«Դուխով» նորամուծություն՝ հայկական եթերում

«Դուխով» նորամուծություն՝ հայկական եթերում

«5-րդ ալիք» հեռուստաընկերության փետրվարի 19-ի ակցիան նորություն էր մեր հեռուստադաշտի համար։ Գրքի օրվա կապակցությամբ հեռուստաընկերությունը ցանկացողներին համացանցի միջոցով նվեր-գիրք տվեց։ «Հինգի» լուրերի ժամանակ ընդամենը մի քանի րոպեով հեռուստաէկրանին հայտնվեց QR ծածկագիր։ Ներբեռնելով տվյալ ծածկագրի տակ գտնվող հավելվածը, հեռուստադիտողը հաղորդագրություն էր ստանում, որ «5-րդ ալիքի» կողմից այսինչ գիրքը նվեր է ստացել և որ նվերը կարող էր վերցնել Աբովյան 2 հասցեում գտնվող «Բուկինիստ» գրախանութից։ QR ծածկագիրը խանութում ցույց տալով, մարդիկ ստանում էին իրենց նվերները։ Հեռուստատեսությունում զարմացած են մասնակիցների քանակից:

«Սա առաջին փորձն էր, եւ, բնականաբար, մենք չէինք սպասում նման ակտիվություն։ Մենք նախատեսել էինք մի քանի տասնյակ գիրք նվիրել, բայց արձագանքողները մոտ երկու հազար եղան։ Ցավոք, այս անգամ ոչ բոլորին է հաջողվել ստանալ օրվա նվերը։ Նման փորձ կա արտասահմանյան հեռուստաշուկաներում, եւ մենք մտածեցինք՝ ինչո՞ւ նույնը չանել մեզ մոտ, մանավանդ, որ մեր հեռուստադիտողն արժանի է այդ հարգանքին: Գիրքը բոլոր ժամանակներում է տառաճանաչ մարդկանց համար հաճելի նվեր եղել, իսկ մեզ նայում են մտածող մարդիկ, եւ մենք պարտավոր ենք հարգել մեր հեռուստադիտողին»,- «Հրապարակին» ասաց «5-րդ ալիքի» տնօրեն Հարություն Հարությունյանը։ «Հինգ»-ում մտածում են, որ հետագայում նման ակցիաներ իրագործելիս նվերների քանակը կավելացնեն։ Իսկ մեզ հետաքրքրեց ակցիայի թվաբանությունը։ Փաստորեն, մի քանի վայրկյանում 2 հազարից ավելի մարդ «Հինգ»-ի լուրեր է նայել, ներբեռնելով հավելվածը։ Եթե սրան գումարենք լուրերի այն դիտողներին, ում գիրք պետք չի եղել, նաեւ նրանց, ով սմարթֆոն, հետեւապես նաեւ՝ հավելված ներբեռնելու հնարավորություն չունի, երկու հազարը կդառնա մի քանի հազար։ Մինչդեռ, ըստ ռեյտինգների, «5-րդ ալիք» ոչ ոք չի նայում։