Առողջապահության նախարարության «երեքը մեկում» սադրանքը

Որ Հայաստանի թավշյա իշխանության համար ատելության խոսքը, հայհոյախոսությունն ու ստախոսությունը սովորական պահվածք են, համոզվում ենք վերջին երեք տարում օրական չգիտեմ քանի անգամ: Որ նույն իշխանությունը պատասխանատվությունից խուսափելու հարցում անգերազանցելի է, միակն ու անկրկնելին, էլի չգիտեմ, թե քանի անգամ համոզվել ենք: Որ ձեւականն ու ոչ բովանդակայինը այս իշխանության համար առաջնային են ու գլխավոր՝ համոզվել ենք էլի չգիտեմ թե քանի անգամ: Առողջապահության նախարարությունը մեկտեղել է այս երեք՝ առնվազն անընդունելի որակները:

Լուսանկարում պատկերված վահանակը տեղադրված է Երեւանի Կիեւյան-Բաղրամյան խաչմերուկում՝ «դեմքով» դեպի փողոցը, դեպի ավտոմեքենաները, այս մասով անցնող հետիոտնը տեսնում է սրա հակառակ կողմը: Այսինքն՝ սա ձեւական է, այս հատվածում մեքենաների երթեւեկը բավականին ծանրաբեռնված է, եւ ոչ ոք ցանկության դեպքում անգամ չի կարող տրվել ընթերցանությանը: Ուրեմն փաստ առաջին. վահանակը ձեւական է:

Փաստ երկրորդ. գրված է, թե 2020 թվականի մարտի 21-ից արգելվում է ծխելը հասարակական տրանսպորտի կանգառների ծածկերի տակ: 2004 թվականի դեկտեմբերին՝ ավելի քան 16 տարի առաջ ընդունված «Ծխախոտի իրացման, սպառման, օգտագործման սահմանափակումների մասին» օրենքի 11-րդ հոդվածի համաձայն, արգելվում է ծխելը տրանսպորտում: Իսկ տրանսպորտը միայն փոխադրամիջոց չէ, այլ մարդկանց եւ բեռների փոխադրումների, հաղորդակցության միջոցների ամբողջություն: Այլ խոսքով, կանգառը տրանսպորտի բաղկացուցիչ է, եւ արդեն 16 տարի է, ինչ Հայաստանում արգելված է կանգառում ծխելը: Սա նշանակում է, որ առողջապահության նախարարությունը ստում է՝ պնդելով, որ կանգառում ծխելն արգելվել է 2020 թվականի մարտից:

Փաստ երրորդ. իրազեկման այս պաստառում բերված է ծխելը դադարեցնելու թեժ գծի հեռախոսահամար: 2004 թվականի դեկտեմբերին՝ ավելի քան 16 տարի առաջ ընդունված «Ծխախոտի իրացման, սպառման, օգտագործման սահմանափակումների մասին» օրենքի 12-րդ հոդվածի համաձայն, օրենքի դրույթների նկատմամբ վերահսկողությունն իրականացնում են Հայաստանի Հանրապետության կառավարության լիազորված մարմինները։

Դրանցից մեկն առողջապահության նախարարությունն է՝ իր ուռճացված աշխատակազմով: Չհիմնավորված բարձր աշխատավարձեր, էլ ավելի անհիմն պարգեւավճարներ ստացողները գործ չեն անում եւ քաղաքացուն են թողնում ծխելու սահմանափակումների վերահսկողությունը՝ խախտում են օրենքը: Եթե առողջապահության նախարարությունում տեղյակ չեն, տեղեկացնենք, որ ընդամենը օրեր առաջ Երեւանում մի քաղաքացի թիվ 54 երթուղու միկրոավտոբուսի մեջ սպանել է մեկ այլ քաղաքացու, երբ վերջինս պահաջել է դիմակ կրել: Իսկ ո՞վ ասաց, որ չնախատեսված վայրում ծխողները շատ ավելի հանդուրժող են եւ կլսեն այլ քաղաքացու: Չկա նման երաշխիք: Այս պաստառով առողջապահության նախարարությունը սադրում է մարդկանց՝ անգամներով բազմապատկում է սպանությունների ռիսկը: Ու չզարմանաք, որ ասեմ՝ ատելության քարոզի նվիրյալ թավշյա իշխանության պարագայում սա բնական է:

Պաստառը կախվել է, երբ առողջապահության նախարարն Արսեն Թորոսյանն էր: Նա, որ կորոնավիրուսի համաճարակի նոր-նոր տարածման օրերին՝ 2020 թվականի փետրվարին, երբ աշխարհում արդեն մոտ 3 հազար մարդ էր մահացել կորոնավիրուսից, ասաց. սա շատ վտանգավոր վարակ չէ, բաց տարածքներում հավելյալ սահմանափակող միջոցառումների կարիք չկա: Սրանից մեկ տարի անց ունենք ավելի քան 5 հազար մահ մեր երկրում: Թավշյա Հայաստանում մարդկանց կյանքը իշխանության համար արժեք չունի: Թավշյա Հայաստանում այլ գերակայություններ եւ առաջնահերթություններ կան. ձեւական քայլեր, սուտ եւ կեղծ հայտարարություններ, պատասխանատվությունից խուսափելու գործողություններ եւ այլն: Վկան՝ այս պաստառը:

Արեգ ՄԱՐԳԱՐՅԱՆ