Ինչպես են արձագանքել Գազայի սեկտորի հարցով Թրամփի առաջարկած ծրագրին

ԱՄՆ նախագահ Դոնալդ Թրամփի՝ Գազայի սեկտորից պաղեստինցիների վերաբնակեցման ծրագիրը եւ սեկտորը ամերիկյան հսկողության տակ վերցնելու մասին հայտարարությունը խիստ քննադատության է ենթարկվել աշխարհի տարբեր երկրներում։ Մասնավորապես, այն քննադատել են Գերմանիայի Բունդեսթագի թե իշխանական, թե ընդդիմադիր պատգամավորները։ Գերմանիայի Սոցիալ-Դեմոկրատական կուսակցության՝ արտաքին քաղաքական հարցերով փորձագետ Նիլս Շմիդտը հայտարարել է, որ Թրամփի առաջարկները չեն կարող համարվել ընդունելի։ Reuters-ի հետ զրույցում Շմիդտը ասել է, որ Թրամփի առաջարկը միջազգային իրավունքի կոպտագույն խախտում է, որով փորձ է արվում հայրենիքից զրկել 2 միլիոն պաղեստինցիների։

Գերմանացի փորձագետը ասել է, որ Իսրայելն ու պաղեստինցիները անվտանգ, խաղաղ ու ապահով կարող են ապրել միայն երկու անկախ պետությունների խաղաղ գոյակցության պայմաններում։ Ընդդիմադիր Քրիստոնեա-Դեմոկրատական միության եւ Քրիստոնեա-Սոցիալական միության խորհրդարանական խմբակցության փոխնախագահ Յոհան Վադեֆուլն էլ հայտարարել է, որ ողջունում է Թրամփի հանձնառությունը՝ պատասխանատվություն ստանձնել Գազայի սեկտորի հարցում։ Նա կարեւոր է համարել  միջազգային իրավունքի նորմերի հիման վրա հակամարտության իրական քաղաքական կարգավորման հասնելը։ Չինաստանն իր հերթին պաշտոնապես հայտարարել է, որ դեմ է պաղեստինցիներին Գազայի սեկտորից հարկադիր տեղահանմանը։ Պեկինը հույս է հայտնել, որ կրակի դադարեցման ռեժիմը Գազայի սեկտորում որպես հնարավորություն է օգտագործվելու Պաղեստինյան հարցը ճիշտ հունի վրա դնելու եւ հակամարտությունը երկու անկախ պետությունների խաղաղ գոյակցության հիման վրա կարգավորելու համար։ Թուրքիան եւս այս ծրագրին դեմ է հանդես եկել։ Թուրքիայի ԱԳ նախարար Հաքան Ֆիդանը հայտարարել է, որ Թրամփի առաջարկած ծրագիրը կարող է վերստին հրահրել հակամարտությունը Մերձավոր Արեւելքում, ինչպես փոխանցում են DW եւ Anadolu գործակալությունները։