Միացյալ Թագավորության նոր դեսպանը կնշանակվի հաջորդ տարի
Անուշ Դաշտենց
20 Նոյեմբեր 2019 | 17:55
0
Մեկնաբանել էինք, որ օրերս ԱԳ նախարարն ընդունել էր Մեծ Բրիտանիայի գործերի ժամանակավոր հավատարմատար Դեյվիդ Մորանին։ Եվ որ դրանով Միացյալ Թագավորությունն իր ներկայացվածության մակարդակը Հայաստանում դեսպանից իջեցնում է հավատարմատարի մակարդակի։
ՀՀ-ում Միացյալ Թագավորության դեսպանատնից մեր ուղարկած հարցմանն ի պատասխան՝ տեղեկացնում են, որ Միացյալ Թագավորության և Հայաստանի միջև հարաբերություններում փոփոխություն չկա։ «Միացյալ Թագավորությունը գերազանց հարաբերություններ ունի Հայաստանի կառավարության հետ։ Մենք ավելի քան 25 տարվա սերտ համագործակցություն ենք ունեցել և ակնկալում ենք է՛լ ավելի ամրապնդել մեր երկրների միջև կապերը գալիք տարիներին»,- ասված է ՀՀ-ում ՄԹ դեսպանատան պատասխանում։
Տեղեկացվում է նաև, որ նոր դեսպանը կնշանակվի հաջորդ տարի։ «Մինչ այդ, ավագ դիվանագետ պրն Դեյվիդ Մորանի նշանակումը որպես Գործերի ժամանակավոր հավատարմատար՝ դեսպանի աստիճանով, վկայում է ՄԹ-ի՝ Հայաստանի հետ հարաբերությունների կարևորման մասին»,-հավելում է դեսպանատան պատասխանում։
Հիշեցնենք, որ սրանից առաջ ՀՀ-ում ՄԹ դեսպան էր նշանակվել հայազգի Ալեն Գոգբաշյանը, ապա ՄԹ-ն չեղարկեց հաստատված թեկնածությունը:
Կարծիքներ