են իրար արյուն 120 հազար եղբայրներ – խելահեղ ճիճուներ, ոջիլներ և մոլեգնած արյունռուշտ հրեշներ: Ի՞նչ է սա: Հայի ոգի՞: Ձեր ուզածը սա՞ է: Չե՞ք կարող ձեզ զսպել – 1570 տարի է անցել և դուք մնացել եք նույնը՝ եղբոր արյունը խմող հրեշներ – չի փոխվում հայի ոգին: Դուք ապացուցում եք հենց դա՝ 1570 տարի հետո եղբայրասպան ջարդից հետո: Ձեր արյունռուշտ ոգին մսխեց Հայաստանը, նրա միլիոնավոր տերերին, նրանց հարստությունը, արարածը, կամքը, ճակատագիրը, մշակույթը և համարձակվում եք երեսպաշտ ստախոսության - «մեզ մորթեցին», փոխանակ ասելու. «մենք մորթեցինք իրար եղբայրաբար»:
Հոգացեք նոր սերնդի ապագան և ոչ թե ապագա որբանոցների ու գժանոցների մասին մտածեք: Եթե անտեսեք այս մտքերը, ես կանիծեմ ձեզ, ոջիլներ, ճիճուներ ու կատաղած, արյունռուշտ հրեշներ…
ՏԻԳՐԱՆ ԱՎԱԳՅԱՆ
Գրող, էթիկական մտածող
Տեր Աստված, շնորհակալ եմ քեզանից ինձ տված մարդկային կերպարի համար։
ԴՈՍՏՈԵՎՍԿԻ
Քեզ տվել եմ կամք ու խիղճ - դու ինքդ ես քո արարիչն ու ստեղծողը։ Միայն քեզ եմ պարգևել աճելու ու զարգանալու կամքը։ Քո մեջ ես դրել եմ տիեզերական կյանքի սերմերը։
ՊԻԿՈ ԴԵԼԼԱ ՄԻՐԱՆԴՈԼԱ
«Մարդու արժանապատվության մասին» ճառից
Եվ այսպես - հնարավոր է փոխել ամեն ինչ, բացի բնատուր և անմերժելի օրենքները՝ տրված մարդուն։
ԹՈՄԱՍ ՋԵՖՖԵՐՍՈՆ
Կարծիքներ