Ի՞նչ է բրենդինգը և ինչպիսին պետք է լինի Հայաստանի բրենդինգը

Զբոսաշրջության կոմիտեն Հայաստանի զբոսաշրջության բրենդավորում է իրականացնում, այսինքն՝ Հայաստանի զբոսաշրջությունը կունենա նոր լոգոտիպ։ Այս նպատակով կոմիտեն մրցույթ է հայտարարել, հաղթել է Aha collective խումբը։ Մենք զրուցեցինք «Ինդիգո բրենդինգ» ընկերության հիմնադիր և արտ-տնօրեն Արամ Ազարյանի հետ՝ հասկանալու համար, թե ի՞նչ է բրենդիգն ընդհանրապես, և թե ինչպես այն կարող է ազդել զբոսաշրջության զարգացման վրա․

«Բրենդինգը շատ բան է ներառում, այն մարդու ուղեղում թողած տպավորությունն է, դա միայն լոգոն, տառատեսակն ու գույնը չէ, դրանք ընդամենը մի փոքր մասն են։ Տվյալ դեպքում բրենդինգը տվյալ երկրի մասին մարդկանց պատկերացումն է, այսինքն՝ ինչո՞ւ ընտրել այդ երկիրը, այլ ոչ, օրինակ, հարևան երկիրը, կամ գնալ Մոնտենեգրո՞ հանգստանալու, թե՞ գալ Հայաստան, ի՞նչն է ստիպելու մարդուն գալ Հայաստան։ Ինչպես մարդն ունի իր անվանումը, իրեն հատուկ բնավորության գծերը, հագուկապը, խոսելաձևն ու պահվածքը, իր ընկերական և ոչ միայն շրջապատը այնպես էլ յուրաքանչյուր բրենդ ունի իր անվանումը, իր ինքնությանը հատուկ տարրեր, վիզուալ ինքնությունը և հաղորդակցման տոնը, իր լսարանը։  Լոգոն վիզուալ կոմունիկացիայի մի փոքր մասն է՝ մարրդու պարագայում օրինակ՝ կրծքանշանը։  Այսինքն՝ եթե մենք դիմել ենք բրենդինգի և ունենք միայն լոգո, ապա դա շատ չնչին մի բան է։ Ուստի Հայաստանը բրենդավորելու համար անհրաժեշտ կլիներ հասկանալ, թե ինչպես այն կներկայացնենք որպես մարդու և ինչպես այդ մարդուն կընկալի օտարերկրացի տուրիստը»,- պատասխանեց Ազարյանը։

Ազարյանին հարցրինք, թե ինչպիսի՞ն պետք է լինի Հայաստանի զբոսաշրջության բրենդինգը, ինչի՞ վրա պետք է շեշտադրում կատարվի․

«Բրենդինգի պրոցեսին անցնելուց առաջ բրենդինգային ընկերությունը մեծ հարցաշար պետք է ունենա և ունենա այդ հարցերի պատասխանները, որից հետո նոր սկսվում է գործընթացը, առանց այդ հարցերի պատասխանների պարզ չի լինի, թե ի՞նչ ուղղությամբ պետք է գնալ, արդյունքում պատահականությամբ կարող է ստացվել կա՛մ լավ, կա՛մ ավելի շուտ վատ պրոդուկտ, եթե չլինի խորը գիտակցում, թե ինչ է քեզնից պահանջվում, իսկ որպեսզի հասկանալ, թե ի՞նչ է քեզնից պահանջվում, պետք է ինչ-որ մեկը դա ձևակերպի։ Որպես կանոն՝ երբ բրենդինգի համար դիմում է որևէ ընկերություն, ապա այն ունի հստակ ձևավորված պատկերացում, թե ով է իր թիրախը, ովքեր են իր մրցակիցները և որն է իր մրցակցային առավելությունը։ Այս հարցերին պատասխանելով որոշակի կերպով ձևավորվում է այն ուղղությունը, որով պետք է գնալ»։

Մասնագետին հարցրինք նաև, թե իր կարծիքով հետպատերազմական Հայաստանը ի՞նչ կարող է առաջարկել զբոսաշրջիկներին, բրենդավորումը ի՞նչ մեսիջներ կարող է փոխանցել օտարերկրացիներին․

«Անկեղծորեն, կդժվարանամ այդ հարցին հիմա պատասխանել, որովհետև որոշակի հետազոտություններ պետք է լինեն, որոնց հիման վրա կարելի կլինի որոշակի դատողություններ անել»,- պատասխանեց Ազարյանը։